• Niyáázh éí ayóó áníshtʼé nízingo nitsíkees. Índída 10 binááhai!

• Shí nitséskeesígíí bikʼehgóó ádajooníił doo nízin.

“Háálá jiidzaa?” Nínízingo shı̨́ı̨́ nitsíníkees. “Hoł hózhǫ́ǫ doo nisin. Alááh áníshtʼé nízingo nitsékeesgo doo bá nisin da!”

Niheʼawééʼ bił hózhǫ́ǫgo dóó tʼáadoo ayóó ádaa nitsíkeesígo, díísh tʼáá bee nizhdínóotįįłgo átʼé?

Tʼah ániidídóó azhéʼé dóó amá nihaʼáłchíní tʼáá adaaníígóó ádaałʼı̨́ dabiʼdooʼniid. Áádóó azhą́ tʼáadoo bee baa hóʼniihí da ndi, baa dahohniih, tʼáadoo ayóó bichʼadahoshókéhí ałdóʼ dabiʼdooʼniid. Bá daʼóltaʼii éí áłchíní kótʼéego nilzéego hazhóʼó ádaa nitsídaakees doo danízin. Áko azhéʼé dóó amá łaʼ díí bikʼehgóó ádajiidzaa. Ńtʼééʼ áłchíní haitʼéego daneeyą́? Naaltsoos Generation Me wolyéego ání: “Áłchíní bił hózhǫ́ǫgo hóyą́ą dooleeł yę́ęniʼ, kótʼéego áłchíní nilzéego éí shí tʼéiyá danízingo daniyé.”

Azhéʼé dóó amá éí baʼáłchíní doo akǫ́ǫ́ ádaanííłgóó doo yee yichʼįʼ yáłtiʼgóogo baʼáłchíní saad yikʼee diniih yileeh, áádóó tʼáadoo leʼé chʼééh ííłʼı̨́įgo yiniinaa yínííł yikʼee nikidiighááh. Iisiihgoda tʼóó bide ábósin yileeh. Tʼáá bí tʼéiyá ádaa nitsídaakeesgo biniinaa bikʼis doo dahóleʼ átʼée da. Áádóó yéigo yínííł yikʼee dahidikááh.

Azhéʼé dóó amá éí haʼáłchíní bee nazhnitinígíí bitsʼą́ą́dóó nizhónígo yee yigáałgo baa hoł hózhǫ́ǫ łeh. Éí haʼátʼíí shı̨́ı̨́ ayóó yiishchįįh doo nízingo éí tʼáadoo yikʼidigháhí yíhwiidoołʼáałgi bee nidínóohtįįł. Díí átʼéego áłchíní nanitin éí tʼáá bí bííníshghah nízingo yíhwiidoołʼááł. (Proverbs 22:29) Náánáłahdę́ę́ʼ diné deinízinii yá yaa nitsíkees dooígi bee nidínóohtįįł. (1 Corinthians 10:24) Tʼáadoo ayóó ádaa nitsíkeesígo bee nanohtin.

Baa haʼniih doo. Óltaʼdi nizhónígo áʼiilaago baa nihił hózhǫ́ nizhónígo ííníłtaʼ bidohníigo bee baa hohniih. Tʼáadoo hazhóʼó áʼiilaagóogo bá óltaʼí tʼáadoo biniinaa bikʼíhóhʼáhí. Kwíitʼı̨́įgo éí niheʼawééʼ aʼohgo éʼétʼé dooleełgi doo yíhwiidoołʼáał da. Óltaʼdi bee bichʼįʼ anáhóótʼiʼígíí bee bíká anáłwoʼ, áko nizhónígo ółtaʼ doo. Óltaʼgi doo hazhóʼó aʼáłʼı̨́ı̨́góó bił hóyéeʼgo doo bee baa haniih da doo.

Bichʼįʼ hááʼádzih doo. Niheʼawééʼ niʼiisíih dooleeł, ndi biniinaa tʼáadoo bąąh náhoyołkaadí. (Colossians 3:21) Doo ákǫ́ǫ́ áátʼįįdgóogo bee bichʼįʼ hadoodzihgi tʼáadoo bináłdzidí. Doo yáʼátʼééhgóó nitsíkeesgi ałdóʼ bee bichʼįʼ yáłtiʼ. Doo bee bichʼįʼ yáłtiʼgóogo éí tʼáá ákótʼée dooleeł.

Niyáázh ayóó ádaa haniihgo yáłtiʼgo, éí doo bee bíká anilyeedgóogo ayóó áníshtʼé nízingo nitsíkees doo, áádóó tʼáá sáhí naʼadiltʼeʼgo yaa nídidoodááł. Bikʼis ádin doo. Ádaa hojiniihgo doo yáʼátʼéeh da áádóó baa yáhásinii átʼé bidohníigo hazhóʼó bee bichʼįʼ yáłtiʼ. (Proverbs 27:2) Shił hózhǫ́ǫ doo jinízingo éí shí ayóó áníshtʼé jiníigo doo łaʼda bidááhdóó ákozhdólzin da, bidohníigo bee nanohtin. Ayóóʼóʼóʼní bił nítʼiʼgo hazhóʼó nanohtin, áko éí yaa ahééh nízin doo.—Binahjįʼ naʼnitinii: Matthew 23:12.

Hódzą́ bee nanitin doo. Niheʼawééʼ tʼáá ałtsoní yókeedgo tʼóó baa jiiníiłgo tʼáá bí tʼéiyá ádaa nitsíkees yileeh. Haʼátʼíí shı̨́ı̨́ ayóó ílı̨́įgo shá nidahołniih níigo, ndi béeso bá ádin, íiyisíí bídin hwiindzinii bee chooʼı̨́įgi yaa ákonízingo íínóhsin. Hahgoda chʼaadiikah dohníigo, áajįʼ ahoolzhiizhgo ńtʼééʼ béeso bá ádin, doo yiniinaa nididoochxǫǫł da biniyé hazhóʼó bee bił hodoołnih. Achʼįʼ anáhóótʼiʼ haleehgo biiʼ haʼiildéehii átʼéii átʼéego yaa ákonízingo bee nanohtin.—Binahjįʼ naʼnitinii: Proverbs 22:6.

Ił hadleeʼ bee nanitin doo. “Tʼáadoo leʼé azhʼníláii éí haa yílyáii bilááh átʼéego baa hózhǫ́” haʼníigi niheʼawééʼ bił ííshjání íínóhsin. (Acts 20:35) Łaʼda naalyéhé bá hooghangóó doogáałgi bee bichʼįʼ anáhóótʼiʼígíí dóó bighan hashtʼedoolnííł nízinígíí bízhiʼ ádadííliił. Díí bíká anilyeedígíí bichʼįʼ diniyáago neʼawééʼ ákǫ́ǫ́ bił diiʼash. Baa nił hózhǫ́ǫgo áká anilyeedgi neʼawééʼ yaa ákonízin doo. Binááł kótʼéego nił hadleeʼgo neʼawééʼ aʼohgo éʼétʼé yíhoołʼaah.—Binahjįʼ naʼnitinii: Luke 6:38.