Bjalo ka ge leina Holo ya Mmušo le bolela, thuto ya motheo ya Beibele yeo e rutwago moo e lebiša tlhokomelo Mmušong wa Modimo—sehlogo sa bodiredi bja Jesu.—Luka 8:1.

Ke mafelo a borapedi bja therešo ditšhabeng. Mafelong ao, ke moo go rulaganywago modiro wa go bolelwa ga ditaba tše dibotse tša Mmušo. (Mateo 24:14) Diholo tša Mmušo di fapana ka bogolo le sebopego, eupša ka moka ga tšona ke meago e mebotse, tšeo tše dintši tša tšona di dirišwago ke diphuthego tša ka godimo ga e tee. Nywageng ya morago bjale, re agile Diholo tša Mmušo tše dikete tše masome (tekanyo ya tše hlano ka letšatši) e le gore re sepedišane le kgolo diphuthegong tša gabo rena. Se se kgonega bjang?—Mateo 19:26.

Di agwa ka meneelo yeo e ntšhwago sekhwameng sa tšona. Meneelo ye e romelwa ofising ya lekala e le gore tšhelete yeo e ka adingwa ke diphuthego tšeo di nyakago go aga goba go mpshafatša Holo ya Mmušo.

Di agwa ke baithaopi bao ba sa lefšego ba tšwago ditšong tšohle. Dinageng tše dintši, go rulagantšwe Dihlopha tša go Aga Diholo tša Mmušo. Dihlopha tša bašomi le baithaopi ba go aga ba hudugela diphuthegong tše dingwe nageng yona yeo, gaešita le go hudugela mafelong a lego lekatana, gore ba yo agela diphuthego tša moo Diholo tša Mmušo. Dinageng tše dingwe, go kgethilwe Dihlatse tše di nago le bokgoni gore di okamele modiro wa go aga le wa go mpshafatša Diholo tša Mmušo tikologong yeo di e abetšwego. Gaešita le ge ditsebi tše dintši tša mošomo wa diatla tša tikologong yeo di ithaopela go thuša ge go agwa Diholo tša Mmušo, ditho tša phuthego ya lefelong leo ke tšona di bopago karolo e kgolo ya bašomi. Se ka moka se kgonega ka baka la moya wa Jehofa le maiteko a batho ba gagwe ao a dirwago ka moya ka moka.—Psalme 127:1; Bakolose 3:23.

• Ke ka baka la’ng mafelo a rena a borapedi a bitšwa Diholo tša Mmušo?

• Go kgonega bjang gore Diholo tša Mmušo di agwe lefaseng ka bophara?