Hop wichi toj yen lhometa Heowa, olhamel olhaikhajyenej toj owoye cristianos lakeyis toj Jesús yen p’ante lechufwenyaja wet toj apóstoles iwoye p’ante.

1.   Dios. Olhamel on’okwiyej weihalha Dios toj matche, N’owujtaj wet Elh toj lhenek nilhokej m’ayhay. Lhey hope Heowa (Salmo 83:18, TNM; Apocalipsis 4:11). Lham hope Abraham, Moisés wet Jesús laka Dios (Éxodo 3:6; 32:11; Juan 20:17).

2.   Biblia. Olhamel ot’ekhaye toj hope Dios silotyaj toj ifwenho nilhokej wichi (Juan 17:17; 2 Timoteo 3:16). M’ak toj olhamel ot’ekhaye talho t’at 66 libros toj ihi Biblia, toj ihi Nuevo wet Antiguo Testamento. Hop profesor Jason BeDuhn yome tajtso lewhay toj ilesayen m’ak toj yomeje hop wichi toj yen lhometa Heowa, toj lhamel «t’ekhahyaj talho t’at Biblia wet iwoye m’ayhay toj ihi, iwohit’a iyhaja m’ayhay toj ihi wet weihalhapej lhamel t’ekhahyajay y’aje m’ayhay toj ihi Dios Lhomtes». a

    Olhamel otchumla nilhokej m’ayhay toj ihi Biblia. Mat lewhay che olhamel ot’uhlak otafwelche, ohanej t’at toj iche lhipey toj yome m’ayhay toj matche iche p’ante wok ihichela, wet iyhaj lhipey ichumyenlhi n’otech’ayhnhay.

3.   Jesús. Olhamel ohanlhi Jesús lechufwenyajay wet m’ak toj iwoye p’ante, wet olhamel owujyen hop toj hope olhamel ofwayhthi wet Dios Lhos (Mateo 20:28; Apóstoles Lhenhay 5:31). Tajtso in’alit toj ohopehen cristianos (Apóstoles Lhenhay 11:26). Mat, Biblia lechufwenyajit’a che Jesús hope Dios toj lajit letumfwaya, hate yomhiyet’a n’ochufwenyaj toj hope Trinidad (Juan 14:28).

4.   Dios Niyatyaj. Hope n’oniyatyaj toj ihi pele; hopkhit’a m’ak toj ihi cristianos lehusey. Tiyajohla lew’et nilhokej n’oniyatyajay toj i’pe honhatna wet yamla matche m’ak toj Dios lenech’ethayaj toj t’up’antehlak itiyej Honhat (Daniel 2:44; Mateo 6:9, 10). Atofwiyet’a che n’al tajtso, hop toj profecías toj ihi Biblia in’alit toj n’ehi t’at ifwalas toj lepes (2 Timoteo 3:1-5; Mateo 24:3-14).

    Jesús hope niyat toj ihi Dios Leniyatyaj toj ihi pele. Iwo p’ante tesa toj iwo leniyatyaja toj nekchom 1914 (Apocalipsis 11:15).

5.   N’ofwayhyaj. Isej toj Jesús lhayen lahaya’pe, wichi iwoyek nemhit hope n’och’isukyaj wet n’ot’ilek kwenkay (Mateo 20:28; Apóstoles Lhenhay 4:12). Hopkhilak n’oelh isej tajtso, is che t’ekhaye Jesús, iwo elha m’ak toj ihi wet lhaiwo bautisaya (Mateo 28:19, 20; Juan 3:16; Apóstoles Lhenhay 3:19, 20). M’ak toj n’oelh iwoye, in’alit che matche toj t’ekhahyaj ihi (Santiago 2:24, 26). Mat, n’ofwayhyaj hopkhit’a m’ak toj n’oelh ikalhi isej m’ak toj iwoye, hope m’ak toj iwoyek n’okalhi isej t’at «Dios lepʼaltsenyaj» (Gálatas 2:16, 21).

