Omu shaaha emwe ey’okubanza omwereere yaaheza kuzaarwa, nikiba kiri kikuru ngu nyina agire enkoragana nungi nawe. Ahabw’enki? Enkoragana egi neehwera omwereere owaaheza kuzaarwa kukura gye n’okugira amagara marungi. *

Niki ekirikuhiga omukazi omuzaire kufayo aha mwereere ou yaaheza kuzaara? Omuhangu Jeannette Crenshaw naashoboorora omu katabo Perinatal Education ngu entegyeka magara erikwetwa oxytocin “neehwera omukazi yaaheza kuzaara kufayo aha mwana we arikumukiikira, akamureeba, kandi akamwontsya.” Entegyeka magara endiijo erikushohozibwa aha kuzaara, “neehwera owaaheza kuzaara kufayo aha mwana we,” kandi neemuha omuhimbo gw’okukoragana nawe. Ahabw’enki eki ni kikuru?

Rukundo ei omuzaire n’omwana barikugirirana, bakagiheebwa Omuhangi waitu, Yehova Ruhanga. * Omugabe Daudi akagira ngu Ruhanga niwe ‘yaamwihire omu nda ya nyina’ akamureetera n’okuhurira aine oburinzi omu mikono ya nyina. Akashaba ati: “Okwiha obu naazarwa, niiwe nyegamira; okwiha obu maawe yaanzaara, niiwe oba Ruhanga wangye.”​—Zaaburi 22:9, 10.

TEEKATEEKA AHARI EKI: Ruhanga ku araabe yaahangire omukazi aine enyehurira y’okwetegyereza gye omwereere we, kandi akafayo n’aha byetengo bye, mbwenu shi eki tikirikworeka ngu Ruhanga naatufaho munonga obu turi abaana be?​—Ebyakozirwe 17:29.

Yesu Kristo orikumanya gye Omuhangi kukira ondiijo muntu weena, akeegyesa ati: “Ebiteera-nkumba bibiri tibigura senti emwe? Kwonka tihariho na kimwe ekigwa ahansi Shoimwe atakimanyire. Nangwa n’eishokye ery’aha mitwe yaanyu ribazirwe ryona. N’ahabw’ekyo mutaritiina; ahabw’okuba nimukira ebiteera-nkumba bingi.”​—Matayo 10:29-31.

Ni bakye ahariitwe abarikuta omutima aha tunyonyi tukye, reero bwanyima tukafayo kureeba ‘kamwe akaateekama ahansi.’ Kwonka tataitwe ow’omu iguru naamanya buri kamwe aharibwo! Kandi, ebinyonyi n’obu byakuba biri bingi, tiby’omuhendo ahari Yehova okukira omuntu. N’ahabw’ekyo eky’okwega nikyetegyerezibwa gye: Toshemereire “kutiina” ngu Ruhanga  tarikukutaho omutima. Okutaana n’ekyo, naakufaho munonga!

Ebyahandiikirwe nibituhamiza biti:

• “Amaisho ga Mukama gaba hoonahoona, gareeba ababi n’abarungi.”​—ENFUMU 15:3.

• “Amaisho ga Mukama agata aha bahikiriire, n’amatu ge agatega okutaka kwabo.”​—ZAABURI 34:15.

• “Ndyashemererwa, nyesiime ahabw’embabazi zaawe; ahakuba okareeba obusaasi bwangye, waamanya enaku zangye.”​—ZAABURI 31:7.

Nikituhwera kita twamanya ngu Ruhanga naafayo aha mbeera zaitu, kandi ngu naatureeba ahabw’okugira ngu naatukunda? Buzima nikituhwera nk’oku Hannah, * owa England, arikushoboorora:

“Emirundi mingi, nkaba ninteekateeka ngu Yehova tarikunkunda, kandi ngu n’okushaba kwangye tikurikugarukwamu. Nkaba ninteekateeka ngu n’ahabw’okugira tinyine kwikiriza. Nkaba ninteekateeka ngu ndiyo ninfubirwa nari ntsigirweho ahabw’okugira ngu nkaba ntari w’omugasho. Nkaba ninyehurira ngu Ruhanga tarikufayo.”

Kwonka hati, Hannah tarikubangaanisa yaaba Yehova naatufaho nari naatukunda. Niki ekyamureeteire kuhindura emiteekateekyere ye? Naashoboorora ngu empindahinduka zikabaho mporampora. Naagira ati: “Ninyijuka oku naahwereirwe orubazo rumwe orurikwegamira ahari Baibuli orwahairwe emyaka mingi enyima, orwabaire nirukwata aha kitambo kya Yesu, kandi rukandeetera kuhamya ngu Yehova naankunda. Kandi okushaba kwangye ku kurikugarukwamu, obwire obwingi nimbaruka ndira, ahakuba nimba naayetegyereza ngu Yehova naanfaho. Kandi ahabw’okwega Baibuli n’okuza omu nteerane z’Ekikristaayo, nyegire bingi ebirikukwata ahari Yehova, emitwarize ye, n’oku arikutufaho. Hati nindeeba gye ngu Yehova naatushagika, naatukunda, kandi naaba ayeteekateekire kureeberera buri omwe ahariitwe.”

Ebigambo bya Hannah nibigaruramu amaani. Kwonka shi noobaasa kuhamya ota ngu Ruhanga naayetegyereza enyehurira zaawe kandi naaziijuka? Ekicweka ekirikukurataho nikiza kugarukamu ekibuuzo eki.