Psalm 119:1-176
Diyin God bibee hazʼáanii aláahgo yáʼátʼéehii
119 Tʼáadoo bee bikʼídahótʼahígóó deíkáahii éí bikʼidahojidlí, Bóhólníihii bibee hazʼáanii yikʼehgo deíkáahii éí ákódaatʼé!
2 Yee hahaasdzíiʼii yikʼeh dahółʼíinii índa bijéí tʼáá átʼé yee háká ádaatʼíinii éí bikʼidahojidlí.
3 Doo ádił daʼiilzííhgóó Bóhólníihii bikʼeh áhootʼéégóó deíkááh!
4 Nibikʼehgo iináanii bee nihá hwiiniłʼaʼgo haleebee deíníikáah dooleeł.
5 Bee nihoyíníʼáanii baa honisą́ągo shidziilgo áshiʼdólneʼ laanaa!
6 Ákohgo nibikʼeh óʼooʼníiłii tʼáá átʼé shił nilı̨́įgo doo tʼóó shaa yáhásingo áshidiʼdoolníił da.
7 Tʼáá ákogi átʼéego bee nihodiyíníʼáanii bóhoołʼą́ąʼgo shijéí tʼáá ákogi átʼéego naa hashniih doo.
8 Bee nihoyíníʼáanii bikʼeh honishʼı̨́į doo. Tsʼídá tʼááká yóóʼashidóóʼááł lágo!
Bóhólníihii bibee hazʼáanii bikʼeh hólʼı̨́
9 Haash yitʼéego diné ániid naagháii yigááłgóó doo yáʼádaashóonii ádąąh yitʼı̨́į doo? Nizaad bikʼehgo ádaa áhályą́ągo lą́ą.
10 Shijéí tʼáá átʼé bee háníshtʼı̨́ı̨́ nítʼééʼ. Nibikʼeh óʼooʼníiłii bitsʼą́ąjįʼ dah dooshaʼ lágo!
11 Doo nichʼįʼ ádił niʼiisíih da doo biniyé nizaad shijéí biiʼ nídéłʼı̨́ı̨́ʼ.
12 Bóhólníihii nílíinii, naa haʼniih leʼ! Bee nihoyíníʼáanii bínashiníłtin!
13 Bikʼeh hoogáałii bee hahídziihii tʼáá ałtso baa hweeshneʼ.
14 Jitʼíinii nináneelʼą́ąjįʼ baa hoł hózhónígíí nahalingo bee hahínídzíʼígíí bikʼehgo joogáałii éí baa shił nihoozhǫǫh.
15 Nibikʼehgo iináanii nabikʼítséskees doo, áádóó ánítʼéii shił nilı̨́į doo.
16 Bee nihoyíníʼáanii baa shił nihoozhǫǫh doo. Nizaad doo beidiyeeshnah da.
Bóhólníihii bibee hazʼáanii bee ił hózhǫ́
17 Ná naalʼaʼí nishłíinii shichʼįʼ nił hadleeʼgo shaa jiiníbaʼ, áko hinishnáago nizaad bikʼeh honishʼı̨́į doo.
18 Nibee hazʼáanii biyiʼdóó tʼóó bikʼedaʼayóii baa ákonisin doo biniyé shinááʼ ąą ánílééh.
19 Nahasdzáán bikááʼgóó déʼéyóní nishłı̨́; nibikʼeh óʼooʼníiłii shitsʼąą nídóółʼįįh yíilaʼ!
20 Tʼáá áłahjįʼ shiiʼ sizíinii nibikʼeh hoogáałii yídin nilı̨́įgo yínííł bił naashá.
21 Ádaa dahojiʼniihii éí hóyéeʼgo há hadaʼiisdzíiʼii dahodííníteh. Jó, éí nibikʼeh óʼooʼníiłii bitsʼádziiskai.
22 Yee shá nidahałtʼiʼii índa yee dashiʼíinii shitsʼą́ąjįʼ kónílééh, háálá bee hahíínídzíiʼii bikʼeh honishʼı̨́.
23 Azhą́ naatʼáanii danilíinii tʼóó nichǫ́ʼígo shaa yádaałtiʼ nidi, ná naalʼaʼí nishłíinii bee nihoyíníʼáanii yéego nabikʼítséskees.
