OBUTARI bwesigwa omu bushwere nibureeta obuhinza mutima. N’amazima, abamwe bacwiremu kusaasira abakundwa baabo abeeteisize, baagaruka baagira omukago murungi. a Kwonka yaaba obushwere bugumaho nari bushenyuka, abo abu bareebize nibagira obusaasi bwingi. Abari nkabo nibabaasa kwemera bata enyehurira zaabo?

Baingi abu bareebize n’obu baraabe nibaba baine obusaasi bwingi, kwonka babaasize kuhuumurizibwa Ebyahandiikirwe. Babaasize kumanya ngu Ruhanga naareeba amarira gaabo, kandi naamanya n’obusaasi bwabo.​—Malaki 2:13-16.

“Ku nteekateeka bingi, naayemereza omutima, okuhuumuriza kwawe kugwisa gye amagara gangye.”​—Zaaburi 94:19.

Bill naagira ati: “Ku naabaire nshoma ekyahandiikirwe ekyo, nteekateeka ahari Yehova arikumpuumuriza omu muringo gw’embabazi nk’omuzaire.”

“Aha munyambabazi oyeyoreka ori ow’embabazi.”​—Zaaburi 18:25.

Carmen ou iba atarabaire mwesigwa kumara ameezi, naashoboorora ati: “Ibanyi tarabaire mwesigwa. Kwonka nkaba nimmanya ngu Yehova naija kuguma naanye, tarikubaasa kundeebya.”

‘Muteemereza omutima aha kintu kyona, kureka omuri byona mumanyise Ruhanga ebi murikwetenga omu kushaba n’okweshengyereza Kandi obusingye bwa Ruhanga oburengire okwetegyereza kw’omuntu weena, nibwija kuguma niburinda emitima yaanyu n’obwengye bwanyu.’​—Abafilipi 4:6, 7.

Sasha naagira ati: “Nkashoma ekyahandiikirwe eki emirundi mingi. Ku naagumire ninshaba, Ruhanga akampa obusingye bw’omu mutima.”

Boona abaagambwaho aha ruguru, obumwe bakaba nibahurira barikwenda kufa. Kwonka bakeesiga Yehova Ruhanga kandi ebiri omu Kigambo kya Ruhanga bikabagumya. Bill akakigambaho ati: “Okwikiriza kwangye kukampwera kugira ekigyendererwa, ebindi byona ku byareebikire nk’ebyahwaho. N’obu ndaabe naabaire ndi omu ‘ruhanga rw’ekibunda’ kumara obwire, Ruhanga akaba ari naanye.”​—Zaaburi 23:4.