Say ebat na Biblia

 Diad samay kabkabat ya Sermon nen Jesus diad Palandey, imbaga to: “Itultuloy yon aroen iray mamubusol ed sikayo.” (Mateo 5:44; Lucas 6:27, 35) Say labay ya ibaga na satan ya imbaga to et nepeg tayon aroen iramay mamubusol ed sikatayo odino aliwan patas so panagtrato da ed sikatayo.

 Impanengneng nen Jesus so panangaro tod saray mamubusol ed sikato diad impamerdona tod sikara. (Lucas 23:33, 34) Mikonektaan iyan imbangat nen Jesus diad samay nabasad Hebreon Kasulatan, odino kabkabat bilang Daan a Sipan.—Exodo 23:4, 5; Proverbio 24:17; 25:21.

 “Itultuloy yon aroen iray mamubusol ed sikayo tan ipikasi iramay mamapasegsegang ed sikayo.”—Mateo 5:43, 44.

Diad sayan artikulo

•  Akin et nepeg yon aroen iray mamubusol ed sikayo?

•  Diad anto ran paraan yo nipanengneng ya inaro yo ray mamubusol ed sikayo?

•  Kasin milaban kayod saray mamubusol ed sikayo?

•  Saray lingon pakatalos tungkol ed pangaro ed saray mamubusol ed sikayo

•  Saray teksto ed Biblia tungkol ed pangaro ed saray mamubusol ed sikayo

 Akin et nepeg yon aroen iray mamubusol ed sikayo?

•   Aligen so maong ya alimbawa na Dios. Say Dios et “maong ed saray andiay utang na linawa tan mauges.” (Lucas 6:35) “Papasinagen toy agew to ed saray mauges . . . a totoo.”—Mateo 5:45.

•   Lapud aro, ompan napakiwas ya manguman imay mamubusol ed sikayo. Papasesegen itayo na Biblia ya tratoen tayon maabig iray mamubusol ed sikatayo, no gawaen tayo itan singa tayo ‘bubuntonan na mandarlang iran ngalab so ulo ra.’ (Pro. 25:22) Sayan panangibaga et ontutukoy ed proseso ya pangidalan na sakey a bato ed mandarlang ya apoy pian ombiig iray mablin metal. Mipadpara, no maabig so panagtrato tayo ed saray mamubusol ed sikatayo, nayarin natunaw ya singa panangibaga so pasnok da tan ompaway iray maong ya ugali da.

 Diad anto ran paraan yo nipanengneng ya inaro yo ray mamubusol ed sikayo?

•   “Manggawa kayoy maabig ed saray mamubusol ed sikayo.” (Lucas 6:27) “No say kabusol mo et narasan, pakan mo; no napgaan, painum mo,” kuan na Biblia. (Roma 12:20) Nipanengneng yo met so panangaro ed saray mamubusol ed sikayo no iyaplika yo imay tatawagen ya Golden Rule, ya kuan to: “Say labay yon gawaen na totoo ed sikayo, gawa yo met ed sikara.”—Lucas 6:31.

•   “Mansalita kayoy maabig ed saray mangaayew ed sikayo.” (Lucas 6:28) Anggano aliwliway panagsalita na saray mamubusol ed sikatayo, mansalita tayo nin siansia na maabig ed sikara. Ibabaga na Biblia: “Agyo . . . iinsultoen imay mangiinsulto ed sikayo. Imbes, manggawa kayoy maabig ed sikato.” (1 Pedro 3:9) Makatulong ed sikatayo iyan bilin pian agtayo ra kabusolen.

•   “Ipikasi yo iray mangiinsulto ed sikayo.” (Lucas 6:28) No walay mangiinsulto ed sikayo, “agyo babalesen na mauges.” (Roma 12:17) Imbes, ipikasi yo ya perdonaen na Dios itan ya too. (Lucas 23:34; Gawa 7:59, 60) Imbes ya ombawi kayo, ipaubaya yo la itan ed Dios tan sikato lay akauley ed satan ya too base ed perpekton panangukom To.—Levitico 19:18; Roma 12:19.

 “Itultuloy yon aroen iray kabusol yo, manggawa kayoy maabig ed saray mamubusol ed sikayo, mansalita kayoy maabig ed saray mangaayew ed sikayo, ipikasi yo iray mangiinsulto ed sikayo.”—Lucas 6:27, 28.

•   Magmaliw ya “maanos tan maomaong.” (1 Corinto 13:4) Diad samay kabkabat ya impangideskribe nen apostol Pablo ed aro, inusar to may parehon Griegon salita (a·gaʹpe) ya nabasa met ed Mateo 5:44 tan Lucas 6:27, 35. Nipanengneng tayo met itan ya Kristianon aro ed saray mamubusol ed sikatayo no magmaliw tayon maanos tan maomaong, tan no agtayo maimon, mapaatagey, odino onkikiwas a mabanday.

 “Say aro et maanos tan maomaong. Say aro et aliwan maimon. Agmanlalastog, agmanpapaatagey, ag-onkikiwas a mabanday, agto aanapey dilin pankaabigan to, agmainomay a manpasnok. Agmanbibilang na impakasakitan. Agto panliliketan so ag-inkatunong, noagta panliliketan toy katuaan. Itetepel toy amin a bengatla, manisia ed amin a bengatla, maniilalo ed amin a bengatla, mansusungdo ed amin a bengatla. Say aro et agbalot mangangga.”—1 Corinto 13:4-8.

 Kasin milaban kayod saray mamubusol ed sikayo?

 Andi, ta imbangat nen Jesus iray papatumbok to ya ag-ira nepeg ya milaban ed saray mamubusol ed sikara. Singa bilang, nen pinasakbayan to ra ed magano lan pangataki ed Jerusalem, agto imbagad sikara ya diman labat ira tan kaukolan day milaban, imbes say imbaga to et ombatik la ra. (Lucas 21:20, 21) Oniay imbaga met nen Jesus ed si apostol Pedro: “Ipawil moy espadam ed kaluban to, ta amin iramay mangusar na espada et ompatey ed espada.” (Mateo 26:52) Ipapanengneng na Biblia tan saray historian ya saray papatumbok nen Jesus nen inmunan siglo et ag-ira akilaban ed saray mamubusol ed sikara. a—2 Timoteo 2:24.

 Saray lingon pakatalos tungkol ed pangaro ed saray mamubusol ed sikayo

 Lingon pakatalos: Ingganggan na Dios iray Israelita ya busolen iray kalaban da.

 Lingon pakatalos: No aaroen yo ray mamubusol ed sikayo, kokonsintien yoy aliwan kagagawa da.

 No antoy tua: Ipapanengneng na Biblia ya sarag yon aroen so sakey ya too balet ta agyo kokonsintien so aliwan gagawaen to. Singa bilang, kabusol nen Jesus so inkaruksa balet siansia nin impikasi to iramay amairap ed sikato. (Lucas 23:34) Kabusol toy kasalanan, balet inter toy bilay to parad saray makasalanan.—Juan 3:16; Roma 6:23.