24 Bee hahíínídzíiʼii baa shił nihoozhǫǫh; éí kótʼéego dashiłníinii ádaatʼé.
Bibee hazʼáanii tsʼídá bikʼeh honishʼı̨́į doo
25 Shiiʼ sizíinii doo náádooʼnééh átʼéégóó niʼjįʼ nihidíníitʼą́. Nizaad bee háínídzíiʼii bikʼehgo náshiiłnaah!
26 Yishááłgóó baa hweeshneʼgo shichʼįʼ ééhosínísįįd. Bee nihoyíníʼáanii bínashiníłtin!
27 Nibikʼehgo iináájí bikʼidiʼyiishtįįhgo áshíínísin. Áko tʼóó bikʼedaʼayóii ááníiłii baa yáshtiʼ dooleeł.
28 Shiiʼ sizíinii yínííł yéego yikʼee yicha. Nizaad bikʼehgo shidziilgo ánáshídlééh!
29 Naʼadloʼ bee ayiʼ honítʼiʼii shitsʼádiníʼaah, áádóó nibee hazʼáanii bee shaa jiiníbaah!
30 Tʼáá aaníí áhootʼééjí nidiníʼą́. Bikʼeh hoogáałii shilą́ąjįʼ hólǫ́ǫgo íínísin!
31 Bee hahíínídzíiʼii bíʼádiistsood. Bóhólníihii nílíinii, tʼááká tʼóó baa yáhásinígi áshóóleʼ lágo!
32 Nibikʼeh óʼooʼníiłii bikʼehgo yishwoł doo, háálá tʼáá ałtsojįʼ hózhǫ́ yéego shił ahojoobáʼígo nitsískees áshílééh!
Akʼidiʼdootı̨́ı̨́ł biniyé sohodizin
33 Bóhólníihii nílíinii, bee nihoyíníʼáanii bínashiníłtin, áko ashíyííłką́ bijı̨́įjįʼ bikʼeh honishʼı̨́į doo.
34 Nibee hazʼáanii bikʼeh honishʼı̨́į doo biniyé akʼidiʼyiishtįįhgo áshílééh; tʼáá aaníí, shijéí tʼáá átʼé bee bikʼeh honishʼı̨́į doo.
35 Nibikʼeh óʼooʼníiłii bikʼehgo shiyííłááł, háálá éí baa shił nihoozhǫǫh.
36 Bee hahíínídzíiʼii shijéí yídin nilı̨́įgo íínísin, adánoolníi dooleełígíí éí dooda!
37 Tʼáadoo biniyéhígóó danilíinii bitsʼą́ąjįʼ díníshʼı̨́įgo áshíínísin, áádóó náshiiłnaahgo nikʼehgo áhootʼééjí shiyííłáał dooleeł.
38 Nizaad bee háínídzíiʼii éí bee niʼdólzinii átʼéego ná naalʼaʼí bichʼįʼ bidziilgo ánílééh.
39 Yee shá nidahałtʼiʼii binásdzidígíí shá nahjįʼ kónílééh, háálá nibikʼeh hoogáałii yáʼádaatʼééh.
40 Jó, nibikʼehgo iináanii bídin nishłı̨́. Nitʼáá ákogi éʼétʼé bee náshiiłnaah!
Bóhólníihii bibee hazʼáanii baa hodzódlí
41 Bóhólníihii nílíinii, shaa aʼááh niizįįh! Éí nibee yisdáʼiildéehii nizaad bikʼehgo shaa diníʼaah.
42 Ákohgo shá nahałtʼiʼii bichʼįʼ bee hááhásdziih doo, háálá nizaad baa jííníshłí.
43 Áádóó saad tʼáá aaníinii tʼáá ałtso shizééʼdóó haólééł lágo, háálá nibikʼeh hoogáałii binahjįʼ shił chohooʼı̨́.
44 Áko nibee hazʼáanii tʼáá áłahjįʼ bikʼeh honishʼı̨́įgo hoolʼáágóó ahóyéelʼáa doo.
