‘Ku muraashabe Isheboona ekintu kyona omu iziina ryangye, naija kukibaha.’​—Yohaana 16:23.

Ebigambo ebi nibyoreka gye ngu Yehova naayenda tumushabe kurabira omu iziina rya Yesu Kristo, beitu bitari bishushani, abahikiriire, baamaraika, nari baatatenkuriitwe abaafiire. Twashaba Ruhanga omu iziina rya Yesu, nitworeka ngu nitumanya omwanya mukuru gwa Yesu. ‘Tihariho orikwija ahari Isheboona, atarabire omuriinye,’ nikwo Yesu yaagizire.​—Yohaana 14:6.

‘Mumugambire byona, mumare omu kashansha.’​—Zaaburi 62:8.

Twaba nitushaba Yehova, twine kugamba nk’abarikugamba na Tataitwe owa rukundo. Omu mwanya gw’okushaba turikushoma omu kitabo nari ebi tukwatsire omu mutwe, twine kumugambira omu muringo gw’ekitiinisa, kandi kuruga aha mutima.

‘Twashaba ekintu kyona nk’oku arikukunda, naatuhurira.’​—1 Yohaana 5:14.

Baibuli neetugambira ebi Yehova Ruhanga arikwija kutukorera n’ebi arikwenda ngu tumukorere. Ruhanga kubaasa kuhurira okushaba kwaitu, twine kushaba ‘nk’oku arikukunda.’ Kubaasa kukora ekyo, twine kwega Baibuli tukamumanya gye. Twakora tutyo, okushaba kwaitu nikumushemeza.

Shaba Ebirikwetengyesa. Nitubaasa kushaba Ruhanga ebirikwetengyesa buri izooba nk’eby’okurya, eby’okujwara, n’oburaaro. Nitubaasa n’okushaba obwengye bw’okucwamu gye, n’amaani g’okwemera okugyezibwa. Nitubaasa kushaba kugira okwikiriza, kusaasirwa, n’obuhwezi bwa Ruhanga.​—Luka 11:3, 4, 13; Yakobo 1:5, 17.

Shabira Abandi. Abazaire abarikufayo nibashemererwa abaana baabo baaba nibakundana. Na Yehova naayenda ngu abaana be ab’omu nsi bafeyo ahari bagyenzi baabo. Kihikire kushabira abu turi nabo omu bushwere, abaana baitu, ab’amaka gaitu, na banywani baitu. Yakobo akahandiika ngu “mushabirane.”​—Yakobo 5:16.

Siima Ruhanga. Baibuli neegamba aha Muhangi waitu eti: “Akaguma naabakora gye, naabagwisiza enjura okuruga omu iguru, naabeereza emyaka omu bunaku bwayo, naabahaazya eby’okurya, naijuza emitima yaanyu okushemererwa.” (Ebyakozirwe 14:17) Twateekateeka ahari byona ebi Ruhanga atukoreire, nikiija kutuhiga kumwebaza omu kushaba. Nangwa, twine n’okworeka ngu nitusiima Ruhanga kurugiirira aha ku turikutwaza.​—Abakolosai 3:15.

Obumwe, nitubaasa kwehurira kubi ahabw’okushaba kwaitu kutagarukwamu ahonaaho. Mbwenu shi twine kuteekateeka ngu Ruhanga tarikutufaho? Ngaaha buzima! Yetegyereze eby’okureeberaho ebiri ahaifo ebirikworeka ngu twine kugumizamu nitushaba.

Steve, orikugambwaho omu kicweka eky’okubanza, naagira ati: “Ku ogire ngu ti ahabw’okushaba, nkaabaire naatamirwe amagara emyaka mingi enyima.” Empinduka ekareetwaho ki? Akatandika kwega Baibuli yaamanya ngu aine kugumizamu naashaba obutaruha. Steve naagira ati: “Ninshaba Ruhanga kumwebaza ahabw’obushagiki obu naatungire kuruga ahari banywani bangye abakundwa. Hati nshemereirwe kukira ira.”

Kandi shi Jenny, owaabaire naateekateeka ngu Ruhanga tashemereire kumugarukamu? Naagira ati: “Obu naabaire mpwerairemu kimwe amaani, nkeshengyereza Ruhanga kumpwera kwetegyereza ahabw’enki ninyehurira nk’otaine mugasho gwona.” Ekyo kikamuhwera kita? “Okugambira Ruhanga oku ndikwehurira kimpweraire kwereeba nk’oku Ruhanga arikundeeba, ngu n’obu omutima gwangye guraabe nigunshinja, we tarikuncwera orubanja. Kandi kimpweraire kutahanika beitu kugumizamu niinteeraho.” Harugiremu ki? “Okushaba kumpweraire kureeba Yehova nk’owa buzima, owa rukundo, orikufayo, Tataitwe, kandi Omunywani, orikumpwera butoosha, naagumizamu niinteeraho kukora ebi arikwenda.”

Teekateeka n’ahari Isabel. Ku yaagizire enda, abashaho be bakamugira ngu naija kuzaara omwana amugire munonga. Akagwerwa akagwe. Nangwa n’abamwe bakamuha obwengye ngu aihemu enda. Naagira ati: “Nkehurira nk’orikuza kwitwa obujune bw’omu mutima gwangye.” Akakora ki? Naayongyeraho ati: “Nkashaba Ruhanga kumpwera.” Bwanyima, akazaara omwana w’omwojo omugire yaamweta Gerard. Isabel shi naareeba ngu Ruhanga akagarukamu okushaba kwe? Eego! Mu muringo ki? Isabel naagira ati: “Ku ndikureeba mutabani wangye hati oine emyaka 14 ashemereirwe n’obu araabe amugire, niimanya ngu niwe ky’okugarukamu ky’okushaba kwangye ekirungi, omugisha ogurikukirayo ogu Yehova Ruhanga ampaire.”

Ebigambo birikuruga aha mutima nk’ebi nibitureetera kuteekateeka aha bigambo by’omuhandiiki wa zaaburi ebi: ‘Ai [Yehova noija kuhurira okushaba] kw’abacureezi, noija kugumya emitima yaabo, obategye okutu.’ (Zaaburi 10:17) Ka twine enshonga nkuru ezirikutureetera kushaba obutaruha!

Baibuli erimu okushaba kwa Yesu kwingi. Okurikukira kumanywa munonga n’okwo oku yaayegyeise abeegi be. Nitubaasa kukwegyeraho ki?