Nkazaarirwa Székesfehérvár, omuri Hungary, orurembo rw’ebyafaayo by’emyaka erikurenga 1,000. Eky’obusaasi, niinyijuka ebintu bibi ebyabaireho omu rurembo orwo ahabw’orutaro rw’ensi yoona orwa kabiri.

Kuruga omu buto nkoororwa tatenkuru na maawenkuru abarikuzaara maawe. Niinyijuka rukundo ei naabaire mbainiire na munonga maawenkuru Elisabeth. Akampwera kukunda munonga Ruhanga. Obu naabaire nyine emyaka eshatu, nkaba ngarukagarukamu Okushaba oku Yesu yaayegyeise abeegi be. N’obu kiraabe kiri kityo, tindabaasize kwetegyereza amakuru g’okushaba okwo kureka ku naahikize emyaka erikurenga omuri 20.

Tatenkuru na maawenkuru bakandeeberera obu naabaire ndi muto ahabw’okugira ngu abazaire bangye bakaba nibakora nyekiro na nyomushana, baine ekigyendererwa ky’okurundaana sente z’okugura enju nungi. Buri Rwamukaaga orwa kabiri omu kwezi, ab’omuka yaitu boona bakaba beeteerana kurya hamwe. Nkaba ninkunda obwire obwo obu twabaire tuba hamwe.

Omuri 1958, ekirooto ky’abazaire bangye kikahikiirira, bakagura enju twagituuramu bashatu. Nkashemererwa ahabw’okugira ngu obwire obwo nkaba nintuura n’abazaire bangye! Bwanyima y’ameezi ashatu, okushemererwa okwo kukahwaho kitaraariire. Tata akaitwa ekokoro.

Nkashaasha munonga. Niinyijuka ndikushaba nti: “Ruhanga, nkakweshengyereza kukiza tata. Nimwetenga. Ahabw’enki otaragarukiremu okushaba kwangye?” Nkaba niinyenda kumanya ahu tata yaabaire ari. Nkaba ninyebuuza nti: Agiire omu iguru? Nari ahweraireho kimwe? Nkaba niinyegomba abaana abandi abaabaire bakiine baishebo.

Kumara emyaka mingi, nkaba nza aha irimbo haihi buri izooba. Nkaba nstimba amaju aha kituuro kya tata nshaba nti: “Ai Ruhanga, niinyenda kumanya ahu tata ari.” Kandi nkaba nshaba kuhwerwa kwetegyereza ekigyendererwa ky’okubaho kw’abantu.

Aha myaka 13, nkacwamu kwega Orugyamani. Nkaba ninteekateeka ngu omu bitabo by’Orugyamani, nimbaasa kutungamu eby’okugarukamu by’ebibuuzo byangye. Omuri 1967,  nkatandika kwegyera omu rurembo Jena, kandi bwanyima naayegyera omuri East Germany. Nkashoma ebitabo by’abanyabwengye Abagyamani, okukira munonga ebyo ebirikukwata aha kigyendererwa ky’okubaho kw’omuntu. N’obu ndaabe naashangiremu ebiteekateeko ebirikushemeza, tihaine na kimwe ekyagarukiremu gye ebibuuzo byangye. Nkagumizamu ninshaba kutunga eby’okugarukamu.

Omuri 1970, nkagaruka Hungary, ei naabugaine Rose, bwanyima owaizire kuba omukazi wangye. Omu bunaku obwo, Hungary ekaba neetegyekwa Abakomunisiti. Bwanyima y’akaanya kakye tutaahire omu bushwere, nyowe na Rose tukahungira omuri Austria. Ekigyendererwa kyaitu kikaba kiri eky’okugumizamu kuza Sydney, ey’omuri Australia, ei maarimi yaabaire naatuura.

