Ibaibolo likumanyisya ukuti Yesu “Mwana wa Kyala.” (Yohani 1:49) Amasyu aghakuti, “Mwana wa Kyala” ghikunangisya ukuti Kyala yo Mpeli, Nyibuko ya bumi ukongelelapo ubumi bwa Yesu. (Salimo 36:9; Ubusetuli 4:11) Ibaibolo litikumanyisya ukuti Kyala apapile umwana bo muno abandu bikupapila abana.

 Ibaibolo likubayoba abandumi ukuya “bana ba Kyala.” (Jobu 1:6) Kangi Ibaibolo likuti umundu wakwanda Adamu, ali “mwana wa Kyala.” (Luka 3:38) Panongwa yakuti Yesu kyo kipeliwa kya kwanda iki Kyala apelile mwene, Ibaibolo likunjoba Yesu ukuya mwana wakwanda wa Kyala.

•  Ngimba Yesu alikelepo kumwanya bo akali ukupapiwa pa kisu kyapasi?

•  Ngimba Yesu abombagha isyafiki bo akali ukwisa pa kisu kyapasi?

 Ena. Yesu kyali kipeliwa kya mwambepo kumwanya bo akali ukupapiwa ukuya mundu pa kisu kyapasi. Umwene Yesu ayobile ukuti: “Une nsulwike ukufuma kumwanya.”—Yohani 6:38; 8:23.

 Kyala alimpelile Yesu bo akali akapela kilikyosa. Pakuyoba isya Yesu, Ibaibolo likuti:

•   “Umwene yo . . . wakipanda kufipeliwa fyosa.”—Bakolosi 1:15.

•   Umwene yo “bwandilo bwa fyosa ifi Kyala apelile.”—Ubusetuli 3:14.

 Yesu afwanisye ubusololi ubu “abanduyungu lwake bafumile mbukulu.”—Mika 5:2; Matai 2:4-6.

 Ali nubudindo ubwapamwanya fiyo. Yesu ayobile isya budindo ubu apa iputagha ukuti: “Tata, umbeghe ubukulumba . . . ubu nali nabo nkyeni mmyako bo kikali ukuyako ikisu.”—Yohani 17:5.

 Alintulile Tata wake ukupela ifindu ifingi fyosa. Yesu abombagha pampene imbombo na Tata wake ukuya “mfundiwa wake.” (Isya Mbupingamu 8:30) Pakuyoba isya Yesu, Ibaibolo likuti: “Namanga fyosa fipeleliwe mu mmyake yuyo, ifya kumwanya nifya pasi.”—Bakolosi 1:16.

 Kyala abombile Yesu ukupela ikindu kilikyosa ukongelelapo abandumi, ni findu fyosa ifi tukufiketa nkipeliwa iki. (Ubusetuli 5:11) Kyala na Yesu babombile ifindu bo muno sikuyila pakati pa mundu uyu ikulemba amapulani gha nyumba na uyu ikuyenga. Umundu waluso ikujambula ipulani ya nyumba, uwakuyenga yo uyu ikuyenga inyumba mwakukonga ipulani iyo.

 Umwene ali Isyu. Ibaibolo likuti bo Yesu akali ukuya mundu, ali “Isyu.” (Yohani 1:1) Isi sikunangisya ukuti Kyala antumagha Yesu pakubika indumi nu bulongosi ku bandumi abinake.

 Sikunangisya ukuti Kyala antumagha Yesu ukuti ayobeghe na bandu pa kisu kyapasi. Kyala abaghile ukuti antumagha Yesu uyu ikukoleliwa kangi ukuti Isyu, ukuti abike ubulongosi kwa Adamu na Eva mu ngunda wa Edeni. (Ubwandilo 2:16, 17) Yesu abaghile kangi ukuya wandumi uyu abalongosyagha Abaisraeli mu matengele kangi Abaisraeli babaghile ukuti bapilikilagha amasyu ghake.—Ukusoka 23:20-23. a