Ariñagatu Bíbülia saragu wéiyaasu Hesusu lan “Liraübei Bungiu” (Huan 1:49). Arufudati dimurei “Liráü Bungiu”, Bungiu lan adügübalin sun katei ani ligía lan lubuñabei ibagari, mini lan le, ligía lan giñe adügübalin Hesusu (Sálumu 36:9; Arufudúni 4:11). Mariñaguntu Bíbülia ítara liña lan gasaani lani Bungiu Hesusu kei gasaanigu hamá gürigia.

 Ariñagatu giñe Bíbülia hawagu ánheligu “lirahüñü Bungiu” (Hobu 1:6, Traducción del Nuevo Mundo). Ani watu lun Adán, liráü Bungiu (Lúkasi 3:38). Íbini ítara, Hesusutima Liraübei Bungiu ladüga ligía lan furumiñetibei ladügün Bungiu ani lábugua ladügei.

•  Wínwanti san Hesusu sielu lubaragiñe nasirua lan ubouagu?

•  Ka meha ladügübei Hesusu sielu lubaragiñe liabin ubouagun?

 Anha. Lubaragiñe meha nasirua lan Hesusu kei gürigia, aban meha sífiri ligía sielu. Ligía guánarügü ariñagubei: “Niábiña siélugiñe” (Huan 6:38; 8:23).

 Hesusu ladügübei Bungiu furumiñe. Ariñagatu Bíbülia luagu Hesusu:

•   “Ligía ígiramaübei, le lóugiñebei sun katei le adügǘbei” (Kolosana 1:15).

•   Ligía “ídangiñebei liabin sun katei le ladügübei Bungiu” (Arufudúni 3:14).

 Gúnfuli lumuti giñe Hesusu profesía le ayanuhabei luagu aban le aniheinhalibei lúmagiñe binadu dan, lúmagiñe saragu sígulu guentó (Mikeasi 5:2, Traducción del Nuevo Mundo; Matéu 2:4-6).

 Wéiriguti meha lubara sielu. Luagu ubaraü le layanuha Hesusu dan meha le lafurieidunbei lun Bungiu: “Núguchi, rubei uéiriguni lememe meha nánibei buma lubaragiñe meha ñein lan ubóu” (Huan 17:5).

 Íderagua lumuti Hesusu Lúguchi adügei sun le líbiri katei. Ídehati Hesusu luma Bungiu kei aban “nadagimeinti hemeniti” (Ariñawagúni 8:30, Traducción del Nuevo Mundo). Ariñagatu Bíbülia: “Lídangiñe Kristu ladügei Bungiu sun katei le siélubei luma le ubouagubei” (Kolosana 1:16).

 Yusu lumuti Bungiu Hesusu lun ladügüni sun le líbiri katei, hámagiñe ánheligu darí sun katei le arihíbei (Arufudúni 5:11). Ítara liña lawadigimaridun Heowá luma Hesusu kei lawadigimaridun aban adaaguti pülanu luma aban ábunaguti. Adaaguti pülanu adiburubalin ida tuba lan muna, ánheinti ábunaguti ligía óunwenbudagüdübarun.

 Ligía meha Dimureibei. Dan le tayanuhan Bíbülia luagu Hesusu, lubaragiñebei meha liabin ubouagun, ariñagatu ligía lan “Dimureibei” (Huan 1:1). Mini lan lira, yusu lani meha Heowá Liráü lun lasubudiragüdün ariñahani luma adundehani houn amu ánheligu.

 Genegeti giñe Hesusu lan layusurubei Bungiu lun layanuhan hama gürigia. Másiñati yusu lani Heowá Hesusu, le Dimureibei, lun líchugun adundehani lun Adán tuma Ewa lidan fuluri-agei Edén (Agumesehani 2:16, 17). Másiñati giñe Hesusu lan ánheli le adundehabaliña ísüraelina dan meha le hánhiñuragunbalin fulasu mageirawati, le lunbei gaganbadi hamá ísüraelina lun lumalali (Áfuriduni 23:20-23). a