Refo ya dap ker Yesus i ḇe ’Allah Rumgun Ḇyedi’ ḇaido Roma Ḇyedi. (Yohanes 1:49) Apap ’Allah Rumgun Ḇyedi’ ḇyeḇair snar Allah iso Manḇefrur, ḇaido Knam ro kankenem nakam, ma iso ḇebuk kenem ḇe Yesus i kako. (Mazmur 36:9; Fasasna 4:11) Imbape, Refo ya dakkofen ḇa snar Manseren Allah dakna romawa kpu raris snonggaku koine moḇ kona romawa raya.

 Refo ya dap malaikat sya ḇe ”Allah roma Ḇyesi”. (Ayub 1:6) Ma dap snonggaku ḇerandak, Adam i, ḇe Allah roma Ḇyedi. (Lukas 3:38) Fama, Yesus iso Manseren Allah fararur ḇepon kaku Ḇyediri ma manggundi iso Manseren Allah ifrur ḇeri, inja Refo ya dap Yesus i ḇe Allah Roma Ḇyedi ḇefandun syadi.

•  Manseren Yesus ikenem ro nanggi ḇepon kwar insape ryama ḇe supswan ine ke?

•  Rosai Manseren Yesus ifrur kaku fafisu ryama ḇe supswan ine ḇaim?

 Imbo. Fafisu Yesus ryama ikenem ro supswan ine ḇe snonggaku ḇaim, ima ikenem ḇepon kwar ro nanggi ḇe kenem rur. Yesus manggundi doḇe, ”Snar ayai ḇesabu kwar ro boiyaswa.”​—Yohanes 6:38; 8:23.

 Manseren Allah ifrur Yesus i ḇepon insape ifrur roi ḇese. Refo ya dap Yesus i radine:

•   ”I ḇepon ro roi ḇeḇor ḇefrur kwarna.”​—Kolose 1:15.

•   Iso ”knam ḇedafdif roi ḇeḇor kam Allah ifrurna”.​—Fasasna 3:14.

 Wos ḇardadi oso doḇe Yesus ima ”isya kwar ro awar madero, ro fyoro kaku kwar”.​—Mikha 5:2; Matius 2:4-6.

 Nya kankain ḇekaki ro nanggi. Fafisu Yesus ḇyenadi anya, dap kankain ḇyanine radine, ”O Mami, buk baba ḇe aya . . . kuker baba yasma ro ḇarpon bedi rofyor supswan ine isya ḇaim.”​—Yohanes 17:5.

 Ifnoḇek Kmari fa sufrur roi ḇesena. Yesus fyararur kayam fnoḇek Manseren Allah ”ḇe manfararur ḇekir”. (Amsal 8:30) Refo ya fyawar Yesus i radine, ”Snar kuker i, Allah ifrur kwar roi ḇeḇor kam, ro boiyaswa ma ro supnane.”​—Kolose 1:16.

 Roro Yesus i, Manseren Allah ifrur roi ḇesena kam, malaikat ma farsyos sansoren ine kako. (Fasasna 5:11) Manseren Allah ma Yesus sufararur kayam raris snon ḇefawinanem warpu snonggaku ḇekir ḇefrur rum. Ḇefawinanem ani fyasnai fararur anya, ma snonggaku ḇekir ani iso ḇeḇawes rum anya imnis ḇefawinanem ani roi fyasnai kwar na.

 Duffarmyan ḇe Wos. Refo ya doḇe fafisu Yesus ikenem ro supswan ine ḇe snonggaku ḇaime, sap i ḇe ”Wos”. (Yohanes 1:1) Rya kofawi kaku, ine ḇyeḇair Manseren Allah kyur Roma Ḇyedine fa ikofenḇair pyan angginem ma byuk akurfasnai faro malaikat ḇesesya.

 Yesus iso ḇeyawos pyan Allah angginem Ḇyena faro snonggaku ḇekenem ro supswan ine. Rya Manseren Allah kyur Yesus i fa iso ḇebuk akurfasnai faro Adam ma Eva su ro Yaf Eden ani. (Kejadian 2:16, 17) Imbude, malaikat ḇefarkin er Israel ḇembran ro sup ḇesyor ro fyor naiwara iso Yesus iri, ma Yesus mgarem ḇyeja iso fandun fa sisouser na.​—Keluaran 23:20-23. a