Ku orikuhurira ebigambo “Emperu eri haihi!” Niki ekirikwija omu biteekateeko byawe? Nooteekateeka aha mubuurizi omweziriki akwaitse Baibuli ye omu ngaro naabuurira? Nari nooteekateeka aha mushaija mukuru w’ebireju ayemereire aha rubaju rw’enguuto ayezirikire omweko omunda akwaitse ekipande kihandiikireho obutumwa burikugamba aha biro by’omumaisho? Okuteekateeka aha mbeera nk’egi nikibaasa kureetera abantu abamwe kufayo munonga, kandi abandi nikibaasa kubatangaaza.

Baibuli neegira eti: “Obwo nibwo emperu erihika.” (Matayo 24:14) Obwire nibwo bumwe nibwetwa “ekiro kikuru kya Ruhanga” nari “Haramagedoni.” (Okushuuruurwa 16:14, 16) Buzima, amadiini maingi tigarikumanya amazima agarikukwata aha nshonga egi, ahakuba hariho enyikiriza nyingi ezitarikwetegyerezibwa. Kwonka, Baibuli yo neeshoboorora gye emperu, erikworeka eki eri, n’eki etari. Kandi Ekigambo kya Ruhanga nikituhwera kwetegyereza yaaba emperu eri haihi. Ekirungi munonga, neetwegyesa oku turikubaasa kuhonokaho! Eky’okubanza, ka twetegyereze zimwe aha nyegyesa ezitahikire. “Emperu” buzima nikimanyisa ki kurugiirira aha Baibuli?

1. EMPERU TI MURIRO GW’AMAANI OGURAACWEKYEREZE ENSI.

   Baibuli neegira eti: “[Ruhanga] akata ensi aha misingi yaayo, ngu etaritengyetsibwa ebiro byona.” (Zaaburi 104:5) Ekyahandiikirwe ekyo n’ebindi nibituhamiza ngu Ruhanga tarikwija kucwekyereza ensi egi nari kwikiriza ngu ecwekyerezibwe!—Omubuurizi 1:4; Isaaya 45:18.

2. EMPERU TI KINTU EKITATEBEEKANISIIBWE.

   Baibuli neeyoreka ngu Ruhanga niwe atebeekaniise emperu kandi ataireho obwire bwayo bwenyine. Nitushoma tuti: “Kwonka eby’ekiro ekyo n’obunaku obwo tihaine orikubimanya, n’obu baakuba baamaraika ab’omu iguru, n’obu yaakuba Omwana, kureka Ishe wenka. Mwerinde, mugume nimureeba, kandi mushabe, ahakuba timurikumanya ahu obunaku obwo burihikira.” (Mako 13:32, 33) Buzima, Ruhanga (“tataitwe”) akataho “obwire” bwenyine obu araareetereho emperu.

3. EMPERU TERIKWIJA KUREETWA ABANTU NARI EKIBAARE KURUGA OMU MWANYA.

   Niki ekiraareete emperu? Okushuuruurwa 19:11 nihagira hati: “Ku naimukize amaisho, naareeba eiguru rikinguukire n’embaraasi kisa. Ogishutamiho naayetwa Mwesigwa kandi Mazima.” Omushororongo 19 nigugumizamu guti: “Kandi naareeba egyo nyamaishwa n’abagabe b’ensi n’amahe gaabo biteeraniire hamwe kurwanisa Ogwo oshutami aha mbaraasi n’eihe rye.” (Okushuuruurwa 19:11-21) N’obu orurimi orukoresiibwe aha ruri orw’akamanyiso, nitubaasa kwetegyereza eki: Ruhanga naija kukoresa baamaraika kucwekyereza abazigu be.

