Ekibi n’ekikorwa kyona, enyehurira, nari ekiteekateeko ekirikuhakanisa emitindo ya Ruhanga. Nikitwariramu okuhenda ebiragiro bya Ruhanga orikukora ekigwire nari ekitahikire omu maisho ge. (1 Yohaana 3:4; 5:17) Baibuli neegamba aha kibi ky’okwanga kukora eki orikumanya ngu kihikire.—Yakobo 4:17.

 Ekigambo ekibi omu ndimi ezi Baibuli yaabandize kuhandiikwamu nikimanyisa “okuremwa kuteeba akamanyiso,” nari okuremwa kuteeba eki ogyendereire. Nk’eky’okureeberaho, abaserukare abamwe omu Israeli ira bakaba nibamanya kukoresa gye enjungu batarikubaasa kuteeba aha rubaju. Ekigambo ekyo kyavunuurwa nk’oku kiri nikimanyisa ngu bakaba batarikubaasa kushiisha. (Abaramuzi 20:16) N’ahabw’ekyo, okukora ekibi n’okuremwa kuteeba akamanyiso k’emitindo ya Ruhanga ehikiriire.

 Ruhanga ahikire kuteeraho abantu emitindo ahakuba n’Omuhangi. (Okushuuruurwa 4:11) Nitujunaanwa ahariwe ahabw’ebi turikukora.—Abarooma 14:12.

Mbwenu shi nikibaasika kwetantarira kimwe ekibi?

 Ngaaha. Baibuli neegira ngu “boona bakashiisha, kandi tibarikuhika aha kitiinisa kya Ruhanga.” (Abarooma 3:23; 1 Abagabe 8:46; Omubuurizi 7:20; 1 Yohaana 1:8) Ahabw’enki?

 Abantu b’okubanza, Adamu na Haawa, bakaba bataine kibi. N’ahakuba bakahangwa bahikiriire omu kishushani kya Ruhanga. (Okutandika 1:27) Kwonka ahabw’okugomera Ruhanga, bakafeerwa okuhikiirira kwabo. (Okutandika 3:5, 6, 17-19) Kandi abaana abu baazaire, bakahungura obutahikiirira bwabo. (Abarooma 5:12) Kiri nk’oku omugabe Daudi yaagizire ngu, “nkahangirwa omu kutahikiriira.”—Zaaburi 51:5.

Ebibi shi nibikirakirana?

  Eego. N’eky’okureeberaho, Baibuli neegira ngu abantu ba Sodoma bakaba bari ‘abanyabibi, barikucumura munonga’ kandi ekibi kyabo kikaba ‘kihinguraine munonga.’ (Okutandika 13:13; 18:20) Yetegyereze ebintu bishatu ebirikurugiiriraho kumanya obuhango bw’ekibi.

1.   Omuringo gwakyo. Baibuli neeturabura kwetantara ebibi by’amaani nk’obushambani, okuramya ebishushani, okwiba, obusinzi, obunyagi, okwita, n’obufumu. (1 Abakorinso 6:9-11; Okushuuruurwa 21:8) Baibuli neeyoreka entaaniso y’ebibi nk’ebyo n’ebindi ebirikubaho omuntu atabandize kuteekateeka, nari atakigyendereire, nk’ebigambo n’ebikorwa ebirikugwisa kubi abandi. (Enfumu 12:18; Abaefeso 4:31, 32) Kwonka Baibuli neetwehanangiriza okuteehuzya ekibi kyona, obu kirikubaasa kuruga okuhenda ebiragiro bya Ruhanga.—Matayo 5:27, 28.

2.   Ekigyendererwa. Obumwe ekibi nikibaasa kukorwa ahabw’obutamanya eki Ruhanga arikutwenza. (Ebyakozirwe 17:30; 1 Timoseo 1:13) N’obu Baibuli eraabe etarikushwekyerera ebibi nk’ebyo, neeyoreka entaaniso y’ebibi ebirikukorwa nkana kuhenda ebiragiro bya ruhanga. (Okubara 15:30, 31) Ebibi ebirikukorwa nkana nibyetwa “ebibi by’omu mutima.”—Yeremia 16:12.

3.   Emirundi ei kikozirwe. Baibuli neeyoreka entaaniso y’ekibi ekirikubaho rimwe n’ekyo ekirikuguma nikikorwa kumara obwire buraingwa. (1 Yohaana 3:4-8) Abo abarikuguma ‘nibashiisha nkana,’ na bwanyima y’okwega kukora ekihikire, Ruhanga naija kubacwera orubanja.—Abaheburaayo 10:26, 27.

 Abo abarikukora ekibi ky’amaani nibabaasa kurengwa amaganya ahabw’eki bakozire. Nk’eky’okureeberaho, Omugabe Daudi akahandiika ati: “Ahakuba eby’okushiisha byangye bindengyeire aha mutwe, bindemire nk’omutwaro guremeire.” (Zaaburi 38:4) Kwonka Baibuli neetuha amatsiko ngu “omubi arekye omuhanda gwe, n’otahikiriire arekye ebiteekateeko bye, agarukye ahari [Yehova], abone kumusaasira, ahari Ruhanga waitu, ahakuba naija kumusaasirira kimwe.”—Isaaya 55:7.