Siopa si Maria Magdalena?
Say ebat na Biblia
Si Maria Magdalena et sakey ya matoor a patumbok nen Jesu-Kristo. Say ngaran to ya Magdalena et ontutukoy ed baley na Magdala (odino Magadan), ya asingger ed Dayat na Galilea. Posiblin nanayam met ditan si Maria.
Si Maria Magdalena et sakey ed saray pigaran bibii ya akaiba nen Jesus tan saray disipulo to ya linma ed saray syudad tan baryo tan intarya to met iray pankaukolan da ed materyal. (Lucas 8:1-3) Anengneng ton mismo so impamatey ed si Jesus tan kaiba met ed saray akaunan akanengneng ed si Jesus kayari na inkioli to.—Marcos 15:40; Juan 20:11-18.
Kasin si Maria Magdalena et sakey a prostitute?
Ag-ibabaga na Biblia ya sakey a prostitute si Maria Magdalena. No nipaakar ed impanbilay to, say ibabaga labat na Biblia et pinapaway nen Jesus ed sikato so pitoran demonyo.—Lucas 8:2.
Iner sirin so nanlapuan na ideyan sikatoy sakey ya prostitute? Nilasus a taon kayari na impatey to, panisiaan na dakel a totoo ya sikato met imay biin agbinitla so ngaran to (sakey a prostitute) ya anguras ed sali nen Jesus panamegley na lua to tan pinunasan to iratan na buek to. (Lucas 7:36-38) Balet, anggapoy nabasa tayon detalye ed Biblia ya onsusuporta ed satan ya ideya.
Kasin si Maria Magdalena et “apostol na saray apostol”?
Andi. Tatawagen na saray Katoliko si Maria ya “St. Mary Magdalene” tan “apostol na saray apostol” ta sikatoy inmunan angibalita ed saray apostol ya apaoli si Jesus. (Juan 20:18) Balet, aglabay ya ibaga na satan a salaysay ya sakey ya apostol si Maria Magdalena. Tan anggapoy nabasa ed Biblia ya sikatoy sakey ya apostol.—Lucas 6:12-16.
Asumpal ya insulat so interon Biblia nen asingger lan manampot so unonan siglo C.E. Balet, kayari nilasus a taon, nandesisyon iray lider na relihyon ya ipasen day Maria Magdalena ed espisyal tan atagey a posisyon. Wala ray sulsulat ya ginawa manlapu nen komadua anggad komatlon siglo ya mangibabagan mangiimon iray arum ya apostol ed si Maria Magdalena. Balet ta sarayan istorya et gawagawa labat tan agkabiangan na Kasulatan.
Kasin asawa nen Jesu-Kristo si Maria Magdalena?
Andi. Diad tua, malinlinew so ibabaga na Biblia ya ag-angasawa si Jesus. a
a Nengnengen so artikulon “May Asawa ba si Jesus? May mga Kapatid ba si Jesus?”
Ompan Nagustoan Mo Met
EBAT ED SARAY TEPET ED BIBLIA
Saray Bibii ed Biblia—Antoy Naaralan Tayo ed Sikara?
Amtaen no siopa ray bibii ed Biblia ya maong so alimbawa ra tan nengnengen so pidumaan da ed saray bibii ya mauges so alimbawa ra.
ALIGEN SO PANANISIA RA
Maria Magdalena—“Anengneng Koy Katawan!”
Sayan matoor a bii et naikdan na pribilehyo ya ibagad arum so maong a balita.
BANGAT NA BIBLIA
Salien so Panag-aral na Biblia
Salien so libre ya interactive ya panag-aral na Biblia ya walay personal ya manbangat ed sika.