Say diabolical ironclad beetle (Phloeodes diabolicus) et manaayam diad bandad west na North America. Ibabaga na saray researcher ya agnaterak iyan beetle anggano napataan na sakey ya bengatlan manga 39,000 beses ya mas ambelat nen say sikato, anggano nadalanan ni ingen itan na kotse. Panon itan ya nasasarag na sayan beetle?

 Say tagey tan leksab ya parte na anawet ya katat na sayan beetle et nansuldongan ed gilig tan gilig. Say sakey ya klase na impansuldongan et ag-ombigay anggano napitpit kanian naproprotektaan iray organ to ed dalem. Say sakey nin klase na impansuldongan et agmasyadon matalker kanian mas mainomay ya onggalaw-galaw. Say komatlon klase na impansuldongan et paulyanan ton onggalaw so tapew na anawet ya katat na beetle. Lapud nayarin onggalaw-galaw iyan komatlon klase na impansuldongan, sarag na sayan insekto so onseksek ed ubak na kiew tan sarag to met so onamot ed saray sengat-sengat na bato.

 Sakey ni, say impansuldongan diad pegley na anawet ya katat na sayan beetle et walay pigaran kurba-kurba to ya manpeketan ya singa piraso na jigsaw puzzle kanian niyapag-apag so belat. Sarayan kurba-kurba to et walaan na pigaran nantatapewan ya layer ya pinanpepeketan na protina. No napitpit, saray protina to et napilat na angkekelag pero onabig lanlamang kanian nasarag na kurba-kurba to so belat tan ag-itan nauyos.

 Ibabaga na saray researcher ya sarag ya aligen na saray mande-design na saray istruktura ya singa saray luluganan, taytay, tan bilding so anawet ya katat na sayan beetle ya sarasarag toy belat ya ompata ed sikato tan agbasta-basta nabuyak.

 Antoy nibagam? Kasin say anawet ya katat na diabolical ironclad beetle et linmesa lapud ebolusyon? Odino walay nandesinyo?