Mannu baalunkura uminsa suˈmi noonsa. Maganohono umisi suˈmi heeˈrisiro gara dilawannohe? Mimmitu ledo jaalooˈmineemmo gede kaaˈlinonkeri giddo mittu, baalunku suˈmu noonkere ikkankeeti. Maganu ledo jaalooˈmateno suˈmasi afanna woshsha hasiissannota diˈˈikkitino?

 Qullaawu Maxaafi giddo Maganu, “Suˈmiˈya Kaaliiqaati [“Yihowaati,” NW]” yiino. (Isayaasi 42:8) Maganu addi addihu maaragete (woy suusu) suˈmi noosiha ikkirono, lawishshaho, ‘Woˈmanka Dandaanno Magano,’ “Woˈmunkura Aliidi Mooticha” hattono ‘Kalaqaancho’ yaamamannoha ikkirono, soqqamaasinesi suˈmisinni woshshitannosi gede koyisino; tini ninkera lowo ayirrinyeeti.—Kalaqama 17:1; Soqqamaasinete Looso 4:24; 1 Pheexiroosi 4:19.

 Batinye Qullaawu Maxaafi tiro giddo Fulo 6:3 aana Maganu suˈmi no. Kuni qummeeshshi togo yaanno: “Woˈmanka Dandeemmo Magano ikkaˈyanni Abirihaamira, Yisihaaqiranna Yaiqoobira leelloommo; ‘Kaaliiqa’ [“Yaahiwe,” lekkaalliidi qaagiishsha] yinannihunni qullaawu suˈmiˈyanni kayinni dileelloommonsa.”

 Maganu suˈma Yihowa yee woshsha lowo diro rosantinote. Batinyu egennaammi “Yahiwe” yaa doodhiturono, roore rosantinoti kayinni Yihowa (Ingilizete Afiinni, Jehova) yee woshshate. Umiha Qullaawu Maxaafi gafa borreessinoonnihu Ingilizete Afiinni ikkikkinni Ibiraawootu Afiinniiti; Ibiraawootu Afoo borreessinannihu qiniitinni gurara qolleeti. Konni afiinni Maganu suˈma יהוה yinannite shoole coyishiishamaanonni borreessinanni. Tetiragiraamateni yinannita tenne Ibiraawootu fidalla YHWH yine nabbambanni.