GE Ntwa ya Bobedi ya Lefase e be e kgatlampana, Ngwanabo rena Elias le mosadi wa gagwe Josephine ba ile ba išwa pele ga bahlankedi ba mmušo kua Sukabumi yeo e lego ka Bodikela bja Java, ntlongkgolo ya mašole a Kempeitai, e lego mašole a Japane. Ba ile ba botšološiša André pele gomme ba mmotšiša dipotšišo tše dintši tše thata tša go swana le gore: “Dihlatse tša Jehofa le bomang? Na le ganetšana le mmušo wa Japane? Na le nyaka go tseba diphiri tša mmušo wa rena?”

André o ile a fetola ka gore: “Ke rena bahlanka ba Modimo Ramatlaohle, gomme ga go na phošo yeo re e dirilego.” Molaodi wa maphodisa o ile a tšea sabola ya mašole lebotong gomme a e emišetša godimo.

O ile a mo tšhošetša ka gore: “O ka dira’ng ge nka go bolaya?” André o ile a hlaba hlogo tesekeng ya ka ofising gomme a rapela ka pelong. Ka morago ga gore molaodi wa maphodisa a tšee nako e telele a homotše, o ile a thoma go sega gomme a re:  “O tloga o na le sebete!” Ke moka o ile a bitša Josephine. Ge molaodi wa maphodisa a ekwa gore bohlatse bja gagwe bo dumelelana le bja André o ile a goeletša ka gore: “Tlogang mo, ke a bona gore ga le nyake go tseba diphiri tša mmušo wa rena!”

Ka morago ga dikgwedi tše sego kae, André o ile a radiiwa ke ‘bana babo ba maaka’ gomme a golegwa. (2 Bakor. 11:26) Ka dikgwedi tše mmalwa, o be a phela ka go ja marathana a dijo ao a bego a a hwetša ka gare ga mokero wa go sepediša ditšhila wa ka seleng ya gagwe. Go sa šetšwe seo, balebeledi ba kgolego ba ile ba palelwa ke go mo dira gore a se sa botega. Ge Josephine a be a dumeletšwe gore a mo etele, André o ile a mo sebela a le ka kgolegong a re: “O se ke wa tshwenyega. Go sa šetšwe gore ba a mpolaya goba ba a ntokolla, ke tla dula ke botegela Jehofa. Go kaone ba nntšhe ka mo ke le setopo e sego ke le moeki.”

Ka morago ga gore André a fetše dikgwedi tše tshela a le kgolegong, o ile a ikemela pele ga Kgorokgolo ya Tsheko ya Jakarta gomme a lokollwa.

Ka morago ga mengwaga e 30, ge mmušo wa Indonesia o be o thibetše Dihlatse tša Jehofa gape, ramolao wa selete kua Manado yeo e lego ka Leboa la Sulawesi o ile a biletša André ka ofising ya gagwe gomme a mmotšiša gore: “Na o a tseba gore Dihlatse tša Jehofa di thibetšwe nageng ye?”

André o ile a araba ka gore: “Ee.”

Molaodi wa mmušo o ile a mmotšiša gore: “Na ga bjale o ikemišeditše go fetoša bodumedi bja gago?”

André o ile a boela pejana gomme a ipetha kgara. Ke moka a bolela a tiišitše ka ganong a re: “O ka mpolaya, eupša o ka se tsoge o dirile gore ke fetoše bodumedi bja ka.”

Ramolao wa selete o ile a laela André gore a tšwe ka ofising ya gagwe gomme a se sa mo tshwenya le ka letšatši la mohlolo.

Ka ngwaga wa 2000, ka morago ga gore André a fetše mengwaga e 60 e le mmulamadibogo yo a fišegago, o ile a hlokofala a na le mengwaga e 85.