45 Áádóó doo shihodiitʼiʼgóó yisháał doo, háálá nibikʼehgo iináanii shił bééhodoozįįłgo háshtʼı̨́.
46 Áádóó ałdóʼ bee hahíínídzíiʼii aláahgo naatʼáanii danilíinii binááł bee yáshtiʼ doo, áádóó doo baa yánísin da doo,
47 áko nibikʼeh óʼooʼníiłii ayóóʼóóshʼní; éí baa shił nihoozhǫǫh doo.
48 Áádóó ałdóʼ nibikʼeh óʼooʼníiłii ayóóʼóóshʼnínígíí bíká dah dideeshʼnih, áádóó índa bee nihoyíníʼáanii nabikʼítséskees doo.
Bóhólníihii bibee hazʼáanii tsʼídá bee ił chohooʼı̨́
49 Ná naalʼaʼí nishłíinii nizaad bee shichʼįʼ háínídzíʼígíí binahjįʼ shił chohooʼı̨́įgo áshiinilaaígíí shá béénílniih.
50 Shichʼįʼ nidahwiiłnáago éí bee haʼííníshní, háálá nizaad bee náhiishʼnaʼgo hinishná.
51 Diné ádaa dahaʼniihii tʼáá nináʼdeetʼįįjįʼ tʼóó shaa daadloh, nidi nibee hazʼáanii doo bitsʼáoshaʼ átʼée da.
52 Bóhólníihii nílíinii, tʼáá ałkʼidą́ą́ʼ nibikʼeh hoogáałii bénáshniihgo bee haʼííníshní.
53 Diné doo yáʼádaashóonii nibee hazʼáanii yóóʼanídeidiʼáahgo bikʼee shił náhoochih.
54 Tʼóó kónígháníjįʼ kééhashtʼı̨́įgi bee nihoyíníʼáanii dashiyiin nítʼééʼ.
55 Bóhólníihii nílíinii, tłʼéeʼgo nízhiʼ bénáshniih, áádóó nibee hazʼáanii bikʼeh honishʼı̨́.
56 Díí shííʼ nilı̨́: nibikʼehgo iináanii bikʼeh honishʼı̨́.
Bóhólníihii bibee hazʼáanii nihił daʼílı̨́
57 Bóhólníihii éí shííʼ nilı̨́. Nizaad bikʼeh honishʼı̨́į doo, dííniid.
58 Shichʼoníníi dooleeł biniyé shijéí tʼáá átʼé bee nánooshkąąh; nizaad bikʼehgo shaa jiiníbaah.
59 Bee áníshtʼéii baa nitséskeesgo bee háínídzíiʼii bichʼįʼ dah nídiisdzá.
60 Tʼáadoo átʼah hwiindziní nibikʼeh óʼooʼníiłii bikʼeh hosíłʼįįd.
61 Diné doo yáʼádaashóonii shináshzhiizh, nidi nibee hazʼáanii doo beisénah da.
62 Tʼáá ákogi átʼéego nibikʼeh hoogáałii biniinaa tłʼéʼííłnihgo náádiishʼnahgo ahéheeʼ nándishʼniih doo.
63 Dandósinii áádóó nibikʼehgo iináanii yikʼeh dahółʼíinii tʼáá ałtso bikʼis nishłı̨́.