6.   Pele. Heowa, Jesús wet ángeles toj t’ifwtintses ihi t’at pele (Salmo 103:19-21; Apóstoles Lhenhay 7:55). b Wujit’a’pe wichi toj ihihla pele, 144.000, hopkhilak iwo leniyatyaja lhay’e Jesús toj ihi Dios Niyatyaj (Daniel 7:27; 2 Timoteo 2:12; Apocalipsis 5:9, 10; 14:1, 3).

7.   Honhat. Dios yenlhi p’ante honhat hopkhilak wichi ihi yamlek tiyaj’attsiy (Salmo 104:5; 115:16; Eclesiastés 1:4). Lham ikopfwahiyejela wichi toj ch’ahunhas toj nemhit t’inhayaj ihihla wet iwohiyela che ilayhiche yamlek tiyaj’attsiy toj ihi honhat toj w’atshan wet isilataj (Salmo 37:11, 34).

8.   N’ofwitseyaj wet n’otelaythayaj. Biblia ikalelhat toj iche p’ante ángel toj tatayla Dios. Toj malhyejtso iwo tesa toj iche n’ofwitseyaj wet n’otelaythayaj (Juan 8:44). Angelna, toj tafwaytshi toj tatayla Dios nech’e n’oyen lheya Ahottaj wet Satanás, ikalhi toj Adán wet Eva lhaitatche lham. Tajtso tamenej toj leles ihi m’ak toj ni’isa (Génesis 3:1-6; Romanos 5:12). Hopkhilak Dios iwo iyhaja nilhokej n’owit’ayhyajay toj Satanás toj tamenej toj iche, inuhit’ahla toj iche t’at n’ofwitseyaj wet n’otelaythayaj lhimpaj lewhay, mat inuhlahla che kamaj iche yamlek tiyaj’attsiy.

9.   N’ot’ilek. Lewhay toj n’oelh y’il, noj toj iche (Salmo 146:4; Eclesiastés 9:5, 10). N’op’itseyhay ihihit’a letelaythayaj toj ihi itaj.

    Wujpey wichi toj y’inhen p’ante, yachajohla toj ilayhiche che Dios inuhatchepha (Apóstoles Lhenhay 24:15). Mat, wichi toj n’olayhtichehla wet tachumhit’ahla Dios laka leyes, n’otayhtenla yamlek tiyaj’attsiy wet ihichet’ala lewhay che yachajo toj ilayhi (Apocalipsis 20:14, 15).

10.   N’ow’et lheley. Toj wichi tawhayeyhen, is che hope atsinha wet hin’u, malhyej toj Dios lenech’ethayaj toj ichun. Wet tajlhamet che n’oelh iwoyek ileyej lech’efwa che iwo lakain’oyaja (Mateo 19:4-9). Kalelhaj n’ohohen toj Biblia lefwonyajay iwoyek olhamel oisej wet tach’ote wichi toj lekajyaj ihi lew’et lheley (Efesios 5:22–6:1).

11.   Olhamel on’okhayaj. Olhamel on’okwihiyejt’a cruz wok n’opeykas at che hope (Deuteronomio 4:15-19; 1 Juan 5:21). Iyhaj m’ayhay toj olhamel owoye toj on’okwiyej Dios hope tahesna:

    •   Olhamel owo t’alhyajaye Dios (Filipenses 4:6).

    •   Olhamel oyahyen wet olhaichufwenej Biblia (Salmo 1:1-3).

    •   Olhamel otichunejlhi m’ak toj olhaichufwenej toj ihi Biblia (Salmo 77:12).

    •   Olhamel olhaihutwek hopkhilak owo t’alhyaja, olhaichufwenej Biblia, ochoywetha, olhamel oyome ot’ekhahyaj wet okajyen oiyhaj (Colosenses 3:16; Hebreos 10:23-25).

    •   Olhamel owo silota’pe wichi «häp Nʼosilätyaj tä Isna tä yäme Dios Niyatyaj» (Mateo 24:14).

    •   Olhamel och’ote wichi iyhaj toj matche toj p’alitses (Santiago 2:14-17).

    •   Olhamel oyenlhi wet ot’uye hop wichi toj yen lhometa Heowa lew’etes wet iyhaj hupuy toj n’ochumyenejlhi olhamel ochumet toj i’pe nilhok honhat toj n’ochufwenej wichi Biblia (Salmo 127:1).

