KU ORAABE waagiireho aha kirwa kikye kya Sangir Besar omuri Indonesia emyaka mikye enyima, noobaasa kuba waareebire banyaanyazi-itwe bashatu aha mwaro gw’enyanja. Nibamanywa aha kirwa ekyo ahabw’omurimo gw’okubuurira barikuhwera abantu kwetegyereza Baibuli. Eizooba rimwe, bakaba nibakora ekintu ky’omutaano.

Bakaba nibaiha amabaare omu nyanja bagata aha nkungu. Amabaare agamwe gakaba gari mahango kwingana n’omupiira. Abakazi abo, bakaba bashutama aha butebe bukozirwe omu biti kandi bakoresa enyondo kwatagura amabaare, kugira ngu gabe makye kukira aha ihuri ry’enkoko. Bwanyima bakaba bata amabaare ago omu baketi bagakiriza batemba amatembezo bagatwara ei baabaire nibatuura. Reero bagapakira omu bishaho bihango babita aha motoka mpango zigatwara kugira ngu gakoresibwe kukora enguuto.

Omwe ahari banyaanyazi-itwe abo akaba naayetwa Hulda. Embeera ze zikaba nizimubaasisa kumara obwire bwingi arikukora omurimo ogwo. Esente ezi yaabaire naakora akaba naakira kuzikoresa kubaisaho ab’eka ye. Kwonka aha murundi ogu, akaba aine ekigyendererwa ky’okukoresa esente ezo kugira ekindi eki yaahikiiriza. Akaba naayenda kugura esimu erikuzaho app eya JW Library^®. Hulda akaba naamanya ngu vidiyo n’ebindi ebiri omu JW Library nibibaasa kumuhwera omu buheereza bwe n’okwongyera kwetegyereza Baibuli.

Hulda akamara okwezi n’ekicweka arikukora eshaaha ibiri buri kasheeshe, arikwatangura amabaare agarikwijura aha motoka nkye y’okutwara ebintu. Empereruka, akabaasa kutunga esente zirikumara kugura esimu.

Hulda akagira ati: “N’obu ndaabe naabaire mba nduhire munonga kandi nzimbire engaro ahabw’okwatagura amabaare, nkarahuka kwebwa obusaasi obwo bwona ku naatandikire kukoresa esimu nsya eyaabaire neempwera kuhikiiriza gye obuheereza bwangye n’okworoberwa kutebeekanisa enteerane z’Ekikristaayo.” Kandi naagira ngu esimu egyo ekamuhwera kuba omu nteerane z’ekibiina n’okubuurira omu bwire bw’ekigwererezi kya COVID-19. Nitushemererwa na Hulda ahabw’okugira ngu akahika aha kigyendererwa kye.