Saray gannet et angkabaleg ya manok ed dayat ya sarag day man-dive ya mapmaples ya anggad 190 kilometers per hour. No onkena so gannet ed danum, say kakasil na satan et nayarin onsulok ed 20 beses ya puersa na gravity. Panon ya nasasarag ya ulit-uliten na saray gannet so ontan ya mapmaples tan mapeligron panag-dive?

 Nonot mo pa: Antis ya onkena ed danum so gannet, ikupit toy payak to ed beneg na laman to, kanian say kurti to et magmaliw ya singa pana. Walay membrane ya onsakob ed mata to pian naprotektaan itan, insan to pasiboken iray organ ed beklew tan pagew to pian ombaleg tan magmaliw ya singa airbag pian agnasakitan no onkena ed danum.

 Legan ya onkekena tan onlelereg ed danum so gannet, say tepek, ulo, tan beklew to et onkurtin patayusok. Lapud satan ya kurti to, say pressure na danum et onkayat ed amin ya muscle na matibay ya beklew na gannet kanian agnasakitan. Diad sankakirem et umanen na gannet so pokus na mata to pian makanengneng anggan diad dalem na danum.

 Panon kaaralem so na-dive na gannet? Lapud kapeles ton man-dive, nasabi toy kaaralem ya ngalngali 11 metro, balet sarag to ni onlad mas aralem no ikampay toy akakupit ya payak to tan ikusay-kusay toy sali ton singa sali na pato. Diad tua, wala ray naobserbaan ya gannet ya manda-dive ed lampas ni na 25 metro a kaaralem. Kayari ton man-dive, main-inomay na gannet so onletaw ed tapew na dayat, tan tampol ya makatekkiab lamet.

 Bantayan so panag-dive na saray gannet

 Nandesinyo iray researcher na saray bionic gannet ya ontulong ed pananap tan pan-rescue no wala ray emergency. Sarayan robot et iilaloan ya makatekkiab, maka-dive ed danum, insan makatekkiab lamet. Balet legan dan tetestingen irayan bionic gannet, sakey ed saray robot da so aminpigan aderal lapud masyadon maksil so bagsak to ed danum. Kanian imbaga na saray researcher ya say robot ya ginawa ra et “agmakakiking ed panag-dive na gannet.”

 Antoy nibagam? Kasin say abilidad na gannet ya man-dive et resulta na ebolusyon? Odino walay nandesinyo?