E Baibolo ilivule ikakwita e Yesu ukuti “Amwanakwe Leza.” (Yohani 1:49) Izwi lya kuti “Umwanakwe Leza” likalanjizya ukuti e Leza we Kelewula, nanti Intulo ya wumi wonsinye ukusanzyako nu wa kwe Yesu. (Amalumbo 36:9; Ukuwumbulika 4:11) E Baibolo isisambilizya ukuti e Leza walinjipo nu mwana ndi vino cikawa ku wantu.

 E Baibolo ikakwita na wangeli ukuti “ivitumbulwa vya mwi yulu [nanti “awanakwe Leza wacisinka, NWT”].” (Job 1:6) Swinya e Baibolo ikakwita umuntu wa kutalicila e Adamu ukuti, “umwanakwe Leza.” (Luka 3:38) Lelo e Baibolo yikalanda pe Yesu ukuti Amwanakwe Leza wenganye amuno awili wino Yehova welewuzile mukulungatika.

•  Uzye e Yesu walinjipo kwi yulu pano atani ayize mu nsi?

•  Avyani vino Yesu wawonvile pano atani ayize mu nsi?

 Ee. E Yesu walinji acelewulwa ca ku muzimu pano atani akwatilwe mu wuntu munsi. E Yesu nalwakwenye walanzile ukuti: “Nafuma mwi yulu.”—Yohani 6:38; 8:23.

 E Leza watalicizilepo ukwelewula Yesu pano atani ayelewule icili consinye. E Baibolo ikalanda pe Yesu ukuti:

•   “We katote . . . wino wakula walusya ivyelewulwa vyonsi.”—Wakolose 1:15.

•   “Antaliko ya kwe vyonsi vino e Leza welewula.”—Ukuwumbulika 3:14.

 E Yesu waficilisizye uwusesemo wuno walandanga pe wino “iciwanza cakwe chilifumilila ku myaka mikali.”—Mika 5:2; Mateyu 2:4-6.

 Walinji ni cifulo icikulu mwi yulu. E Yesu walandanga pe conye icifulo cino wakweti mwi yulu pano wapefile ukuti: “We Tata! Kanonzi nchindamika . . . ndi vino wanchindamisile pano twalinji swensi pano insi yachilinji ukwelewulwa.”—Yohani 17:5.

 Wawonvile ne Yisi ukwelewula ivintu vino vyasyala. E Yesu walinji ngati we “kapima wa vyakuzenga [nanti e “ciwinda wa mulimo”, NWT],” pano wawombanga ne Yisi. (Imilumbe 8:30) E Baibolo ikalanda pe Yesu ukuti: “Mwakwe weliwenye amuno Leza welewulila ivintu vyonsi mwi yulu na munsi.”—Wakolose 1:16.

 E Leza welewulizile vyonsinye mwe Yesu pakwelewula vyonsinye. Co-o cisanzizyemo ni vyelewulwa vinji ivya ku muzimu vino tusilola na minso yitu akuli ukuti awangeli. Ni yulu ni nsi. (Ukuwumbulika 5:11) Tungakolanya wo-o vino e Yesu wawombelanga ponga ne Leza pa kwelewula ivintu, pa kulemenkana kuno kwawa pe kapanga wa mapulani ne kazenga. E Kapanga wa mapulani, akapanga pulani ye vyo icikulwa cifwile ukuloleka; ne e kazenga akawonvya e pulani pa kuti kuwe icikulwa.

 Walinji we Lizwi. Pa kulanda pe Yesu pano atani ayize munsi e Baibolo yikamwita ukuti “e Lizwi.” (Yohani 1:1) Co-o cikusula ukuti ncepamwi awili wino e Leza wawomvyanga pakunena ivyelewulwa vinji ivya ku muzimu vino akulonda vicite.

 Cikaloleka ukuti e Leza wawonvyanga sana e Yesu nga kuli vimwi vino akulonda ukunena awantu. Swinya afwile wawonvyanga e Yesu pa kupa amasundo kwe Adamu ne Eva mu calo ca Edeni. (Intaliko 2:16, 17) E Yesu afwile awili umungeli wino watunguluzile awina Israeli mu mayonde, swinya lifwile alizwi lya kwe Yesu lino walinji nu kutalika ukwivwila.—Ukufuma 23:20-23. a