64 Bóhólníihii nílíinii, nahasdzáán tʼáá átʼéé nítʼééʼ aa aʼááh nínízinii bił hólǫ́; bee nihoyíníʼáanii bínashiníłtin.
Bóhólníihii bibee hazʼáanii yáʼátʼéehii éʼéłʼı̨́
65 Bóhólníihii nílíinii, ná naalʼaʼí nishłíinii nizaad bikʼehgo yáʼátʼéhígi áshiinilaa.
66 Yáʼátʼéehii nihiditʼaahígíí áádóó ił ééhózin bínashiníłtin, háálá nibikʼeh óʼooʼníiłii wooshdlą́.
67 Tʼah doo shichʼįʼ nahwiiʼnaah yę́ędą́ą́ʼ yóóʼííyáá nítʼééʼ, nidi kʼad nizaad bikʼeh honishʼı̨́.
68 Yáʼátʼéehii nílı̨́ áádóó yáʼátʼéehii baa naniná; bee nihoyíníʼáanii bínashiníłtin.
69 Diné ádaa dadzódlíii woochʼííd shá ádayiilaa, nidi shijéí tʼáá átʼé bee nibikʼehgo iináanii bikʼeh honishʼı̨́į doo.
70 Bijéí akʼah bikʼídaastiʼgo doo ádidahólʼáa da, nidi shí éí nibee hazʼáanii baa shił nihoozhǫǫh.
71 Bee nihoyíníʼáanii bóhwiideeshʼáłígíí biniyé shichʼįʼ nahwiiʼnáá nítʼéʼígíí shá yáʼátʼééh.
72 Óola áádóó béésh łigaii daashíínéelą́ąʼdi miildi ánéelą́ʼígíí biláahgo bee hosíníłʼáanii bee hahídziihígíí shił yáʼátʼééh.
Bóhólníihii bibee hazʼáanii doo haada yitʼée da
73 Nílaʼ bee áshiinilaago hashtʼeshiinilaa; nibikʼeh óʼooʼníiłii bóhwiideeshʼáłígíí biniyé akʼidiʼyiishtįįhgo áshílééh.
74 Dandósinii dashiiłtsą́ągo bił dahózhǫ́ǫ doo, háálá nizaad bee shił chohooʼı̨́.
75 Bóhólníihii nílíinii, tʼáá ákogi átʼéego nihodiyíʼaahgo áádóó naʼahódlíigo shichʼįʼ nahoyíníłnáaʼgo shił bééhózin.
76 Ná naalʼaʼí nishłíinii nánooshkąąhgo nizaad bikʼehgo aa aʼááh nínízinígíí bee haʼííníshníi leʼ.
77 Hinishnáa doo biniyé shaa aʼááh niizįįh, háálá nibee hazʼáanii baa shił nihoozhǫǫh.
78 Bíniʼdii diné ádaa dadzódlíii tʼóó baa yáhásinígi ádabiʼdólnééh, háálá tʼáadoo biniinaanígóó bindaʼadloʼgo bíighahí yee shaa nidahasneʼ, ákondi shí éiyá nibikʼehgo iináanii nabikʼítséskees.
79 Dandósinii áádóó bee hahíínídzíiʼii bił béédahózinii bíniʼ shaa hakááh.
80 Doo tʼóó shaa yáhásinígi áshidiʼdoolníił da biniyé bee nihoyíníʼáanii binahjįʼ shijéí tʼáadoo bee bikʼíhótʼahí da leʼ.