Ahonaaho nkatunga omurimo omuri Austria. Eizooba rimwe, ou naabaire ninkora nawe, akangira ngu nimbaasa kutunga eby’okugarukamu by’ebibuuzo byangye omu Baibuli. Akampa ebitabo bingi ebyabaire nibishoboorora aha Baibuli. Nkashoma ebitabo ebyo ahonaaho kandi nkaba niinyenda kwega ebirikukiraho. N’ahabw’ekyo nkahandiikira Abajurizi ba Yehova, abaabaire bateire ebitabo ebyo, naabashaba ebitabo ebindi.

Aha murundi gw’okubanza ogw’okwijuka okugaitwa kwaitu, nyowe na Rose tukataayaayirwa Omujurizi wa Yehova omu Austria. Akaija aine ebitabo ebi naabaire nshabire kandi yaanshaba kunyegyesa Baibuli, nanye naikiiriza. Ahabw’okugira ngu nkaba nyine ekihika ky’okwega Baibuli, tukaba twega emirundi ebiri buri saabiiti, kandi buri kwega tukaba tumara eshaaha nka ina.

Ebi Abajurizi ba Yehova baanyegyeise kuruga omu Baibuli bikanshemeza. Ku baanyorekire eiziina rya Ruhanga, Yehova omu Baibuli y’orurimi rwa Hungary, kikangumira kukiikiriza. Emyaka 27 ei naamazire ninza omu kanisa, nkaba ntakahurirahoga eiziina rya Ruhanga ririkugambwaho n’omurundi na gumwe. Oku Baibuli yaagarukiremu ebibuuzo byangye kukaanshemeza. Nk’eky’okureeberaho, nkeega ngu abafu tihaine eki barikumanya, nk’omuntu orikuba agwejegyereire kimwe. (Omubuurizi 9:5, 10; Yohaana 11:11-15) Nkeega n’aha kiraganiso kya Baibuli eky’ensi ensya ngu “tiharibaho kufa bundi.” (Okushuuruurwa 21:3, 4) Nyine amatsiko g’okugaruka kureeba tata, ahabw’okugira ngu omu nsi ensya “haryabaho okuzooka.”—Ebyakozirwe 24:15.

Rose akanyegaitaho omu kwega Baibuli. Tukatunguuka ahonaaho, omu meezi abiri gonka twaheza ekitabo eki twabaire nitwega! Tukaba nituza omu nteerane zoona ezi Abajurizi ba Yehova baabaire nibagira aha Kyombeko ky’Obukama. Tukashemererwa ahabw’oku Abajurizi ba Yehova baabaire nibakundana, nibahwerahwerana kandi baine n’obumwe.—Yohaana 13:34, 35.

Omuri 1976, nyowe na Rose tukaikirizibwa kuza Australia. Ahonaaho tukabonayo Abajurizi ba Yehova. Bakatuhwera kuhurira twine obuteeka. Omuri 1978, tukaba bamwe aha Bajurizi ba Yehova.

Nkatunga eby’okugarukamu by’ebibuuzo byangye ebyabaire bitwire nibinteganisa. Ahabw’okwirira haihi na Yehova Ruhanga, ntungire Tata orikukirayo oburungi. (Yakobo 4:8) Kandi omu nsi ensya nyine amatsiko g’okugaruka kureeba tata owaanzaire.—Yohaana 5:28, 29.

Omuri 1989, nyowe na Rose tukacwamu kugaruka Hungary, kugira ngu tubaase kubuurira banywani baitu, ab’omu maka gaitu, n’abandi. Tutungire omugisha gw’okwegyesa abantu baingi Baibuli. Abarikurenga 70 aharibo batwegaitsireho omu kuheereza Yehova, otwariiremu na maawe ou ndikukunda munonga.

Nkashaba kumara emyaka 17 kubaasa kutunga eby’okugarukamu by’ebibuuzo byangye. Hahingwireho endiijo emyaka 39 kandi ninkishaba kwonka hati ningira ngu, “Yebare, Taata ow’omu iguru, kugarukamu okushaba kwangye okw’omu buto.”