Bääny ë Nhialic aye akuma ë yic ku ee Yekoba Nhialic yen ë looi yen. ‘Bääny ë Nhialic’ aye cɔɔl ‘bääny de paannhial’ aya ë Baibolic ë wɛ̈t kuum yen paannhial. (Mak 1:14, 15; Mathayo 4:17) Athöŋ ke akumat ke mɛnh ë raan, ku yen, aa wɛ̈ɛ̈r keek ë këriëëc yeke looi ëbɛ̈n yic.

•   Bäny kuum. Nhialic acï Yecu Kërtho kuany këye bɛ̈ny ë bäänyde yic ku acï gäm riɛldïït wär riɛl tɔ̈u ke akumat ke mɛnh ë raan. (Mathayo 28:18) Yecu ee riɛlde luɔ̈ɔ̈i bïï yen këpiɛth looi, ku aacï nyuɔɔth wään aya nɔn ye yen raan lëu bï ŋɔ̈ɔ̈th ku ye bɛ̈ny ë puɔ̈u käc awu ë nyin kuany ë kɔc. (Mathayo 4:23; Mak 1:40, 41; 6:31-34; Luk 7:11-17) Keye Nhialic yen lëk e yen, Yecu acï kɔc kuany ë bɛ̈ɛ̈i yiic kedhie bïk ya “meliik ku bäny bï [pinynɔm kuum ëbɛ̈n] ” ke yen ëtök paannhial.—Nyuuth 5:9, 10.

•   Dhaman bïï yen kuum. Kë cïï thöŋ kek akumat ke mɛnh ë raan wën ye bɛ̈n ku jiëlkë, Bääny ë Nhialic “Acïï bï [kɔŋ] tiaam.”— Danyel 2:44.

•   Kɔc kuum keek. Raan ye kë wïc Nhialic looi yen abï lɔ ë Bääny ë Nhialic yic, ku acïï kɔc bï ya tek thook.—Luɔi de Tuuc 10:34, 35

•   Lööŋ. Bääny ë Nhialic anɔŋ lööŋ cï ke tääu piny bïï yen kɔc mɛc keek ya gël bïk cïï lui ë kärɛc. Ayekë kɔc kuɔny bïk ciɛɛŋden cɔ̈kpiny bï piath. Cït man, aye Baibol lueel: ‘“Nhiaar Bɛ̈nydït [Yekoba] Nhialicdu në piɔ̈ndu ëbɛ̈n, ku në wëiku ëbɛ̈n, ku në nɔmdu ëbɛ̈n. Cöök tueŋ ka, cöök dïït ë löŋ. Ku kë lɔ ë yecök acït en an, ‘Nhiaar raan rɛ̈ɛ̈r ke yïn cït man nhiɛɛr yïn rɔt.’” (Mathayo 22:37-39) Nhiëër ë Nhialic ku nhiëër ë raan däŋ aye kɔc bï lɔ ë bäänyde yic cɔl aloi këpiɛɛth nhiɛɛr kɔc kɔ̈k.

•   Piööc. Acɔk anɔn ye Bääny ë Nhialic lööŋ thiekiic tääu piny bïï yen ke kɔc kuum keek gël, yen aya, ee kɔc kuum keek piɔ̈ɔ̈c ye këdï lëu bïï keek lööŋke theek.—Yithaya 48:17, 18

•   Kë Bï Looi. Bääny ë Nhialic acïï bänyke bï cɔl akueth ë wëu yekë yök tënë kɔc kuum keek. Ku yen, abï kë wïc Nhialic thöl ë luɔi, agut cï thön ë pïïr athɛɛr ë paraditho yic ë pinynɔm ɣɔn cïï Nhialic thɔ̈n kɔc nhiaar en.—Yithaya 35:1, 5, 6; Mathayo 6:10; Nyuuth 21:1-4.