1. MUHERU Y’OBUTEGYEKI BW’ABANTU.

   Baibuli neeshoboorora eti: “Kandi omu busingye bw’abo bagabe Ruhanga w’omu iguru aryataho obundi bugabe [obutegyeki] obutaricwekyerezibwa ebiro byona, kandi obutegyeki bwabwo tiburihungurwa  rindi ihanga; kureka buryayatagura obwo bugabe bwona, bubumareho kandi bwo buryagumaho.” (Danieli 2:44) Nk’oku twareeba omu nshonga ya 3, nihaija kubaho okucwekyereza “abagabe b’ensi n’amahe gaabo,” abaraabe beegaitsisre “hamwe kurwanisa Ogwo oshutami aha mbaraasi n’eihe rye.”—Okushuuruurwa 19:19.

2. MUHERU Y’ENTARO, OBUBI, N’OBUTARI BURINGAANIZA.

   “[Ruhanga] amaraho engamba okuhika aha muheru gw’ensi.” (Zaaburi 46:9) “Ab’emitima egororokire nibo batuura omu nsi, n’abeesigwa bakagigumamu. Kwonka ababi baryamarwaho omu nsi, kandi abarikureebya baryagikuurirwamu kimwe.” (Enfumu 2:21, 22) “Reeba! nimpindura byona bisya.”—Okushuuruurwa 21:4, 5.

3. EMPERU Y’AMADIINI AGAREEBIZE RUHANGA N’ABANTU.

   “Baanabi nibahanuura ebishuba, Abanyamurwa nibattegyeka nibagyendera aha bya baanabi abo. . . . Mbwenu muheru ku erihika, muryagira muta?” (Yeremia 5:31) “Omuntu weena orikugira ati: Mukama wangye, Mukama wangye, tiwe aritaaha omu bukama bw’omu iguru, kureka orikukora ebi Tata ow’omu iguru akunda. Baingi baryayetonganira aha kiro ekyo bati: Mukama waitu, Mukama waitu, torikumanya ku twaburiire omu iziina ryawe, ku twabingire baadaimoni omu iziina ryawe, kandi ku twakozire eby’okutangaaza bingi omu iziina ryawe? Haaza naanye ndyabagarukamu nti: Tinkabamanyaga; Mundugye omumaisho imwe abakora eby’obugomi!’”—Matayo 7:21-23.

4. MUHERU Y’ABANTU ABARIKUSHAGIKA EBY’OBUTEGYEKI.

   Yesu akagira ati: “Kandi oru nirwo rubanja, omushana gwizire omu nsi, abantu baakunda omwirima okukira omushana; ahakuba emicwe yaabo ekaba eri mibi.” (Yohaana 3:19) Baibuli neegamba aha bwire bwa Noa omwesigwa obu ensi yaacwekyerezibwa. “Ensi eyaabaire eriho ekagaruka yaashwekwa amaizi g’omwegyemure, yaamirwa. Kwonka eiguru n’ensi ebiriho hati, ahabw’ekigambo ekyo, bibiikiirwe omuriro, nibirindwa okuhitsya aha kiro ky’orubanja eki abantu abatatiina Ruhanga baricwekyerezibwaho.”—2 Petero 3:5-7.

Yetegyereze ngu “kiro ky’orubanja n’okucwekyerezibwa” nibigyeragyeranisibwa n’okucwekyerezibwa “kw’ensi” y’ebiro bya Noa. Ni nsi ki eyaacwekyereziibwe? Ensi ekagumaho, kwonka “abantu abaabaire batarikutiina Ruhanga” nari abazigu ba Ruhanga nibo baacwekyereziibwe. Aha kiro kya Ruhanga “ky’okucwa orubanja,” abo abaraabe nibahakanisa Ruhanga nibaija kucwekyerera. Kwonka banywani ba Ruhanga nibaija kuhonokaho, nka Noa n’eka ye.—Matayo 24:37-42.

Teekateeka aha ku ensi erikwija kuba eri bwanyima ya Ruhanga kwihaho obubi! Buzima, amakuru kuruga omu Baibuli agarikukwata aha mperu n’amakuru marungi beitu ti makuru mabi. Kwonka noobaasa kwebuuza oti: ‘Baibuli neetugambira obu emperu eraije? Mbwenu shi eri haihi? Nimbaasa kuhonokaho nta?’