Calu watie Jumulembe pa Yehova, wabeii nilubo kit yiyoyic mi Jukristu ma Yesu uponjo man ma julub pare de gigam gilubo. Thiwiwec maeni ukoro i adundo gin ma yiyoyic mwa ucungo i wiye.

1.   Mungu. Waworo Mungu acel kende mandha ma Jategokpo man ma jacwic mwa ma nyinge Yehova. (Zaburi 83:18; Lembanyutha 4:11) Etie Mungu ma Abraham, Musa, man Yesu de giworo.​—Ai 3:6; 32:11; Yohana 20:17.

2.   Biblia. Wayiyo nia Biblia utie wec ma Mungu yuyo i wiye pi dhanu. (Yohana 17:17; 2 Timoteo 3:16) Yiyoyic mwa ujengere iwi buku 66 mi Biblia, m’uketh’i iye “Lembariba ma Con” ku “Lembariba ma Nyen.” Profeser Jason D. BeDuhn ukoro kamaleng’ kinde m’ebino kiewo pi Jumulembe pa Yehova nia “gigiero ukungu mi yiyoyic man timo migi iwi gin ma Biblia ubeyero andha andha m’umbe nilar thungo nia ecopo yero kumae.” *

    Kadok wayiyo Biblia en zoo de, re kinde ma wabetimo kero ninyang’ i iye, wanwang’u nia thengene moko ukoro lembe m’udaru timere kunoke ma bitimere man theng Bibliane mange ke uweco i ayi mi lapor kunoke ku lembabola pi ninyutho lembe mange.​—Lembanyutha 1:1.

3.   Yesu. Wabelubo ponji man lapor pa Yesu Kristu, bende wawore de kum etie Jalar mwa, man wod Mungu. (Matayo 20:28; Tic mi Jukwenda 5:31) Pieno, watie Jukristu. (Tic mi Jukwenda 11:26) Kadok kumeno de, waponjo niai kud i Biblia nia Yesu utie ngo Mungu ma Jategokpo man i giragora lembe moko mir ukungu acel de mbe ma Ponji mi trinita ucungo i wiye.​—Yohana 14:28.

4.   Ker pa Mungu. Etie bimobim mandha mi polo, ento ungo kite ma Jukristu giwinjiri ko niai kud i adundegi. Ebikabu ker ceke mi dhanu man ebipong’o lembakeca pa Mungu iwi ng’om. (Daniel 2:44; Matayo 6:9, 10) I nindo ma ceng’ini eni, Ker pa Mungu bitimo lembe maeno, kum lembila mi Biblia ubenyutho nia wabekwo “i kajik ceng’.”​—2 Timoteo 3:1-5; Matayo 24:3-14.

    Yesu re ma tie Ubimo mi Ker pa Mungu i polo. Ecaku bimo niai 1914.​—Lembanyutha 11:15.

5.   Both. Nikadhu kud i jamgony ma Yesu uthiero, wanwang’u war niai kud i dubo man tho. (Matayo 20:28; Tic mi Jukwenda 4:12) Pi ninwang’u bero i kum lam maeno, dhanu gicikiri ngo nibedo ku yiyoyic i Yesu kende, ento ukwayu bende gilok kit kura kwo migi man gilim batizo. (Matayo 28:19, 20; Yohana 3:16; Tic mi Jukwenda 3:19, 20) Tic pa ng’atini re ma nyutho nia etie ku yiyoyic ma kwo. (Yakobo 2:24, 26) Kadok kumeno de, junwang’u ngo both nikum gin ma ng’atini utimo, ento nikum “bero ma yawe mbe pa Mungu.”​—Jugalatia 2:16, 21.

6.   Polo. Yehova Mungu, Yesu Kristu man jumalaika ma gigwoko bedoleng’ migi gibedo i kabedo mi tipo. * (Zaburi 103:19-21; Tic mi Jukwenda 7:55) Dhanu moko ma wendgi nyanok niwacu dhanu 144 000 gibicer pi kwo mi polo kara gibim ku Yesu iwi Ker.​—Daniel 7:27; 2 Timoteo 2:12; Lembanyutha 5:9, 10; 14:1, 3.

7.   Ng’om. Mungu ucwiyo ng’om ni kabedo mi dhanu pi nja. (Zaburi 104:5; 115:16; Eklizia 1:4) Mungu bimiyo ni dhanu m’uwore leng’kum ma ber man kwo ma rondo ku rondo i ng’om ma bidoko ni paradizo.​—Zaburi 37:11, 34.

8.   Masendi man lembe ma rac. Lembuno ucaku niai m’acel m’i kind jumalaika pa Mungu ugam ujai. (Yohana 8:44) Malaika maeno ma ing’eye judog julwong’e “Sitani” man “Wonabali,” re m’uwingo wi Adamu giku Eva kara gidikiri kude i jai pare man lembene kelo adwogi ma rac ni nyikwaygi zoo. (Thangambere 3:1-6; Jurumi 5:12) Pi niyiko lembe mi jai maeno ma Sitani unyayu, Mungu uweko kaka ni masendi man ni lembe ma rac; re ebiweko ngo lembene umedere pi nja ku nja.

