Nkakurira omuri Los Angeles, California, U.S.A., omu myanya erikumanywa ahabw’abayaayi n’okukoresa emibazi y’ekitokooza bwongo. Abazaire bangye bakaba baine abaana mukaaga, obwo nyowe ndi owa kabiri.

Maawe akatukuza turi omu kanisa y’abarokore. Kwonka, omu bushogoyo bwangye, nkahinduka ekirumira-habiri. Aha Sande nkaba nyeshongora omu kanisa. Reero ebiro ebindi byona omu saabiiti, nkaba nza omu mikoro y’okweshemeza, kureetsa enjaayi, n’okwejumba omu bikorwa by’obuhwanshoni.

Nkaba nyine ekiniga ky’obushaarizi eky’ahonaaho. Nkaba nkoresa buri kimwe nk’eky’okurwanisa kusingura. Ebi naabaire niinyega aha kanisa bikaba bitarikuhwera. Nkaba ninkira kugira nti: “Okuhoora enzigu n’okwa Mukama, kandi niinye kikoreso kye!” Obu naabaire ndi omu siniya omu myaka ya 1960, nkaza omu kigombe ky’Abairaguju eky’eby’obutegyeki, ekyabaire nikimanywa ahabw’okurwanirira obugabe omu muringo gw’ekinyamahe. Emirundi mingi tukaba nitwejumba omu bwesharingo, obumwe tukinga n’eishomero.

Nikireebeka okwesharinga kukaba kutarikumaraho obushaarizi bwangye. N’ahabw’ekyo nkatandika kwejumba omu mishango y’okushoroora omu rangi. Nk’eky’okureeberaho, eizooba rimwe nyowe na banywani bangye tukareeba vidiyo erikworeka oku ira abantu b’Africa baabaire nibatwarwa nk’abahuuku omuri United States. Ahabw’okuteganisibwa obutari buringaaniza obwo, ahonaaho tukateera eminyeeto abarikwera abaabaire bari omu kibanda kya vidiyo ekyo. Reero tukagumizamu twataahirira abarikwera omu kicweka ekyo, turikusherura abantu baingi b’okuteera.

Kuza kuhika omunyeeto waakura, nyowe na beene tata tukaba tukozire emishango mingi munonga. Ab’obushoboorozi bakaba nibakira kutukwata. Omwe ahari beene tata akaba ari kibiina ky’ebihanda by’amaani, kandi nkaba ninkira kushashaanuka nabo. Nkaba ninyeyongyerera kimwe kusiisikara.

Omwe ahari banywani bangye abazaire be bakaba bari Abajurizi ba Yehova. Bakanyeta omu nteerane z’ekibiina, kandi nkaikiriza. Kuruga aha kutandika, nkaba nimbaasa kureeba oku Abajurizi ba Yehova bari ab’omutaano. Buri omwe akaba aine Baibuli kandi arikugikoresa omu ruteerane. N’abato bakaba nibaha embazo! Nkashemererwa kumanya ngu Ruhanga aine eiziina, Yehova n’okuhurira ririkukoresibwa. (Zaaburi 83:18) Ekibiina kikaba kirimu ab’amahanga maingi, kwonka kikaba nikireebwa butunu ngu tiharimu okushoroora omu rangi.

Omu kubanza, nkaba ntarikwenda ngu Abajurizi ba Yehova baanyegyese Baibuli, kwonka nkaba ninkunda okuza omu nteerane zaabo. Ekiro kimwe, ku naabaire ndi omu nteerane z’Abajurizi ba Yehova, banywani bangye bakaza omu kiivuro. Aha kiivuro ekyo, bakateera omunyeeto yaafa ahabw’okugira ngu akanga kuba jaketi ye. Eizooba eryakuratsireho bakaba nibeesimirana okwita okwo. Nangwa bakaba nibasheka obu baabaire nicwerwa orubanja omu eiramuriro. Baingi aharibo bakacwerwa ogw’okukomowa ebiro byona eby’amagara gaabo. Nikishemeza munonga kureeba ngu nkaba ntari nabo ekiro ekyo. Nkamariirira kukora empinduka nkatandika kwega Baibuli.

