Mbwenu shi torikwikiriza ngu abantu baaba nibarya enguzi, gavumenti yaabo neija kuba erimu enguzi? Ku kiraabe nikwo kiri, nikimanyisa ngu gavumenti etarimu nguzi terikubaasa kuruga mu bantu. Baibuli neegamba aha Bukama bwa Ruhanga ngu niyo gavumenti ei Yesu yaayegyeise abakuratsi be kushaba.—Matayo 6:9, 10.

Obukama bwa Ruhanga ni gavumenti eyaabuzima erikutegyekyera omu iguru. Nibwija kwihaho gavumenti zoona ez’abantu. (Zaaburi 2:8, 9; Okushuuruurwa 16:14; 19:19-21) Bimwe aha birungi ebi Obukama bwa Ruhanga buraareetere abantu, n’okwihaho obushomankuzi oburi omu gavumenti. Yetegyereze enshonga mukaaga ezirikutureetera kuhamya ekyo.

OBUREMEEZI: Gavumenti z’abantu nizeemerezibwaho esente ezi abantu barikuhayo, okukira munonga kurabira omu mushoro. Esente ezi nizireetera abeebembezi kwohibwa kuziiba, kandi abeebembezi abandi nibaheebwa ebituga abantu abarikuba nibenda ngu babatuubize aha mishoro ei barikuha gavumenti. Ekirikurugamu, gavumenti neeyongyeza omushoro kubaasa kugaruraho esente ezi efeereirwe, eki kyongyerera kimwe enguzi. Omu mbeera nk’egyo, abantu abeesigwa nibo barikukirayo kubonabona.

OKUHWAHO KW’OBUREMEEZI OBWO: Yehova * Ruhanga niwe aine obushoboorozi aha Bukama bwe. (Okushuuruurwa 11:15) Obukama bwa Ruhanga tikirikubwetengyesa kushorooza emishoro kubaasa kukora emirimo yaabwo. Omu mwanya gw’ekyo, Ruhanga “ahabw’okuba ow’amaani omu bushoboorozi” n’ahabw’okuba efura, nikituhamiza ngu Obukama bwe nibwija kuhaazya ebyetengo by’abantu boona abu buraategyekye.—Isaaya 40:26; Zaaburi 145:16.

OBUREMEEZI: Okuteeraho kumaraho enguzi “kushemereire kutandikira aha rurengo rw’ahaiguru,” nikwo Susan Rose-Ackerman, owaaba yaagambireho omu kicweka eky’enyima yaayetegyereize. Gavumenti neeshiisha obwesigwa bwayo yaateeraho kurwanisa enguzi omu poriisi, n’omu barikushorooza emishoro, kwonka ekashwekyerera abeebembezi ab’ahaiguru. Nangwa n’omutegyeki orikukirayo kuba murungi naaba atahikiriire. Nk’oku Baibuli erikugira, “tihariho ohikiriire omu nsi okora gye.”—Omubuurizi 7:20.

OKUHWAHO KW’OBUREMEEZI OBWO: Okutashushana n’abantu abatahikiriire, Yesu Kristo ou Ruhanga atooraine kuba Omutegyeki w’Obukama bwe, tarikubaasa kukora ekigwire. Yesu akooreka ngu tarikukora ekigwire arikwanga ekituga ekirakizireyo kuheebwa, obu Sitaane yaamuha “ensi z’abagabe boona n’ekitiinisa kyazo.” Omuregi orikutegyeka ensi akaraganisa Yesu atyo arikwenda ngu Yesu amuramye. (Matayo 4:8-10; Yohaana 14:30) Nangwa n’obu Yesu yaabaire naabonabonesibwa arikuza kwitwa, akaba amaririire kuguma ari omwesigwa arikwanga omubazi ogwabaire nigubaasa kumutambira obusaasi, kwonka gurikubaasa kushiisha ebiteekateeko bye. (Matayo 27:34) Yesu ayorekire ngu ahikire kuba Omugabe w’Obukama bwa Ruhanga, ahabw’okugira ngu Ruhanga akamuzoora yaatunga amagara agatahwaho omu iguru.—Abafilipi 2:8-11.

OBUREMEEZI: Amahanga maingi nigakira kuteera oburuuru, ekirikurugamu okutoorana abeebembezi abatari beesigwa. Amazima gari ngu, kampeyini n’okuteera oburuuru birimu enguzi, nangwa n’omu mahanga agarikwetwa agatunguukire. Kampeyini nizirugamu  ebikorwa ebindi, kandi abagaiga nibo barikwebeebembera okutoorana abaraaze omu ofiisi.

Omuramuzi John Paul Stevens ow’eicwero ry’emanja erikuru omu U.S. akahandiika ngu enkora y’abagaiga egyo neereetera “gavumenti ezirikutooranwa kuba mbi kandi ereetera n’abantu kutazeesiga.” N’ahabw’ekyo, tikirikutangaaza kureeba ngu abantu baingi omu nsi yoona nibaikiriza ngu ebibiina by’eby’obutegyeki nibyo birikukirayo kurya enguzi.

OKUHWAHO KW’OBUREMEEZI OBWO: Obukama bwa Ruhanga nibwihiraho kimwe ekiteekateeko ky’enguzi omu buruuru nari kampeyini ahabw’okugira ngu n’obutegyeki obuhamire kandi oburaagumeho ebiro byona. (Danieli 7:13, 14) Obu omutegyeki w’Obukama atoorainwe Ruhanga, gavumenti yaabwo terikuteebwaho bantu kurabira omu karuuru, kandi abantu tibarikubaasa kugiihaho. Okuhangaara kwabwo nikutuhwera kuhamya ngu ebi burikukora nibiija kugumaho ebiro byona birikugasira abantu.

