Mopatriareka Jobo o hlaloswa e le yo a bego “a se na bosodi e bile a lokile.” (Jobo 1:1) Lota o be a bitšwa “moloki.” (2 Petro 2:8) Dafida yena go thwe o be a dira “se se lokilego” mahlong a Modimo. (1 Dikgoši 14:8) Lega go le bjalo, anke re hlahlobeng maphelo a baanegwa bao ba ka Beibeleng. Re tla bona gore (1) ba be ba dira diphošo, (2) re ka ithuta go gontši mehlaleng ya bona, le gore (3) batho ba sa phethagalago ba ka kgahla Modimo e le ka kgonthe.

Jobo o ile a welwa ke mathata a mantši ao a bego a bonagala a sepedišana le go hloka toka. O ile a ba le kgopolo e fošagetšego, a phetha ka gore Modimo o be a se na taba gore yena Jobo o dumela go Yena goba ga a dumele. (Jobo 9:20-22) Jobo o be a tloga a ikgodišitše gore o lokile moo e lego gore ba bangwe ba be ba ekwa eka o ipona a lokile go feta Modimo.—Jobo 32:1, 2; 35:1, 2.

Lota o ile a dikadika go dira phetho yeo e bego e bonagala e le molaleng e bile e le bonolo. O be a tshwenyegile kudu ka boitshwaro bjo bo gobogilego  bja batho ba Sodoma le Gomora, e bile boitshwaro bja bona bo be bo “kweša moya wa gagwe o lokilego bohloko.” (2 Petro 2:8) Modimo o ile a tsebiša gore o be a rerile go fediša metse yeo e mebe gomme a nea Lota sebaka sa gore a phologe le ba lapa la gagwe. O ka nagana gore Lota yo a tshwenyegilego e be e tla ba wa pele wa go tloga. Lega go le bjalo, o ile a dikadika motsotsong woo o bohlokwa kudu. Barongwa bao ba bego ba romilwe go tlo phološa Lota le ba lapa la gagwe ba ile ba swanelwa ke gore ba ba sware ka diatla ba ba ntšhetše ka ntle ga motse lefelong le le šireletšegilego.—Genesi 19:15, 16.

Lebakeng le lengwe Dafida o ile a palelwa ke go itshwara gomme a hlotlola le mosadi wa monna yo mongwe. Se sebe le go feta ke gore o ile a dira gore monna wa mosadi yoo a bolawe e le ge a be a leka go bipa molato wa gagwe. (2 Samuele, kgaolo 11) Beibele e re seo Dafida a se dirilego “e be e le se sebe mahlong a Jehofa.”—2 Samuele 11:27.

Jobo, Lota le Dafida, ka moka ba be ba dira diphošo, tše dingwe tša tšona e le diphošo tše dikgolo kudu. Eupša bjalo ka ge re tla bona, ba be ba kganyoga ka pelo ka moka go hlankela Modimo ka go kwa. Ba be ba ikemišeditše go bontšha gore ba be ba itshola le go dira diphetogo moo go nyakegago ditseleng tša bona. Lega go le bjalo, Modimo o ile a ba amogela. Le gona, ka kakaretšo Beibele e ba bitša banna ba botegago.

Re ka se pheme go dira diphošo ka ge re le batho ba sa phethagalago. (Baroma 3:23) Eupša ge re di dira, re swanetše go bontšha gore re a itshola ke moka re dire seo re ka se kgonago go lokiša ditaba.

Jobo, Lota le Dafida ba lekile bjang go lokiša diphošo tša bona? Jobo o be a botega pelong ya gagwe. Ka morago ga gore Modimo a bontšhane mabaka le yena, Jobo o ile a lokiša monagano wa gagwe o  fošagetšego gomme a gomiša mantšu a gagwe. (Jobo 42:6) Tsela yeo ka yona Lota a bego a lebelela boitshwaro bjo bo gobogilego bja batho ba Sodoma le Gomora e be e dumelelana ka botlalo le ditekanyetšo tša Modimo. Bothata e bile gore o tšere nakwana a sa bontšhe go lemoga gore boemo bo akgofile. O ile a feleletša a tšhabile metseng yeo e ahlotšwego gomme a efoga kahlolo ya Modimo. O ile a kwa gomme a se gadime le morago. Gaešita le ge Dafida a ile a dira phošo e kgolo ya go tshela molao wa Modimo, o ile a utolla seo se bego se tloga se le ka pelong ya gagwe ka go itshola go tšwa pelong le go kgopela Modimo gore a mo gaugele.—Psalme 51.

Tsela yeo Modimo a bego a lebelela banna bao ka go ba amogela e dumelelana le tekatekano yeo a nago le yona ka dilo tšeo a di letetšego bathong bao ba sa phethagalago. Modimo “o tseba gabotse kamoo re bopegilego ka gona, a gopola gore re lerole.” (Psalme 103:14) Ka gona, ge e ba Modimo a tseba gore re ka se kgone go phema go dira diphošo, gona o letetše gore re dire’ng?

Keletšo yeo Dafida a e filego morwa’gwe Solomone e re bontšha tsela ya kamoo re ka kgahlago Modimo. O itše go yena: “Wena Solomone morwa wa ka, tseba Modimo wa tatago gomme o mo hlankele ka pelo e feletšego.” (1 Dikoronika 28:9) Pelo e feletšego ke’ng? Ke pelo e ratago Modimo gomme e ikemišeditše go nyaka go tseba le go dira thato ya gagwe. Ga se pelo e phethagetšego, eupša ke pelo yeo e kganyogago go hlankela Modimo ka go kwa le yeo e ikemišeditšego go phošollwa. Go rata ga Jobo Modimo le go kganyoga go mo kwa go ile gwa mo dira gore e be yo ‘a se nago bosodi,’ Lota yena gwa mo dira “moloki” gomme Dafida gwa mo dira yo a “[dirago] feela se se lokilego” mahlong a Modimo. Gaešita le ge ba be ba dira diphošo, ba be ba kgona go kgahla Modimo.

Ka gona ge e ba re na le dikgopolo tše mpe tšeo re dumago eka nkabe di sa ka tša rotoga menaganong ya rena goba re bolela dilo tšeo re itsholelago tšona goba re dira dilo tšeo ka morago re lemogago gore di fošagetše, anke re matlafatšweng ke mehlala yeo e sa tšwago go ahlaahlwa. Modimo o a tseba gore ga bjale ga se ra phethagala. Lega go le bjalo, o letetše gore re mo rate gomme re katanele go mo kwa. Ge e ba re dira se ka pelo e feletšego, re ka kgodišega gore le rena re ka kgahla Modimo.