Yisdáʼdoodááł biniyé sohodizin
81 Shiiʼ sizíinii éí nibee yisdáʼiildéehii yídin nilı̨́; nizaad éí bee shił chohooʼı̨́.
82 Nizaad bíká díshʼı̨́įʼgo shinááʼ chʼééh nídítʼashgo ádíshní, Hahgoshąʼ haʼííníshníigo áshidíílííł?
83 Háálá tó abid éí łid biiʼjįʼ nahííłtsoozígíí nahonishłin sélı̨́ı̨́ʼ, ákondi bee nihoyíníʼáanii doo baa yisénah da.
84 Haa nízahgóoshąʼ ná naalʼaʼí hináa doo? Atídashiłʼíiniishąʼ hahgo baa nídíítʼįįł?
85 Diné ádaa dadzódlíii nibee hazʼáanii doo yikʼeh dahółʼíinii díkwíigo shı̨́ı̨́ shá hadahwiiznil.
86 Nibikʼeh óʼooʼníiłii tʼáá ałtso badaʼahódlí. Tʼáadoo biniinaanígóó shiʼanaʼí atídashiłʼı̨́; shíká anilyeed!
87 Nahasdzáán bikáaʼgi kʼadę́ę áníshdingo ádashilééh, nidi nibikʼehgo iináanii tʼah doo yóóʼadishʼaah da.
88 Aa aʼááh nínízinii bikʼehgo náshiiłnaah, áko bee hahíínídzíiʼii bikʼeh honishʼı̨́į doo.
Bóhólníihii bibee hazʼáanii baa hodzódlí
89 Bóhólníihii nílíinii, yáʼąąshdi hoolʼáágóó nizaad hashtʼeʼniilyá.
90 Naʼahódlíii éí oochííłgóó tʼáá ałtso bá hólǫ́; nahasdzáán bohoníłdzilgo íinilaago siʼą́.
91 Nibikʼeh hoogáałii bikʼehgo díí jı̨́įdi bee hahodítʼé, háálá tʼáá ałtsoní ná naalʼaʼí danilı̨́.
92 Nibee hazʼáanii doo baa shił nihoozhǫǫhgóogo éí shichʼįʼ nahwiiʼnáago dasétsą́ą doo nítʼééʼ.
93 Nibikʼehgo iináanii tsʼídá doo baa yidiyeeshnah da, háálá éí binahjįʼ náshiiniłnaʼ.
94 Nííʼ nishłı̨́, yisdáshíłteeh, háálá nibikʼehgo iináanii bíká áshtʼı̨́ı̨́ nítʼééʼ.
95 Diné doo yáʼádaashóonii dashidiyoołhééł biniyé shaa héeshjééʼ, nidi bee hahíínídzíiʼii hazhóʼó baa nitséskees dooleeł.
96 Hadaałtʼéii tʼáá ałtso bá nidahwiiztʼiʼgo yiiłtsą́, nidi nibikʼeh óʼooʼníiłii éí doo bá nihonítʼiʼ da.
Bóhólníihii bibee hazʼáanii ayóóʼóóʼní
97 Dooládóʼ nibee hazʼáanii ayóóʼóóshʼníi da! Shá bíighah nabikʼítséskeesgo shee eʼeʼááh.
98 Shiʼanaʼí danilíinii biláahgo nibikʼeh óʼooʼníiłii honisą́ągo áshósin, háálá hoolʼáágóó shił hólǫ́.
99 Nidashinitinii tʼáá ałtso biláahgo shił ééhózin, háálá bee hahíínídzíiʼii éí nabikʼítséskeesii ádaatʼé.
100 Hadaastihii nidi biláahgo shił ééhózin, háálá nibikʼehgo iináanii bikʼeh honishʼı̨́.
101 Nizaad bikʼeh honishʼı̨́į doo biniyé doo yáʼátʼééhgóó ádahootʼéii tʼáá ałtso doo bikékʼeh disháah da.
102 Nibikʼeh hoogáałii doo bitsʼánísháah da, háálá nashinínítą́ą́ʼ.
103 Dooládóʼ nizaad łikango néishłįh da; tsésʼná bitłʼizh bilááh átʼéego nizaadígíí shił ayóó áhálniih!
104 Nibikʼehgo iináanii bee shił niʼééhwiizįįh; éí bąą naʼadloʼgo áhooníłígíí tʼáá ałtso jooshłxá.
Bóhólníihii bibee hazʼáanii bee adinídíín
105 Shilą́ąjįʼ bee hoolʼiní bee adoodlał nahalingo nizaad bikʼehgo nihidishtaał, áko yishááłgóó bee shá adinídíín.
106 Ádee hadeesdzíiʼii biʼdeeshłííł: éí tʼáá ákogi átʼéego nibikʼeh hoogáałii bikʼeh honishʼı̨́į doo.
107 Tʼáá íiyisí shichʼįʼ nahwiiʼná; Bóhólníihii nílíinii, nizaad bikʼehgo náshiiłnaah!
108 Bóhólníihii nílíinii, tʼáá shí íinisingo shizaad nichʼįʼ nááháshniihii shá niizįįh, áádóó nibikʼeh hoogáałii bínashiníłtin.
