SEGEORGIA ke le lengwe la maleme a mathomo ao Beibele e ilego ya fetolelwa ka ona, sona gotee le Searmenia, se-Copt, Selatine, Sesiria le maleme a mangwe. Dingwalwa tša bogologolo tša Segeorgia tša Diebangedi, mangwalo a Paulo le Dipsalme ke tša magareng ga lekgolong la bohlano la nywaga C.E. goba pele ga moo. Mengwageng e mentši e latetšego, go fetolelwa le go tšweletšwa ga Beibele ka Segeorgia go ile gwa oketšega gomme seo sa dira gore go be le diphetolelo tše mmalwa. *

Beibele e ile ya ba le tutuetšo e kgolo dingwalweng le setšong sa batho ba Georgia. Ka mohlala, taba yeo e kwešago bohloko ya Kgošigadi Shushanik, yeo e ka bago e ngwadilwe mafelelong a lekgolo la bohlano la nywaga, e tsopotše dikarolo tše dingwe tša Beibele. Sereti seo se bitšwago Shota Rustaveli se ile sa ngwala sereto se setelele seo se bitšwago Vepkhvistqaosani (The Knight in the Panther’s Skin) mo e ka bago ka ngwaga wa 1220. Seretong seo o boletše ka dika tšeo Bakriste ba swanetšego go di bontšha. O ngwadile ka go ba le bogwera, go fana le go rata batho bao re sa ba tsebego, e lego dika tšeo le lehono di sa tšeelwago godimo kudu ke batho ba Georgia.