GE E ba o sa tšwa go tsena lenyalong, na o ile wa lebeletšana le ditlhohlo tše swanago le tše? Na go bonagala eka molekane wa gago ka ponyo-ya-leihlo a ile a thoma go ba le diphošo le mafokodi ao a bego a se gona ge le be le sa le lefereyong? O ka fokotša bjang mafelelo a “mathata a letšatši le letšatši ao banyalani ba tlago go ba le ona”?—1 Bakorinthe 7:28, Today’s English Version.

Sa pele, o se ke wa letela gore ka gobane le nyalane, wena le molekane wa gago gatee-tee le fetogile ditsebi tša bophelo bja lenyalo. O ka fo ba o ile wa hwetša bokgoni bja go dirišana le batho ge o be o se lenyalong, e bile mohlomongwe bo ile bja kaonefala ge o be o le lefereyong. Lega go le bjalo, lenyalo le tla leka bokgoni bjoo ka ditsela tše difsa gomme gwa nyakega gore o hwetše bokgoni bjo bofsa. Na o tla dira diphošo? Ee, go bjalo. Na o tla hwetša bokgoni bjo bo nyakegago? Ee, o tla bo hwetša!

Tsela e kaone-kaone ya go hwetša bokgoni le ga e le bofe ke ka go botšiša motho yo a nago le bokgoni bjoo gomme o diriše keletšo yeo a go neago yona. Setsebi se segolo kudu sa lenyalo ke Jehofa Modimo. Go ba gona, ke Yena yo a re bopilego re e-na le kganyogo ya go nyala. (Genesi 2:22-24) Ela hloko kamoo Lentšu la gagwe, e lego Beibele, le ka go thušago ka gona go lebeletšana le ditlhohlo le go hwetša bokgoni bjo o bo nyakago go dira gore lenyalo la gago le swarelele le go fetela ka kua ga ngwaga wa mathomo.

Go na le ditlhohlo dife?

Keiji, * monna yo a lego lenyalong wa Japane, ka dinako tše dingwe o  be a lebala gore diphetho tšeo a di dirago di kgoma mosadi wa gagwe. O re: “Ke be ke amogela ditaletšo ntle le go botšiša mosadi wa-ka. Ke be ke tla lemoga ka morago gore o be a ka se kgone go ya moo re laleditšwego gona.” Allen, monna yo a lego lenyalong wa Australia, o re: “Ke be ke nagana gore ga se gwa swanela gore monna a botšiše mosadi wa gagwe pele a dira diphetho.” Se e ile ya ba tlhohlo go yena ka baka la setlogo sa gagwe. Dianne, wa Brithania, le yena o bile le boemo bjo bo swanago. O re: “Ke be ke tlwaetše go kgopela ba lapa lešo keletšo. Ka gona, mathomong ke be ke botšiša bona go e na le go botšiša monna wa-ka ge ke be ke dira diphetho.”

Tharollo ke efe?

Gopola gore Jehofa Modimo o lebelela banyalani e le “nama e tee.” (Mateo 19:3-6) Mahlong a gagwe, ga go na tswalano e nngwe ya batho yeo e lego bohlokwa go feta ya magareng ga monna le mosadi! Go boloka tswalano yeo e le matla, poledišano e botse e bohlokwa.

Monna le mosadi ba ka ithuta mo gontši ka go hlahloba tsela yeo Jehofa Modimo a ilego a boledišana le Aborahama ka yona. Ka mohlala, hle bala poledišano ye yeo e begilwego go Genesi 18:17-33. Ela hloko gore Modimo o ile a godiša Aborahama ka ditsela tše tharo. (1) Jehofa o hlalositše seo a bego a ikemišeditše go se dira. (2) O ile a theetša ge Aborahama a be a hlalosa pono ya gagwe. (3) Go fihla bokgoleng bjo bo kgonegago, Jehofa o ile a fetoša tsela ya gagwe ya go dira dilo a e dumelelanya le kgopelo ya Aborahama. O ka diriša bjang mokgwa o swanago ge o boledišana le mosadi wa gago?

Go na le tlhohlo efe?

Go ithekgile ka lapa la geno goba setšo, o ka ba o tlwaetše go bolela dipono tša gago ka go tia, goba o sa šetše. Ka mohlala, Liam, wa Yuropa, o re: “Moo ke tšwago gona, batho gantši ga ba šedi. Tsela ya-ka ya go se šetše ge ke itlhalosa gantši e be e nyamiša mosadi wa-ka. Ke ile ka swanelwa ke go ithuta go ba bonolo.”

Tharollo ke efe?

O se ke wa nagana gore molekane wa gago o nyaka go boledišwa ka tsela yeo o e tlwaetšego. (Bafilipi 2:3, 4) Keletšo yeo moapostola Paulo a e neilego moromiwa e šoma gape le go batho bao ba sa tšwago go nyalana. O ngwadile  gore: “Mohlanka wa Morena ga se a swanela go lwa, eupša o swanetše go ba bonolo.” Ka Segerika sa mathomo, lentšu leo le fetoletšwego e le “bonolo” gape le ka fetolelwa e le go ba šedi. (2 Timotheo 2:24) Go ba šedi ke bokgoni bja go lemoga go nyakega ga go lebeletšana le boemo ka kelohloko le go swaragana le boemo ka botho, ntle le go baka kgopišo.

