Díí áhoonííł jiní: Karen éí honeeni biniyé ahíʼiildeeʼ léiʼgi jiníyá lá. Tʼáadoo hodinaʼí, bił ahéé hojísinígíí łaʼ áháłní:

Hakʼis Jessica bizhééʼ hólóní léiʼ yíʼoołkąąhgo hachʼįʼ dah yooʼáałgo áháłní: “Nił honeeni doogoósh bééníldzid?”

Karen éí doo jinízin da ndi, Jessica éí hakʼis átʼé. Karen éí hakʼis doo kótʼéego shaa nitsíkees da doo nízin: “Éí atʼééd doo bóhoneedlı̨́į da lá.” Jó, Jessica éí diné yáʼátʼéhígíí jílı̨́. Ákó éí ajidlánígíí tʼáadoo átʼéhé da nahalin. Karen éí: ‘Tʼóó yeeʼ doodlı̨́įłii átʼé doo éí azeeʼ tsiʼnaʼiiłáii átʼée da,’ jinízin.

Ni Karen ánítʼı̨́įgoshąʼ, haa díínííł?

Kótʼéego hoł hooʼaʼgo éí hazhóʼó ádééhojílzinígíí binahjįʼ tʼáá ákogi ázhdoonííł. Ádééhojísingo éí tʼáá íiyisí hoł danilínígíí bá jizı̨́įgo óolyé. Éí hoł bééhózingo, hweʼiinaʼ joołtʼihígi tʼáá hó bee hóhólnííh, nááná łaʼ éí doo bee bóhólníih da.—1 Corinthians 9:26, 27.

Díí átʼéego nitsíikeesgo éí binahjįʼ nihidziil doo. Díí naʼídíkidígíí éí nihíká adoolwoł.

Díí hoł bééhoozingo éí ázhdooníiłgi doo hoł naaki nílı̨́į da doo.

DIYIN BIZAAD BIIʼDÓÓ ŁAʼ BAA HANEʼ: Yilʼaadii Paul éí díí yikʼeʼashchı̨́: “Azhą́ yátiʼ daatsʼí doo yiishchįįh da nidi, baa yáshtiʼígíí éí tsʼídá shił bééhózin.” (2 Corinthians 11:6) Paul Diyin Bizaad ayóo bił bééhózin ńtʼééʼ. Áko doo yáʼáshǫ́ǫ́góó há haʼiisdzíiʼ ndi, doo biʼdiiłʼáa da ńtʼééʼ.—2 Corinthians 10:10; 11:5.

ÁNÍTʼÉIIGI ÁDINÍLʼĮ́: Bee nílínígíí wóyahgi łaʼ ánílééh.

Yáʼádaatʼéehii bee nééhoʼdílzinígíí wóyahgi łaʼ ánílééh. (Díí átʼé nahalingo, ayóó jiiníbaʼ, ayóó nił hadleeʼ, ayóó naa ahódlí.)

Bee biʼoh jílínígíí tʼą́ą́ʼ hótąʼ łeh. Áko tʼą́ą́ʼ hótąʼígíí tʼóó bíhojiłníihgo, éí bá jizínę́ę yikʼi ádíhólníih yileeh.

DIYIN BIZAAD BIIʼDÓÓ ŁAʼ BAA HANEʼ: Paul éí yiʼoh danilínę́ę bił bééhózin ńtʼééʼ. Ako ání: “Shijéí tłʼáahdi Diyin God yee hasʼáanii tʼáá íiyisí bąą shił hózhǫ́. Nidi náánáłaʼ bee hazʼáanii shitsʼíís biiʼ hólǫ́ǫgo shił bééhózin, éí bee hazʼáanii shintsíkees yił anaʼahilʼı̨́įgo ádił niʼiidzííh yee hasʼáanii shiyiʼ hólóonii yisnááh áshósin.”—Romans 7:22, 23.

ÁNÍTʼÉIIGI ÁDINÍLʼĮ́: Biʼoh nílínígíí háiidígíí lá bindeeshnish nínízin?

Nichidí bitooʼ ásdįįdjįʼísh tʼóó tʼáá łáhígi nił ahééh hílyeed doo? Éí yeeʼ ayóó ílı̨́—doo hóyáanii tʼéiyá ákódoonííł!

Áko bíká ánítʼínígíí ádingo éí tʼóó tʼáá łáhígi ahídílʼis nahalin doo. Bíká ánítʼínígíí nee hólǫ́ǫgo éí bee náás yínááł doo.

DIYIN BIZAAD BIIʼDÓÓ ŁAʼ BAA HANEʼ: Paul kódííniid: “Áko doo tʼóó dzólníígóó yishwoł da.” (1 Corinthians 9:26) Paul éí doo tʼáá azlı̨́ı̨́ʼgóó beʼiinaʼ yoołtʼih da ńtʼééʼ, ndi hazhóʼó ádá nahaʼáago yikʼeh beʼiiná áyiilaa.—Philippians 3:12-14.

ÁNÍTʼÉIIGI ÁDINÍLʼĮ́: Díí yihahígíí biiʼ, ádííníiłgi bee ádá nahaʼáhígíí táaʼgo wóyahgi łaʼ bikááʼ ánílééh.

Íiyisíí bee sínízínígíí tʼáágéedgo éí tʼáá azlı̨́ı̨́ʼgóó yínáał doo. Danikʼis bił tʼáá azlı̨́ı̨́ʼgóó yínáałgo—éí bééhózínígo doo hazhóʼó ádééhonílzin da.

Azhą́ shı̨́ı̨́ ninaagóó tʼáá bí ádee nízinígíí yaa nidaakai ndi, bá sínízínígíí bikʼeh ááníił doo.

DIYIN BIZAAD BIIʼDÓÓ ŁAʼ BAA HANEʼ: God yá halneʼii Daniel éí tʼah nooséłí nilı̨́įgo bijéí ‘bee ádiih tsídzookéezgo,’ azhą́ shı̨́ı̨́ hakʼéí bitsʼá hoʼdeeltı̨́į ndi God bibee hazʼáanii bikʼeh hojíłʼı̨́ı̨́ ńtʼééʼ. (Daniel 1:8) Ákó Daniel éí ádá nihodeetʼánígíí binahjįʼ hweʼiinaʼ ájiilaa.

ÁNÍTʼÉIIGI ÁDINÍLʼĮ́: Haʼátʼíísh éí íiyisí bee sínízı̨́? Godísh yiinídlą́? Aooʼgo éí haʼátʼíí biniinaa? Haʼátʼíísh binahjįʼ éí God tʼáá aaníí hólǫ́ǫgo yiinídlą́?

God bikʼehgo oodáłígíísh ná yáʼátʼééh? Aooʼgo éí haʼátʼíí biniinaa?

Háiidígíísh nahonílin doo nínízin? Tʼįįhdígo nídíyołgo atʼąąʼ bił yóó anáyołígíí daatsʼí, doodaiiʼ tʼóó báhádzidgo níyol ndi, tʼiis niłdzilgo ííʼáhígíí doo haidiyoołhą́ął daaígíí daatsʼí? Hazhóʼó ádééhonílzingo éí tʼiisígíí nahonílin doo. Áko Háísh Ashtʼį? dinínę́ę nił ííshjání íidoolííł.