Diad saray pinalsan ontitikyab, say bukel na dandelion so sakey ed saray sanka-nayarian. No nasiplogan na dagem so dandelion, milad dagem iray angkekelag ya bukel to ya singa ra parachute. Anggano abeba labat so tikyab da, wala ray nasabi day anggad sakey kilometro odino onsulok ni. Panon dan nagagawaan itan? Adiskobre diad agano ni ya say katitikyab da et mamipat ya beses ya mas maayos tan mareen nen say katitikyab na ordinaryon parachute.

 Nonot mo pa: Kada bukel na dandelion et akapeket ed leksab na tangkay ya wala ray bulong to ya singa kaimpis na bago ya tatawagey pappus. Magmamaliw itan ya singa parachute pian mansiansiad tagey iray bukel.

 Pero aliwan satan labat so sarag ya gawaen na pappus. No nasisiplogay dagem iray bulong, walay nabubuo ed tagey ya palimpek ya dagem odino vortex. Tan diad leksab to et wala met so nabubuo ya low pressure kanian naguguyor patagey so pappus tan agtampol ondadapo ed dalin.

 Lapud balibali inkadesinyo na pappus, main-inomay ya ontagos so dagem, kanian magmamaliw itan ya singa parachute pero mas maayos tan mareen so katitikyab to. Sakey ni, say 90% na pappus et anggapoy iyan to! Kanian maiimpis ya maong iratan.

 Sasalien na saray scientist ya aligen so katitikyab na bukel na dandelion. Posiblin usaren day desinyo na satan ed panggawa na angkelag ya drone ya mas matipid na enerhiya. Nanduruma so nayarin pangusaran da ed saratan ya drone, singa diad pan-monitor na polusyon ed dagem.

 Antoy nibagam? Kasin say maayos tan mareen ya katitikyab na dandelion et resulta na ebolusyon? Odino walay nandesinyo?