2 Timothy 3:1-17
3 Díí baa ákonínízin doo! Nihoogháahjįʼ yoołkáałgo yéego achʼįʼ nahwiiʼnáa doo.
2 Háálá diné ayóóʼádadóʼníi doo, béeso yíchą́deídéelniʼ doo, ádaa dahaʼniih doo, beʼáshodahódliʼ doo, bizadahóchįʼ doo, bishchíinii doo yikʼeh dahółʼı̨́į da doo, doo ahééh danízin da doo, doo bił dahodiyin da doo,
3 doo ayóóʼádaʼóʼníi da doo, doo achʼįʼ bá nídahójǫǫh ádaatʼée da doo, tʼáá ádzaagóó aa nidahalneʼ doo, naʼageh yee tsiʼnaaldeeh doo, báádahadzid doo, yáʼádaatʼéehii deijoołáa doo,
4 yóóʼadaʼahidiitʼaah doo, tʼáá bizááká nidaakai doo, ayóó áníshtʼé danízin doo, Diyin God ayóóʼádayóʼníi doo yę́ęgi honeenida yíchą́dayídéelniʼ doo,
5 Diyin God kʼehgo dahináanii nidahalin nidi diyin kʼehgo iiná bibee adziil doo deinízin da doo. Diné ákódaatʼéhígíí bitsʼąą ádaa áhólyą́.
6 Éí bitahdóó asdzání bąąhági átʼéii biiʼ daahéełii índa adáhonooní tʼáá daʼníłʼąą ádaatʼéii nidabiniʼaahii dabighangóó diné łaʼ bił yah anídaakahgo nidabiłnééh.
7 Éí naʼnitin tʼáá bóhólníhígíí dayíistsʼą́ąʼgo yídahoołʼaah, nidi naʼnitin tʼáá aaníinii tsʼídá doo bił béédahoozı̨́ı̨́ʼ ádaatʼée da.
8 Diné éí Jániiz índa Jámbriiz wolyéii Mózes yikʼijįʼ naasdzil yę́ęgi átʼéego díí diné ałdóʼ tʼáá aaníinii yikʼijįʼ nidaaldzil, diné nichxǫ́ʼógo nitsídaakeesii, áádóó bidaʼoodląʼ doo ákótʼéégóó biniinaa Diyin God doo binízinii danilı̨́.
9 Éí Jániiz índa Jámbriiz bidooʼáháyąʼ bee bééhózin yę́ęgi átʼéego éí diné bidooʼádahayąʼ diné tʼáá ałtso bił béédahózin doo, áko tʼáadoo łaʼdeidoolíłí da.
Paul éí Timothy yąąh niiníláii
10 Nidi ni éí shinaʼnitin nił bééhózin, ááshníiłii, índa biniyé hinishnáanii, sheʼoodląʼ átʼéegi, nízaadgóó haʼííníshníigi, shibee ayóóʼóʼóʼníinii, shihaʼahóní átʼéegi,
11 shichʼįʼ nahoʼdiilnáago, tiʼhwiiséniiʼii ałdóʼ nił bééhózin. Ántiyakgi áádóó Aikóniyamgi índa Lístragi atíshiʼdoolʼįįd, índa atíshiʼdilʼı̨́įgo bichʼįʼ haʼiisisniidii baa ákoninizı̨́ı̨́ʼ! Nidi éí tʼáá ałtso bitsʼąą Bóhólníihii yisdáshííłtı̨́.
12 Christ Jesus bił łáʼí nishłı̨́įgo Diyin God kʼehgo iiná bee hinishnáa dooleeł daznízinii tʼáá ádzíłtso atídahoʼdilʼı̨́į doo,
13 nidi diné doo yáʼádaashóonii índa yóóʼadaʼniiʼáahii bindaʼadloʼgo índa bidaʼdeesdloʼgo tʼóó yówehda bąąhági ádaaníił dooleeł.
14 Nidi ni, bíhwiiniłʼą́ʼígíí índa yisínídląądígíí bidziilgo bee sínízı̨́. Háálá bitsʼą́ą́dóó bíhwiiniłʼą́ąʼii nił bééhózin,
15 áádóó tʼáá awééʼ nílı̨́ı̨́dę́ę́ʼ Diyin God bizaad bee akʼedaʼashchíinii nił bééhoozinígíí bee ahoʼniʼniyąądgo éí Christ Jesus yinídlánígíí bee yisdádíínáałgi yíneelʼą́ągo yínaniniłtin.
16 Diyin God bizaad bee akʼeʼashchíinii tʼáá ałtso Diyin God ił halneʼgo bee akʼedaʼashchı̨́, éí naʼnitin biniyé, adidooteh biniyé, kʼéhézdon ninádoodlóós biniyé, índa tʼáá ákogi éʼétʼé bóhooʼaah biniyé chooʼı̨́,
17 áko Diyin God bá diné chojooʼíinii doo bee hachʼįʼ anáhóótʼiʼí da doo, índa tʼáá ałtsojįʼ yáʼátʼééh ájooníił doo biniyé hashtʼeʼázdólzin doo.