109 Tʼáá áłahjįʼ sheʼiinaʼ shílákʼee siláago shá báhádzid, nidi nibee hazʼáanii doo baa yooshnéeh da.
110 Diné doo yáʼádaashóonii łoh shá nideizʼą́, nidi nibikʼehgo iináanii doo bitsʼą́ą́ʼ yóóʼiisháah da.
111 Bee hahíínídzíiʼii hoolʼáágóó shííʼ daazlı̨́ı̨́ʼ, háálá éí shijéí bee bił nihoozhǫǫh.
112 Tʼáá nihoolzhiizhjįʼ bee nihoyíníʼáanii tʼáá áłahjįʼ shijéí bee bikʼeh honishʼı̨́įgo íishłaa.
Bóhólníihii bibee hazʼáanii bee hasih hazʼą́
113 Naaki nilı̨́įgo nitsídaakeesii jooshłxá, nidi nibee hazʼáanii ayóóʼóóshʼní.
114 Nineʼ ahinishchéehii áádóó shinaageʼ nílı̨́; nizaad bee shił chohooʼı̨́.
115 Doo yáʼátʼééh ádaahníiłii, shitsʼánóhkááh, áko shiDiyin God bibikʼeh óʼooʼníiłii bikʼeh honishʼı̨́į doo.
116 Hinishnáa doo biniyé nizaad bikʼehgo chánah áshíínísin, áádóó bee shił chohooʼínígíí doo baa yánísin da leʼ!
117 Deesdzih biniyé chánah áshíínísin, áko bee nihoyíníʼáanii áłahjįʼ shił nilı̨́į doo!
118 Bee nihoyíníʼáanii yitsʼą́ą́ʼ yóóʼadahakáahii tʼáá ałtso yóóʼahidííníʼą́, háálá bindaʼadloʼii éí tʼáadoo nánídlíní da.
119 Nahasdzáán bikááʼgóó diné doo yáʼádaashóonii tʼáá ałtso ąąh hahidiłhı̨́hígi átʼéego nahjįʼ kóníłʼı̨́; éí bąą hahíínídzíiʼii ayóóʼóóshʼní.
120 Nikʼee shił yéʼígíí bąą shitah hoditłid, áádóó bee nihodiyíníʼáanii binásdzid.
Bóhólníihii bibee hazʼáanii bikʼeh hólʼı̨́
121 Tʼáá ákogi éʼétʼé índa doo haada yitʼéii ásdzaa; shide ádahósinii doo bichʼįʼ shiʼdííłnih da.
122 Ná naalʼaʼí nishłíinii yáʼátʼéehii shá dooleeł biniyé shá sínízı̨́; ádaa dadzódlíii tʼáadoo shide ádahósingo bá hosíníłʼání.
123 Nibee yisdáʼiildéehii índa nizaad tʼáá ákogi átʼéii bíká díshʼı̨́įʼgo shinááʼ nídíníłnah.
124 Aa aʼááh nínízinii bikʼehgo ná naalʼaʼí nishłíinii shaa áhólyą́ áádóó bee nihoyíníʼáanii bínashiníłtin.
125 Ná naalʼaʼí nishłı̨́; bee hahíínídzíiʼii shił bééhodoozįįł biniyé akʼidiʼyiishtįįhgo áshílééh!
126 Bóhólníihii nílíinii, kʼad ádííníłígíí baa hoolzhiizh, háálá nibee hazʼáanii tʼáadoo nánídlínígóó ádayiilaa.
127 Éí bąą nibikʼeh óʼooʼníiłii óola biláahgo, tʼáá aaníí, óola agháago yáʼátʼéehii nidi biláahgo ayóóʼóóshʼní.
128 Éí bąą nibikʼehgo iináanii tʼáá ałtso tʼáá ákogi ádaatʼé nisin; naʼadloʼgo áhooníłígíí tʼáá ałtso jooshłxá.