    •   Olhamel och’ote iyhaj wichi toj ihi lewit’ay (Apóstoles Lhenhay 11:27-30).

12.   Olhamel oka wichi toj kalelhajcha. Olhamel okalelhajcha toj oihi congregaciones. Weihalhapej congregación iche iyhaj wichi toj lhaitumtej toj t’uye, toj n’oyen lheya hin’ul toj t’uyehen lepunfwas, toj hopkhit’a wichi toj n’ochufwenyajwos che inu’pe iyhaj, n’ow’enhihot’a chinaj t’oj wok lakaha (Mateo 10:8; 23:8). Olhamel ot’alhiyet’a chinaj t’oj wichi wok oyenlhi diezmo (2 Corintios 9:7). Olhamel ochumet isej chinaj t’oj toj talhe wichi toj ithatcho wet hate talhe iyhaj toj n’ohanhiyejt’a lheyis.

     Iche Hin’ul toj wujit’a’pe toj itetshan nilhokej congregaciones, lhamel ihi Betel toj lhamya hopkhilak itetshan nilhok wichi toj yen lhometa Heowa lechumet (Mateo 24:45).

13.   Toj olhamel olhahip’ajtitwek. Olhamel ot’ekhahyaj hate t’at iwoye oiyhaj, lhip at che hope toj olhamel oihi (1 Corintios 1:10). Olhamel olhaikhajyenej hopkhilak ihichet’a m’ak che iw’enhat n’ohen, tej toj p’alitses, hiw’en m’ak, w’enhahiche lhomtes wet tej toj talho lhip elh honhat (Apóstoles Lhenhay 10:34, 35; Santiago 2:4). Tej toj malhyejtso, inuhit’ahla che weihalhapej olhamel itsupyene m’ak toj iwohiyela ichumyenlhi letichunhayaj toj Biblia ichufwen (Romanos 14:1-4; Hebreos 5:14).

14.   Olhamel okeyis. Olhamel olhaikhajyen toj on’alit ohumnhayaj toj matche nilhok lewhay (Juan 13:34, 35). Ot’ukwe len’ayij che owohiyet’a m’ak at che hope hopkhilak iwakyhayen Dios. Hop toj tamenej toj olhamel ochumyenhiyejlhit’a m’ak che ni’isa w’oyis. Tajtso hip’akej toj olhamel ochumhit’ahla toj n’otat n’ohohen w’oyis (Apóstoles Lhenhay 15:28, 29; Gálatas 5:19-21). Ohapehen wichi toj t’ukwe n’otamsek wet olhamel olhay’uytihot’a n’oka’tsayajay (Mateo 5:9; Isaías 2:4). Olhamel oyenhit’a w’et m’ayeka niyatey wet owoye t’at laka leyes che tatayhit’ahla Dios laka leyes (Mateo 22:21; Apóstoles Lhenhay 5:29).

15.   Olhamel oise oiyhaj. Jesús yop’antek: «Humin aelh, techʼayen amej tä alehumin». Hate yome p’ante toj Dios lakawos «häpkhihentʼa honhat leles» (Mateo 22:39; Juan 17:16). Toj malhyejtso olhamel olhaikhajyenej toj owoyeje m’ak toj is nilhokej wichi, tej toj olhamel olhay’uythihot’a m’ayhay toj políticos iwoye wet olhamel olhahip’ajthiyejt’a religiones iyhaj (Gálatas 6:10; 2 Corintios 6:14). Mat, olhamel oyenhit’a w’et m’ayeka m’ayhay toj iwoye iyhaj wichi che itsupyene toj lhay’uyhtho tahestso (Romanos 14:12).

 Che lew’en iyhaj n’oy’atshanhay toj yiwtejla m’ak toj t’ekhaye wichi toj yen lhometa Heowa, iche m’ak toj iwoyek leyahyen toj ihi olhamel oka sitio toj ihi internet. Hate iwoyek lelesayen amtes hopkhilak letate olhamel oka oficinas, lehoye elh olhamel oka reuniones toj ihi wichi toj yen lhometa Heowa lew’et elh toj atofwiyet’ahla haw’et, wok letay’atshane elh olhamel toj ihi lhip toj lhehi.