Ndaŵi syejinji Baibulo, jikusamkolanga Yesu kuti ali “Mwanache jwa Mlungu.” (Yohane 1:49) Maloŵe gakuti “Mwanache jwa Mlungu” gakulosya kuti Mlungu ali Mkupanganya kapena Msyene jwa yindu yosope yaumi kupwatikapo Yesujo. (Salimo 36:9; Chiwunukuko 4:11) Baibulo jangasalaga kuti Mlungu ŵaŵeleche mwanache mpela mwayikusaŵela ni ŵanduwe.

 Baibulo jikusasalasoni kuti malayika gali “ŵanache ŵa Mlungu.” (Yobu 1:6, NWT) Jikusasalasoni kuti mundu jwandanda jwali Adamu jwaliji “mwanache jwa Mlungu.” (Luka 3:38) Baibulo jikusamkolanga Yesu kuŵa Mwanache jwa Mlungu jwakunonyelwa. Yili myoyo ligongo lyakuti Yesu ni jwandanda kupanganyidwa pa yakupanganyidwa yosope soni kuti Mlungu ŵampanganyisye jwalakwejo mwangapitila mwa jwine jwalijose.

•  Ana Yesu jwatamaga kwinani mkanapagwe pachilambo chapasi?

•  Ana Yesu jwatendaga chichi mkanayiche pachilambo chapasi?

 Elo. Yesu mkanayiche pachilambo chapasi kukupagwa mpela mundu, jwaliji chakupanganyikwa cha usimu kwinani. Jwalakwe jwatite, “Natulwiche pasi pano kutyochela kwinani.”—Yohane 6:38; 8:23.

 Mlungu mkanapanganye chilichose, mundu jwandanda kupanganyidwa jwaliji Yesu. Ni ligongo lyakwe pakusala ya Yesu, Baibulo jikusati:

•   ‘Jwakutanda kupagwa mwa yakupanganyikwa yosope.’—Akolose 1:15, (Malangano ga Sambano 1992 edition).

•   Jwalakwe ali ‘ndanda ja yosope yaŵapanganyisye Mlungu.’—Chiwunukuko 3:14.

 Maloŵe gakwamba ya mundu “jwele ndanda jakwe jili jakalakala mnope” gasalaga ya Yesu.—Mika 5:2; Mateyu 2:4-6.

 Jwakwete udindo wapenani mnope. Yesu jwasasile ya udindo welewu pajwapopesile kuti, ‘Atati! Sambano anjimbichisye une . . . ni lumbili [uchimbichimbi, NWT] unakwete pinaliji ni wawojo mkanichipanganyidwe chilambochi.’—Yohane 17:5.

 Jwalakwe jwakamuchisyaga Atati ŵakwe pakupanganya yindu yosope. Yesu jwakamulaga masengo yalumo ni Mlungu “mpela m’misili jwakwe.” (Misyungu 8:30) Pakusala ya Yesu, Baibulo jikusati, “Kupitila mwa Jwalakwe Mlungu ŵapanganyisye yindu yosope ya kwinani ni pachilambo pano.”—Akolose 1:16.

 Mlungu ŵamkamulichisye masengo Yesu pakupanganya chilichose. Yakupanganyikwa yeleyi yikupwatikapo malayika nambosoni yindu yatukusayiwona chinga ya kwinani kapena pachilambo chapasi. (Chiwunukuko 5:11) Muŵatendelaga Mlungu pakamula masengo ni Yesu, mpaka tuyilandanye ni yakusatenda mundu jwakwambula mapulani ga nyumba ni mundu jwakusataŵa nyumba. Mundu jwakwambula, akusajambula mujichiwonechela nyumbajo nambo jwakutaŵa nyumba akusakuya yalembile mundu jula.

 Jwalakwe jwaliji mpela Maloŵe. Baibulo jikusasala kuti Yesu mkanaŵe mundu jwaliji, “Maloŵe.” (Yohane 1:1) Yeleyitu yikulosya kuti Mlungu ŵamkamulichisye masengo Mwanache jwakwe pakupeleka utenga soni malangiso ku yakupanganyikwa yine ya usimu.

 Yikuwoneka kuti ndaŵi sine Yesu jwakamulaga masengo mpela Jwakumŵechetela Mlungu. Kombolekasoni kuti Mlungu ŵamkamulichisyaga masengo Yesu mpela Maloŵe pakumsalila Adamu ni Hawa yakutenda mu mgunda wa Edeni. (Genesesi 2:16, 17) Kombolekasoni kuti Yesu pejo ni juŵaliji lilayika lyalyalongolelaga Aisalaeli paŵajendaga m’chipululu. Pandaŵiji jemanjaji ŵasosekwaga kupikanila maloŵe gaŵasalilaga.—Ekisodo 23:20-23. a