Bóhólníihii bibee hazʼáanii bikʼeh hólʼı̨́ nidzin
129 Bee hahíínídzíiʼii ayóó ádanóolnin; éí bąą shiiʼ sizíinii yikʼeh hółʼı̨́.
130 Nizaad ííshjání ííłʼínígíí bee iʼdiidlaad; diné doo dahóyáanii akʼidadiʼyiitįįhgo ádanileʼ.
131 Yéego hasdah nisingo nibikʼeh óʼooʼníiłii bídin nishłı̨́.
132 Nízhiʼ ayóóʼádayóʼníinii baa jiiníbaʼígi átʼéego shí ałdóʼ shikʼi nighaałgo shaa jiiníbaah.
133 Nizaad bikʼehgo yisháałgo áshílééh, áádóó doo ákwii éʼétʼé tʼáadoo shee ádíhólníhí doo.
134 Shide ádahósinii bitsʼą́ąjįʼ hááshíłteeh, áko nibikʼehgo iináanii bikʼeh honishʼı̨́į doo.
135 Ná naalʼaʼí nishłíinii niniiʼ bee shikʼi diʼniłdíín, áádóó bee nihoyíníʼáanii bínashiníłtin.
136 Tó nílı̨́ nahalingo shinákʼeeshtoʼ náálı̨́, háálá diné éí nibee hazʼáanii doo yikʼeh dahółʼı̨́į da.
Bóhólníihii bibee hazʼáanii doo haada yitʼée da
137 Bóhólníihii nílíinii, tsʼídá tʼáá ákogi ánítʼé, áádóó bee nihodiyíníʼáanii tʼáá ákogi ádaatʼé.
138 Bee hahíínídzíiʼii bee ádaa hólneʼii éí tʼáá ákogi ádaatʼé áádóó tʼáá íiyisí badaʼahódlí.
139 Nizaad baa hą́ą́h nisingo bíneeshdlínígíí tʼáá áshidoołdįįłgo shide átʼé, háálá shiʼanaʼí danilíinii nizaad yaa dayooznah.
140 Nizaad tʼáá íiyisí niłtólí yeeʼ; éí bąą ná naalʼaʼí nizaad ayóóʼáyóʼní.
141 Doo ayóó áníshtʼée da áádóó dashiʼı̨́, nidi nibikʼehgo iináanii doo baa yooshnéeh da.
142 Nitʼáá ákogi éʼétʼéii éí hoolʼáágóó tʼáá ákogi átʼé, áádóó nibee hazʼáanii éí tʼáá aaníinii átʼé.
143 Shide áhoodzaago yínííł shikʼiildoh, nidi nibikʼeh óʼooʼníiłii bee shił hózhóonii átʼé.
144 Bee hahíínídzíiʼii ahóyéelʼáágóó tʼáá ákogi ádaatʼé; akʼidiʼyiishtįįhgo áshílééh, áko hinishnáa doo.
Yisdáʼdoodááł biniyé sohodizin
145 Bóhólníihii nílíinii, shijéí tʼáá átʼé bee chánahgo nániisiskan. Shichʼįʼ ééhonísįįh! Bee nihoyíníʼáanii bikʼeh honishʼı̨́į doo.
146 Chánahgo nichʼįʼ sodiszin; yisdáshíłteeh, áko bee hahíínídzíiʼii bikʼeh honishʼı̨́į doo.
147 Tʼah yikáíhdą́ą́ʼ náádiishʼnahgo shíká iʼdoolwoł biniyé náʼooshkąąhgo sonídíszįįh. Nizaad bee shił chohooʼı̨́.
148 Nizaad nabikʼítséskees doo biniyé tłʼééʼ bíighah díníshʼı̨́įʼgo yiłkááh.
149 Aa aʼááh nínízinii bikʼehgo shiinééʼ shá diitsʼı̨́ı̨́h; Bóhólníihii nílíinii, bee nihodiyíníʼáanii bikʼehgo náshiiłnaah.
150 Doo yáʼádaashóonii yikékʼehjí deíkáahii shitʼááh nájah. Nibee hazʼáanii doo deeghánígóó yitsʼákai.
151 Nidi, Bóhólníihii nílíinii, kǫ́ǫ́ honílǫ́, áádóó nibikʼeh óʼooʼníiłii tʼáá ałtso tʼáá aaníinii ádaatʼé.
152 Bee hahíínídzíiʼii tʼáá ałkʼidą́ą́ʼ díí shił bééhózin: hoolʼáágóó bidahoníłdzilgo íinilaa.
Áká aʼdoolwoł biniyé náʼookąąh
153 Bee shichʼįʼ nahwiiʼnáanii baa ákoniizįįhgo yisdáshíłteeh, háálá nibee hazʼáanii doo baa yooshnéeh da.
154 Áyáłtiʼii nílı̨́įgo shá yáníłtiʼ áádóó yisdáshíłteeh; nizaad bikʼehgo náshiiłnaah!