Go na le tlhohlo efe?

Monna mathomong a ka diriša bohlogo bja gagwe ka tsela yeo e kwešago mosadi wa gagwe bohloko, goba mosadi a ka ba a se a tlwaela go dira ditšhišinyo ka šedi. Ka mohlala, Antonio, monna yo a lego lenyalong wa Italy, o re: “Tate o be a boledišana le mma ka sewelo mabapi le diphetho tša lapa. Ka gona mathomong, ke be ke buša lapa la-ka bjalo ka ge eka ke be ke le kgoši.” Debbie, mosadi yo a lego lenyalong wa Canada, o re: “Ke be ke nyaka gore monna wa-ka e be sethakga. Eupša boemo bja-ka bja kgopolo bja go laola bo be bo mo dira gore a ngangabale.”

Tharollo bakeng sa monna ke efe?

Banna ba bangwe ba lego lenyalong ba nagana gore ge Beibele e re basadi ba ikokobetše e ra gore ba swanetše go kwa bjalo ka ngwana ge a e-kwa motswadi wa gagwe. (Bakolose 3:20; 1 Petro 3:1) Lega go le bjalo, Beibele e bolela gore monna o tla “[kgomarela] mosadi wa gagwe, gomme ba babedi ba e tla ba nama e tee”; ga e bolele se se swanago ka motswadi le ngwana. (Mateo 19:5) Jehofa o hlalosa mosadi e le modiriši, goba modirišani, wa monna wa gagwe. (Genesi 2:18) Ga go moo a hlalosago ngwana e le modiriši, goba modirišani, wa motswadi.  Na o nagana gore ge e ba monna a swara mosadi wa gagwe bjalo ka ngwana o hlompha thulaganyo ya lenyalo?

Ge e le gabotse, Lentšu la Modimo le go kgothaletša gore o sware mosadi wa gago ka tsela yeo Jesu a swarago phuthego ya Bokriste ka yona. O ka dira gore go be bonolo go mosadi wa gago go go lebelela o le hlogo ya gagwe ge e ba (1) o sa letele gore a ikokobeletše wena ntle le bosodi di tloga fase le go (2) mo rata bjalo ka ge o rata mmele wa gago, gaešita le ge mathata a tšwelela.—Baefeso 5:25-29.

Tharollo bakeng sa mosadi ke efe?

Amogela gore ga bjale monna wa gago ke hlogo ya gago yeo e kgethilwego ke Modimo. (1 Bakorinthe 11:3) Ge o hlompha monna wa gago, o hlompha Modimo. Ge o gana bohlogo bja gagwe, ga o utolle feela kamoo o ikwago ka gona ka monna wa gago eupša o utolla le kamoo o ikwago ka gona ka Modimo le dinyakwa tša gagwe.—Bakolose 3:18.

Ge le boledišana ka mathata a magolo, ithute go hlasela bothata—e sego semelo sa monna wa gago. Ka mohlala, Mohumagadi Esitere o be a nyaka gore monna wa gagwe e lego Kgoši Ahasiwerosi a lokiše go hloka toka mo go itšego. Go e na le go mo hlasela ka go lebanya, o ile a boledišana le yena ka bohlale. Monna wa gagwe o ile dumela tšhišinyo ya gagwe gomme mafelelong a dira se se nepagetšego. (Esitere 7:1-4; 8:3-8) Go bonagala monna wa gago a tla ithuta go go rata ka mo go tseneletšego ge e ba (1) o mo nea nako ya go tlwaelana gakaone le boikarabelo bja gagwe bjo bofsa bjalo ka hlogo ya lapa le (2) go mo swara ka tlhompho, gaešita le ge a dira diphošo.—Baefeso 5:33.

Go ithuta go dula o e-na le tswalano e thabišago le e leka-lekanego ya lenyalo go swana le go ithuta go ragela paesekele. O letela go fela o e-wa ge o dutše o hlagolela kgodišego bjalo ka moragedi wa paesekele. Ka mo swanago, o swanetše go letela go dira diphošo tšeo di lešago dihlong ge o dutše o hwetša phihlelo lenyalong.

Dula o e-na le metlae. Tšeela dipelaelo tša molekane wa gago godimo, eupša o ithute le go sega diphošo tša gago. Diriša dibaka tšeo di tšwelelago tša go dira gore molekane wa gago a thabe ngwageng wa lena wa mathomo wa lenyalo. (Doiteronomio 24:5) Godimo ga tšohle, dumelelang Lentšu la Modimo le hlahla tswalano ya lena. Ge le dira seo, lenyalo la lena le tla tia ngwaga le ngwaga.