9.   Tho. Dhanu kan utho gibedo nuti kendo ngo. (Zaburi 146:4; Eklizia 9:5, 10) Gisendiri ngo i mac ma kuthum.

    Milioni dupa mi dhanu ma githo, Mungu bicerogi. (Tic mi Jukwenda 24:15) Kadok kumeno de, ju ma gibikwero nikwo ku cik pa Mungu i ng’ey cer migi; jubinyothogi mi nja ma gibibedo mbe ku genogen mi cer kendo.​—Lembanyutha 20:14, 15.

10.   Juruot. Waworo cik mir ukungu ma Mungu uketho niai i acaki pi gamiri, niwacu dikiri i kind nico acel ku dhaku acel, ma ndhu gamirine lal ke pi lemsasa mi tarwang’ kende. (Matayo 19:4-9) Wayiyo nia rieko mi Biblia konyo juruot nikwo ma ber.​—Juefeso 5:22–6:1.

11.   Gin ma watimo pi niworo Mungu. Waworo ngo musalaba kunoke ayi gin m’acwiya moko ci. (Poi mi Cik 4:15-19; 1 Yohana 5:21) Lembe ma pigi tek ma watimo pi niworo Mungu, uketh’i iye lembe ma e:

    •   Warwo i bang’ Mungu.​—Jufilipi 4:6.

    •   Wasomo man waponjo Biblia.​—Zaburi 1:1-3.

    •   Wanyamu i lembe iwi gin ma waponjo i Biblia.​—Zaburi 77:12.

    •   Wacokara karacelo pi nirwo, niponjo Biblia, niwer, nituco pi yiyoyic mwa, nitielo cwiny juyic wadwa man jumange de.​—Jukolosai 3:16; Juebrania 10:23-25.

    •   Warweyo “lembanyong’a mi Ker.”​—Matayo 24:14.

    •   Wakonyo ju ma gitie ku yeny mi kony.​—Yakobo 2:14-17.

    •   Wagiero man wayiko udi Ker ku kabedo mange ma konyo pi tic mi ponjo Biblia i ng’om zoo.​—Zaburi 127:1.

    •   Wadikara i miyo kony i saa mi peko ma wok rek.​—Tic mi Jukwenda 11:27-30.

12.   Dilo mwa. Watie i cokiri ma tung’ tung’, m’acel acel m’i kindgi guriri mi judong cokiri re ma neno wiye. Kadok kumeno de, judong cokirine gitie ngo jutela man juculogi ngo acula. (Matayo 10:8; 23:8) I coko mwa, wajoko ngo apaje man wacoko ngo sadaka. (2 Jukorintho 9:7) Tic mwa zoo ujengere iwi giramiya ma kuberocwiny.

     Guriri m’utelowic, niwacu ungu moko ma nyanok mir umego ma giteng’ini i thenge mi tipo; re ma gimiyo telowic ni Jumulembe pa Yehova mi wang’ ng’om zoo niai kud i kabedo mwa ma dit.​—Matayo 24:45.

13.   Bedo i acel mwa. Yiyoyic mwa udikowa i acel. (1 Jukorintho 1:10) Bende, watimo kero niuro akoyakoya mi thek, suru, dendkum kunoke akoyakoya m’i kit dhanu. (Tic mi Jukwenda 10:34, 35; Yakobo 2:4) Bedo i acel mwa ne cero ngo ng’atini ku ng’iyong’ic pare gire. Kubang’ Jamulembeman maku yub m’urombo ku pidocwiny pare ma Biblia uponjo.​—Jurumi 14:1-4; Juebrania 5:14.

14.   Kura timo mwa. Waii ninyutho mer ma ku berocwiny i kindwa i lembe ceke ma wabetimo. (Yohana 13:34, 35) Wauro timo ma rac ma foyo ngo i Mungu, m’uketh’i iye rimo ma juciko i kumjo. (Tic mi Jukwenda 15:28, 29; Jugalatia 5:19-21) Wamaru ketho kwiyocwiny i kindwa man wadikara ngo i lemlwiny. (Matayo 5:9; Isaya 2:4) Waworo gavmenti mi kabedo ma wabekwo i iye, waworo bende cik mi ng’ombe tekene fodi cikne ukwayuwa ngo nia watur ma pa Mungu.​—Matayo 22:21; Tic mi Jukwenda 5:29.

15.   Winjiri mwa ku dhanu mange. Yesu ung’olo kumae: “Icikiri nimaru wedu calu in giri.” Bende, eyero nia Jukristu “gitie ngo mi ng’om.” (Matayo 22:39; Yohana 17:16) Pieno, waii nitimo “bero ni dhanu ceke,” ento wabedo ngo nyanok de i theng lemgamba ker moko man wauro nidikara ku dini mange. (Jugalatia 6:10; 2 Jukorintho 6:14) Kadok kumeno de, waworo ng’iyong’ic mi jumange ma gitimo iwi lembe ma kumeno.​—Jurumi 14:12.

 Kan itie ku penji mange iwi yiyoyic mi Jumulembe pa Yehova, icopo nisomo lembe lee i wiwa i kusika mwa mir Internet, lwong’ biro mwa moko acel, cidhi i coko i Ot Ker ma ceng’ini kudi kunoke wec ku Jamulembe moko acel ma kago kudi.