Abayag lan kaukolan na saray doktor ya mano-opera so panagpeket ya nausar da ed operasyon tan pamaabig ed sugat na saray tissue na laman tayo. Dakel so glue natan ya agnayarin usaren ed dalem na laman. Makasamal iratan tan onawet no namaga la, tan aliwa ran mapeket ed ambasan tissue na laman. Adiskobre na saray scientist so solusyon ed satan nen inaral da so mapalet ya substansia ya ipapaway na slug. a

 Nonot mo pa: No napepeligro so slug, mangipaway itan na mapalet ya substansia ya mapekepeket kanian sarag toy ompeket ed ambasan bulong. Lapud satan et naprotektaan so slug, balet sarag to nin siansiay onggalaw.

 Inaral na saray researcher so mapalet ya substansia ya ipapaway na slug tan naamtaan da iray pigaran rason no akin ya nayarin usaren itan bilang natural ya glue. Singa bilang, sarag ton gawaen so proseso ya chemical bonding tan electrostatic attraction. Onsepsep itan ed antokaman ya peketan na slug tan ompinat no napuersa. Inalig na saray researcher iray kapasidad na substansia ya ipapaway na slug tan nandesinyo ira na glue ya mas mapeket nen saray uusaren da natan ya panagpeket ed panagtambal tan nayari itan ya ompeket ed mabilay ya organ. Ibabaga ran mapeket iratan “ed saray organ no panon ya saray cartilage et mapeket ed pukel.”

 Manisia iray eksperto ya sayan glue et nayarin magmaliw ya sakey ed saray mabetbet ya kaukolan tan labalabay ya usaren na saray doktor ya mano-opera, tan agda la kaukolan so mandait tan mangusar na saray staple. Nausar itan ed pangapiger na cartilage odino pangipeket na saray medical device ed eksakton posisyon ed laman ya kaukolan a panginan ed satan. Apaneknekan la ed saray ginawan test ya epektibo itan ya glue sanen pinuletan so abot ed puso na sakey a baboy tan sinakaban iray abot ed altey na saray otot.

 Mabetbet ya makakalmo iray scientist na marakdakep iran solusyon ed saray kaslakan ya problema no aralen da iray natural ya walad kaliberliber tayo. “Kaukolan labat ya antam no iner ka onnengneng tan no anengneng mon walay balibalin ideya, bidbir mo itan,” so kuan nen Donald Ingber, say direktor na institusyon ya nandesinyo ed artipisyal ya panagpeket.

 Antoy nibagam? Kasin say natural ya glue na substansia ya ipapaway na slug et niwala lapud ebolusyon? Odino walay nandesinyo?