Ahabw’okumanyiira ebikorwa by’okushoroora omu nganda, nkaba nindeeba ebintu omu Bajurizi ba Yehova ntangaara. Nk’eky’okureeberaho, Omujurizi wa Yehova omujungu ku yaabaire aba arikuza aheeru, abaana be akaba abatsiga omu ka y’omwiraguju. Kandi, eka y’abajungu bakaakiira omunyeeto omwiraguju owaabaire ataine h’okutuura. Nkahamiza kimwe ngu Abajurizi ba Yehova nibakora ebirikuhikaana n’ebigambo bya Yesu ebiri omuri Yohaana 13:35: ‘Ku muraagume nimukundana, nibwo abantu boona barikwija kumanya ku muri abeegi bangye.’ Nkamanya ngu naatunga ab’eishe-emwe abahikire.

Omu kwega Baibuli, nkatandika kureeba ngu nyine kuhindura emiteekateekyere yangye. Nkaba nyine kugarura busya ebiteekateeko byangye, kubaasa kuba ow’obusingye n’okugira entwaza nungi. (Abarooma 12:2) Mporampora, nkatunguuka. Omu Kwokubanza 1974, nkabatizibwa naaba omwe aha Bajurizi ba Yehova.

Kwonka na bwanyima y’okubatizibwa, nkaba nyine kuguma ninkora aha kiniga kyangye. Nk’eky’okureeberaho, eizooba rimwe ndikubuurira enju aha nju omu buheereza, nkairutsya omushuma owaibire radiyo omu motoka yangye. Ku naamufundize, akatambika radiyo ahansi, yairuka yaagyenda. Ku naagambire abandi oku naacungura radiyo yangye, omureeberezi akambuuza ati: “Stephen, waaba nooza kukora ki kuri waamukwata?” ekibuuzo ekyo kikandeetera kuteekateeka, kandi kyampiga kugumizamu nimba ow’obusingye.

Omu Kwaikumi 1974, nkaza omu buheereza obw’obutwire, ndikumara eshaaha 100 buri kwezi ndikwegyesa abandi Baibuli. Bwanyima, nkatunga omugisha gw’okuhwera aha ofiisi enkuru ey’Abajurizi ba Yehova omuri Brooklyn, New York. Omu 1978, nkagaruka Los Angeles kureeberera maawe owaabaire arwaire. Bwanyima y’emyaka ebiri, nkatunga omukazi wangye omukundwa, Aarhonda. Akaangumya munonga omu kureeberera maawe kuhitsya obu maawe yaafa. Bwanyima y’obwire, nyowe na Aarhonda tukaza omu Ishomero rya Gilead reero twayoherezibwa omuri Panama, ahu tukirikuheereza nk’abamiisani na hati.

Kuruga naabatizibwa, ntwire nindaba omu mbeera ezirikubaasa kundeetera kutwaza omu muringo gw’obushaarizi. Nyegire kuhiguza abantu abarikuteeraho kungwisa kubi nari kandi obumwe ninteeraho kwikaikanisa embeera. Abantu baingi otwariiremu omukazi wangye, naansiima oku ndikukutwaza omu mbeera ezi. Nangwa naanye obumwe nikintangaaza! Tindikwehimbisa ahabw’okukora empinduka ezi. Kureka, niimanya ngu n’obujurizi oburikworeka amaani ga Baibuli ag’okuhindura abantu.—Abaheburaayo 4:12.

Baibuli empweraire kugira ekigyendererwa n’okuba ow’obusingye. Tinkiteera bantu, kureka nimbahwera kukira omu by’omwoyo. Nangwa mbaasize n’okwegyesa Baibuli omwe aha bazigu bangye ou naabaire ninshoma nawe! Bwanyima y’okubatizibwa, tukatuuraho hamwe kumara obwire. Okuhitsya na hati, tukiri abanywani ab’aha mara. Hati, nyowe n’omukazi wangye tuhweraire abantu abarikurenga 80 kuba Abajurizi ba Yehova turikubeegyesa Baibuli.

Ninsiima Yehova ahabw’okumpwera kugira ekigyendererwa n’okushemererwa, omu ruganda rw’eishe-emwe.