ЦАЛДӔР азы размӕ Индонезимӕ, гыццыл сакъадах Сангихемӕ, куы ’рцыдаис, уӕд былгӕрон нӕ хотӕй ӕртӕйы федтаис. Уыцы сакъадахыл сӕ адӕм хорз зонынц, уымӕн ӕмӕ адӕмӕн ӕххуыс кӕнынц Библи хуыздӕр бамбарынӕн. Фӕлӕ уӕд хотӕ ӕндӕр цыдӕр арӕзтой.

Фыццаг уал-иу денджызмӕ бацыдысты ӕмӕ-иу былмӕ стыр дуртӕ рахастой. Иуӕй-иу дуртӕ уыдысты футболы пуртийы йас. Стӕй-иу гыццыл хъӕдын бандӕттыл сбадтысты ӕмӕ-иу дзӕбугӕй дуртӕ хойын райдыдтой. Ӕмӕ-иу сӕ афтӕ ныцъцъӕл кодтой, цӕмӕй-иу дуры сӕстытӕ карчы айкӕй къаддӕр уыдаиккой. Уый фӕстӕ-иу сӕ пластик ведраты ныккалдтой, денджызы былӕй-иу сӕ асинты онг бахастой, асинтыл-иу схызтысты ӕмӕ-иу сӕ хӕдзармӕ ахастой. Уым-иу сӕ стыр голджыты ныккалдтой. Стӕй-иу сӕ стыр уӕзласӕн машинӕтӕ фӕндӕгтӕ аразынӕн аластой.

Уыцы хотӕй иу уыди Хульдӕ. Цы ’хцатӕ-иу бакуыста, уыдонӕй йӕ бинонты дардта. Фӕлӕ иуафон фылдӕр рӕстӕг кусын райдыдта, уымӕн ӕмӕ йӕ разы сӕвӕрдта нысан. Йӕ уавӕртӕ йын амыдтой, цӕмӕй иннӕтӕй фылдӕр куыстаид. Хульдӕйы фӕндыд планшет балхӕнын, цӕмӕй йӕм уыдаид приложени JW Library^®. Хульдӕ зыдта, уыцы приложенийы цы видеороликтӕ ӕмӕ ӕрмӕг ис, уыдон ын кӕй баххуыс кӕндзысты арӕхстджындӕрӕй хъусын кӕнынӕн ӕмӕ Библи хуыздӕр ӕмбарынӕн.

Мӕй ӕмӕ ’рдӕг Хульдӕ алы райсом дӕр дыууӕ сахаты фылдӕр куыста. Уыйбӕрц дуртӕ ныссаста, ӕмӕ дзы гыццыл уӕзласӕн машинӕ байдзаг уыдаид. Гъемӕ йӕм ӕппынфӕстаг планшеты фаг ӕхца ӕрӕмбырд.

Хульдӕ загъта: «Дур сӕттын ӕнцон куыст нӕу. Тынг-иу бафӕлладтӕн ӕмӕ-иу мӕ буар иууылдӕр рысти. Фӕлӕ мӕ ног планшет мӕ къухмӕ куы райстон, уӕд мӕ мӕ рыстытӕ уайтагъд айрох сты. Ныр мӕ бон у арӕхстджындӕрӕй хъусын кӕнын, стӕй мын ӕмбырдтӕм цӕттӕ кӕнын дӕр ӕнцондӕр у». Ноджыдӕр ма загъта, планшет ын стыр ӕххуыс кӕй фӕци пандемийӕйы рӕстӕг дӕр, уымӕн ӕмӕ ӕмбырдтӕ видеоконференцийы фӕрцы уагътам. Мах дӕр Хульдӕимӕ тынг цин кӕнӕм, йӕ нысан йӕ къухы кӕй бафтыд, ууыл!