Mathata ao Barutwana ba Kopanago le Ona
Peter o thoma go se sa dudišega ge a ekwa gore morutiši wa gagwe yo a mo hlomphago kudu o thoma go ruta ka taba e itšego. Morutiši yo o sa tšwa go fetša go hlalosa kamoo thuto ya Charles Darwin ya gore dilo di itirile, e thušitšego batho gore ba kgone go kwešiša saense gabonolo le go ba lokolla go dithuto tšeo ba di dumelago tšeo go sa tsebjego gore di thomile kae. Gona bjale morutiši yoo o kgopela barutwana ba bangwe ka klaseng gore ba bolele gore ba nagana eng ka taba yeo.
Bjale Peter o swanelwa ke go dira phetho e boimanyana. Batswadi ba gagwe ba mo rutile gore Modimo o bopile lefase le dilo ka moka tšeo di phelago. Ba mo rutile le gore dilo tšeo Beibele e di rutago tša mabapi le tlholo ke nnete, le gore thuto ya gore dilo di itirile e no ba nonwane yeo e se nago bohlatse. Batswadi ba Peter le morutiši wa gagwe ka moka ba nyaka go mo thuša. Bjale potšišo ke gore: Peter o swanetše go tshepa mang?
Ngwaga le ngwaga lefaseng ka moka, bana ba lebeletšana le mathata a go swana le a dikolong tše dintši. Barutwana bao ba kopanago le bothata bja go swana le bja Peter ba swanetše go dira’ng? Ke nnete gore ba swanetše go tseba gore ba dumela go eng. Le gona ba swanetše go nyaka bohlatse bja go bona ge e ba dilo di itirile goba di bopilwe. Ka morago ga moo, ba itirele phetho.
Ge e le gabotse, Beibele e lemoša batho gore ba se ke ba no dumela dilo tšeo ba di rutwago ntle le go dira nyakišišo. E re: “Mang le mang yo a se nago temogo o dumela mantšu ka moka, eupša yo bohlale o šetša dikgato tša gagwe.” (Diema 14:15) Beibele e kgothaletša Bakriste go diriša ‘matla a bona a tlhaologanyo,’ e le gore ba kgone go iponela ka bobona, go bona ge e ba dilo tšeo ba di rutwago e le nnete.—Baroma 12:1, 2.
Poroutšha ye ga se ya direlwa go thekga dikereke tšeo di lekago go dira gore dikolong go rutwe thuto ya gore dilo di bopilwe ke Modimo. Go e na le moo, morero o mogolo wa yona ke go hlahlobišiša seo batho ba se rutago ka taba ya gore dilo tšeo di phelago di itirile, gomme seo Beibele e se rutago ka tlholo ke nonwane.
Poroutšheng ye re tlo bolela kudu ka sele, ka gore ke yona karolo e bohlokwa ya bophelo. O tlo kwa le gore go tlile bjang gore sele e be gona. O tlo kgopelwa gape gore o naganišiše gabotse gore ke ka baka la eng batho ba bangwe ba thekga thuto ya gore dilo di itirile.
Le ge batho ba na le dikgopolo tša go fapafapana, ka moka ga rena re swanetše go tseba karabo ya potšišo ye e rego: Na dilo tše di phelago di bopilwe, goba di itirile? Mohlomongwe o šetše o kile wa ipotšiša potšišo ye. Poroutšha ye e tla go thuša gore o hwetše bjo bongwe bja bohlatse bjoo bo thušitšego batho ba bangwe gore ba feleletše ba dumela gore dilo tše di phelago di bopilwe.
