Yesu atakazairwe nk’omuntu omu nsi akaba naatuura omu iguru nka maraika. (Yohaana 8:23) Yesu niwe ou Ruhanga yaabandize kuhanga kandi akahwera omu kuhanga ebintu ebindi byona. Niwe wenka ou Yehova yaayehangiire, n’ahabw’ekyo kihikire kumweta Omwana we “omwe nyamunegyere.” (Yohaana 1:14) Yesu naayetwa “Kigambo” ahakuba akakora nk’omugambirizi wa Ruhanga.—Shoma Enfumu 8:22, 23, 30; Abakolosai 1:15, 16.

Ruhanga akabaasisa omwana we kuzaarwa omu nsi, arikuzaarwa omwishiki Omuyudaaya oshugaine orikwetwa Mariamu. N’ahabw’ekyo Yesu akaba ataine ishe ow’omuntu. (Luka 1:30-35) Akaija omu nsi (1) kwegyesa amazima agarikukwata ahari Ruhanga, (2) kututeeraho eky’okureeberaho aha ku twine kukora ebi Ruhanga akunda n’obu twakuba turi omu buremeezi. (3) N’okuhayo amagara ge nk’ekitambo.—Shoma Matayo 20:28.

Ekitambo n’ekintu ekirikuheebwayo kucungura omuntu omu kabi. (Okuruga 21:29, 30) Kikaba kitari kigyendererwa kya Ruhanga ngu abantu bafe nari bakaikure. Ekyo nitukimanya tuta? Ruhanga akagambira omuntu w’okubanza Adamu ngu yaakora “ekibi” naija kufa. N’ahabw’ekyo Adamu ku atarasiisire akaba atarikwija kufa. (Okutandika 2:16, 17; 5:5) Baibuli neegira ngu okufa ‘kukabuga’ omu bantu boona ahabwa  Adamu. N’ahabw’ekyo akahunguza baijukuru be boona ekibi n’okufa. Nitwetenga ekitambo kutucungura okufa oku twahungwire ahari Adamu.—Shoma Abarooma 5:12; 6:23.

N’oha owaabaire naabaasa kuhayo ekitambo kutucungura omu kufa? Ku turikufa nituba twashashurira ebibi byaitu. Omuntu otahikiriire tarikubaasa kucungura abandi.—Shoma Zaaburi 49:7-9.

Yesu akaba atari otahikiriire nkaitwe. N’ahabw’ekyo tarafiire ahabw’ekibi, ahakuba we tihaine kibi eki yaakozire. Beitu akafa ahabw’ebibi by’abandi. Ruhanga ahabw’okutukunda munonga akoohereza Omwana we kutufeera. Yesu nawe akooreka ngu naatukunda arikworobera Ishe kandi akatufeera ahabw’ebibi byaitu.—Shoma Yohaana 3:16; Abarooma 5:18, 19.

Yesu obu yaabaire ari omu nsi akakiza abarwaire, yaazoora abafu yaiha n’abantu omu bureemezi bwabo. Ebi yaakozire, bikooreka ebi araakorere abantu boona abarungi omu biro by’omumaisho. (Matayo 15:30, 31; Yohaana 5:28) Yesu ku yaafiire, Ruhanga yaamuzoora yaamuha omubiri gw’omwoyo. (1 Petero 3:18) Akaguma aha rubaju rwa buryo rwa Ruhanga okuhitsya obu yaamuhaire obushoboorozi kwija kutegyeka ensi yoona nk’Omugabe. (Abaheburaayo 10:12, 13) Hati Yesu naategyeka nk’Omugabe omu iguru, kandi abakuratsi be nibabuurira amakuru marungi ago omu nsi yoona.—Shoma Danieli 7:13, 14; Matayo 24:14.

Yesu ari haihi kukoresa obushoboorozi bwe nk’Omugabe kumaraho okubonabona kwona n’abarikukureetaho. Boona abarikumwikiririzamu kandi bakamworobera nibaija kutunga amagara agatahwaho omu nsi.—Shoma Zaaburi 37:9-11.