Ahabw’okugira ngu twena turi baijukuru b’Adamu omuntu w’okubanza, turi eka emwe. N’obu ab’eka emwe bashemereire kuba nibakundana kandi barikuhaana ekitiinisa, rukundo nk’egi egumire kureebeka ebiro ebi. Eki tikyo Ruhanga owa rukundo arikwenda.

‘Okunde mutaahi waawe, nk’oku orikwekunda.’​—ABALEEVI 19:18.

“Mukunde abazigu baanyu.”​—MATAYO 5:44.

Yetegyereze oku Ekigambo kya Ruhanga kirikushoboorora rukundo ye omu 1 Abakorinso 13:4-7:

“Okukunda kugumisiriza, kugira embabazi.”

Kiteekateekyeho: Nooyehurira ota abandi baakugumisiriza, kandi bakabura kukugirira ekiniga, beitu bakakugirira embabazi waakora enshobe?

“Okukunda tikugira eihari.”

Kiteekateekyeho: Nooyehurira ota abandi baaba nibakwekyengyera nari baaba bakwiniire eihari?

Okukunda “tikwesherurira byakwo.”

Kiteekateekyeho: Nooyehurira ota abandi baaba nibaikiriza ebitenso byawe, kandi batarikuremera aha biteekateeko byabo?

Rukundo terikuguma neebiika ebishobyo by’abandi

Kiteekateekyeho: Ruhanga naaba ayeteekateekire kusaasira abarikumushobeza kwonka bakeeteisa. Tarikuguma “naahana obutoosha n’obu kwakuba okuguma n’ekiniga ebiro byona.” (Zaaburi 103:9) Nikitushemeza ou tugwisize kubi yaatusaasira. N’ahabw’ekyo twine kuba tweteekateekire kusaasira abandi abarikutugwisa kubi.​—Zaaburi 86:5.

Rukundo ‘terikushemerererwa kutahikiirira.’

Kiteekateekyeho: Haagira ekintu kibi ekyatubaho, nituba tutarikwenda ngu abandi bashemererwe ahabw’okubonabona kwaitu. N’ahabw’ekyo titurikushemererwa abandi baahikwaho oburemeezi, n’obu baakuba baatutwariize kubi enyima.

Kubaasa kutunga emigisha ya Ruhanga, twine kukunda abandi omu miringo egi n’obu baakuba bari bantu ba muringo ki. Omuringo gumwe ogu turikubaasa kukikoramu n’okuhwera abaine eki bakyenire.