155 Diné doo yáʼádaashóonii bitsʼą́ądi doo nádiinághánídi bee yisdáʼiildéehii hólǫ́, háálá bee nihoyíníʼáanii doo hádaatʼı̨́į da.
156 Bóhólníihii nílíinii, aa aʼááh nínízinígíí ayóó ádaatʼé; nibikʼeh hoogáałii bikʼehgo náshiiłnaah.
157 Atídashiłʼíinii índa shiʼanaʼí danilíinii éí tʼóó ahayóí, nidi bee hahíínídzíiʼii doo bitsʼáoshaʼ átʼée da.
158 Ninádaʼdiiʼaahii níshʼı̨́įgo dayíʼįįd, háálá nizaad doo yikʼeh dahółʼı̨́į da.
159 Nibikʼehgo iináanii tʼáá íiyisí ayóóʼóóshʼnínígíí baa nitsíníkees! Bóhólníihii nílíinii, aa aʼááh nínízinii bikʼehgo náshiiłnaah.
160 Nizaad tʼáá átʼé éí tʼáá aaníí, áádóó tʼáá ákogi átʼéego nibikʼeh hoogáałii tʼáá átʼé hoolʼáágóó hólǫ́.
Bóhólníihii bibee hazʼáanii baa ádinishtʼą́
161 Tʼáadoo biniinaanígóó naatʼáanii danilíinii atídashííłʼįįd, nidi shijéí bee nizaad dinisin.
162 Naalyeʼé daasʼnáanii łaʼ bikʼízhníyá nahalingo nizaad tʼáá íiyisí baa shił hózhǫ́.
163 Tʼáá ádzaagóó haneʼii jooshłxáago tʼóó baaʼih nisin, nidi nibee hazʼáanii éí ayóóʼóóshʼní.
164 Tʼáá ákogi átʼéego nibikʼeh hoogáałii biniinaa tsostsʼidi naa náháshʼnihgo anáʼátʼááh.
165 Nibee hazʼáanii ayóóʼádayóʼníinii éí tʼáá íiyisí hashtʼedadítʼé, áko tʼááłáʼí nidi doo azadabidínóoʼahí da.
166 Bóhólníihii nílíinii, nibee yisdáʼiildéehii bíká shił chohooʼı̨́, áádóó nibikʼeh óʼooʼníiłii biʼiishłaa.
167 Shiiʼ sizíinii éí bee hahíínídzíiʼii yikʼeh hóółʼįįd, áádóó tʼáá íiyisí ayóóʼóóshʼní.
168 Nibikʼehgo iináanii áádóó bee hahíínídzíiʼii bikʼeh hinishná, háálá bee áníshtʼéii tʼáá ałtso níníłʼı̨́.
Áká aʼdoolwoł biniyé sohodizin
169 Bóhólníihii nílíinii, hániʼdii chánahgo sodiszinígíí nidáahjįʼ ahosiiltsʼįįh; nizaad bikʼehgo akʼidiʼyiishtįįhgo áshíínísin!
170 Hániʼdii náʼooshkąąhígíí nidáahjįʼ ahosiiltsʼįįh; nizaad bikʼehgo yisdáshíłteeh.
171 Bíniʼdii naa hashniih doo, háálá bee nihoyíníʼáanii bínashiníníłtą́ą́ʼ.
172 Bíniʼdii nizaad baa hashneʼ doo, háálá nibikʼeh óʼooʼníiłii tʼáá átʼé tʼáá ákogi ádaatʼé.
173 Hániʼdii nílaʼ bee shíká adíílwoł biniyé hashtʼeʼ íínísin, háálá nibikʼehgo iináanii nidiníʼą́.
174 Bóhólníihii nílíinii, nibee yisdáʼiildéehii bídin nishłı̨́, áádóó nibee hazʼáanii baa shił nihoozhǫǫh.
175 Naa hashniih doo biniyé hániʼdii hinishná, áádóó nibikʼeh hoogáałii hániʼdii shíká iilyeed.
176 Dibé yóóʼííyáhígíí nahalingo yóóʼííyá; ná naalʼaʼí nishłíinii hashinítá, háálá nibikʼeh óʼooʼníiłii doo baa yooshnéeh da.