OBUREMEEZI: Omu kubanza, noobaasa kuteekateeka ngu okutaho ebiragiro bisya nikibaasa kutereeza enshonga. Kwonka, abacondooza bashangire ngu okwongyeraho ebiragiro bingi nikirugamu omugisha gw’okurya enguzi. Kandi, ebitongore ebirikutaho ebiragiro nibitwara esente nyingi, kwonka tihaine kihango eki birikukora.

OKUHWAHO KW’OBUREMEEZI OBWO: Ebiragiro by’Obukama bwa Ruhanga nibikirira kimwe ebiragiro bya gavumenti z’abantu. Nk’eky’okureeberaho, omu mwanya gw’okutaho ebiragiro bingi, Yesu akaha obuhabuzi obu: “N’ahabw’ekyo byona ebi mwenda ngu abantu babagirire, naimwe mube nikwo mwabagirira.” (Matayo 7:12) Ekikuru munonga, ebiragiro by’Obukama nibyebembeza ebigyendererwa hamwe n’ebikorwa. Yesu akagira ati: “Kunda mutaahi waawe nk’oku oyekunda.” (Matayo 22:39) Hatariho kubanganisa, Ruhanga orikumanya ebiri omu mutima, naabaasa kutaho ebiragiro nk’ebyo.—1 Samueli 16:7.

OBUREMEEZI: Emitwarize erikureetera abantu kurya enguzi n’omururu n’okweyendeza. Abeebembezi omu gavumenti n’abantu baabutoosha nibakira kuba baine  emitwarize nk’egyo. Eduuka y’omuri Seoul eyaagwire eyaaba yaagambirweho, abeebembezi ba gavumenti bakaikiriza ebituga ebyabahairwe abombeki abaabaire nibamanya ngu ekituga nikitwara esente nkye kukira okukoresa eby’okwombekyesa ebihikire.

Kubaasa kuhezaho enguzi, abantu baine kwegyesibwa oku barikubaasa kusingura ebigyendererwa bibi nk’omururu n’okweyendeza. Kwonka, gavumenti z’abantu tiziine kyetengo n’obushoboorozi bw’okutaho entebeekanisa z’okwegyesa abantu aha nshonga egi.

OKUHWAHO KW’OBUREMEEZI OBWO: Obukama bwa Ruhanga niburwanisa enguzi burikwegyesa abantu oku barikubaasa kusingura ebigyendererwa bibi ebirikurugamu okurya enguzi. * Okwegyesibwa oku nikubahwera kuhindurwa basya omu miteekateekyere yaabo. (Abaefeso 4:23) Omu mwanya gw’omururu n’okweyendeza, nibagira okumarwa kandi bafayo n’aha bandi.—Abafilipi 2:4; 1 Timoseo 6:6.

OBUREMEEZI: Nangwa n’omu mwanya murungi ogurikwegyesa ahaby’emicwe, abantu nibabaasa kuremwa kuba abeesigwa. Abacondooza nibaikiriza ngu egi niyo nshonga ahabw’enki gavumenti z’abantu zitarikubaasa kuhezaho nguzi. Gavumenti niziteekateeka ngu ekikuru eki zirikubaasa kukora n’okutuubya enguzi n’ebirikureetwaho enguzi.

OKUHWAHO KW’OBUREMEEZI OBWO: Ekibiina kya United Nations Convention Against Corruption, nikigira ngu gavumenti kubaasa kurwanisa enguzi, ziine kurinda “obwesigwa, obujunaanizibwa, kandi zikahamira aha kihikire.” N’obu eki kiraabe kiri ekigyendererwa kirungi, Obukama bwa Ruhanga nibukora ekirikukira aha kugamba aha mitwarize egi, nibwetengyesa ngu abu buraategyekye babe bagiine. Baibuli neegira ngu ab’omururu “n’ababeihi” tibarikwija kuhungura Obukama bwa Ruhanga.—1 Abakorinso 6:9-11; Okushuuruurwa 21:8.

Abantu nibabaasa kwega kukuratira emitindo egi, nk’Abakristaayo omu kyasha ky’okubanza. Nk’eky’okureeberaho, obu omwegi orikwetwa Simooni yaateeraho kugura aha ntumwa ekiconco ky’omwoyo gurikwera, entumwa bakanga ekituga ekyo kandi baamugira bati: “Oyeteise obubi bwawe obu.” Simooni ku yaareebire akabi akaarugire omu kwetenga kwe kubi, akashaba entumwa ngu bamushabire abaase kukusingura.—Ebyakozirwe 8:18-24.

Abantu b’enganda zoona nibabaasa kutunga omugisha gw’okutegyekwa Obukama bwa Ruhanga. (Ebyakozirwe 10:34, 35) Entebeekanisa y’Obukama ey’okutendeka abantu omu nsi yoona, neija kukuhwera kumanya oku orikubaasa kuba omwe aha bu buraategyekye. Abajurizi ba Yehova nibaija kushemererwa kukworeka entebeekanisa y’okwega Baibuli otashashwire. Okwega oku nikubaasa kutwara edakiika nkye buri saabiiti nangwa n’obu zaakuba nka ikumi. Noija kwega ebirikukwata aha makuru marungi g’Obukama, otwariiremu n’oku Obukama buraamareho enguzi omu gavumenti. (Luka 4:43) Nitukushaba kusherura Abajurizi ba Yehova omu kicweka kyanyu nari za aha Mukura gwaitu, jw.org.