Modimo o file batho mpho e botse kudu ya gore ba kgone go boledišana le yena, le gore ba kgone go mmotša selo se sengwe le se sengwe ge ba mo rapela. Moporofeta Dafida o ile a rapela gore: “Wena Mokwi wa thapelo, go wena go tla tla batho ba mehuta ka moka.” (Psalme 65:2) Eupša re swanetše go rapela bjang gore Modimo a kwe dithapelo tša rena le go di araba?

Ge o rapela Modimo o nnoši, se se go thuša gore o mo tšhollele seo se lego ka pelong ya gago o sa mo fihlele selo. (Psalme 62:8) Modimo o thaba kudu ge re sa tšhabe go mmotša selo se sengwe le se sengwe ge re mo rapela.

Le ge Modimo re mo reta ka ditsela tša go fapafapana, go swana le gore Morena, Tate le ka ditsela tše dingwe, o na le leina le tee feela. Ekisodo 6:3 e re: “Ke be ke fela ke iponagatša go Aborahama, Isaka le Jakobo ke le Modimo Ramatlaohle, eupša ge e le mabapi le leina la ka e lego Jehofa, ke be ke se ka itsebiša go bona ka botlalo.” Leina le la Jehofa le tšwelela ka makga ao e ka bago a 7 000 ka Mangwalong a Makgethwa. Baporofeta ba bantši ba be ba bitša Modimo ka leina la gagwe ge ba be ba mo rapela goba ge ba be ba bolela ka yena. Ka mohlala, Amose o ile a bolela ka Modimo gore: “Yena yo a agago manamelo a gagwe magodimong, le moago wa gagwe ka godimo ga lefase . . . leina la gagwe ke Jehofa.” (Amose 9:6) Le rena ge re rapela, re swanetše go bitša Modimo ka leina la gagwe, e lego Jehofa.

Modimo o kgona go kwešiša seo re se naganago le kamoo re ikwago ka gona go sa šetšwe gore re bolela leleme lefe. Mangwalo a gagwe a Makgethwa a re: “Modimo ga a bebe sefahlego (goba ga a kgetholle), eupša setšhabeng se sengwe le se sengwe motho yo a mmoifago gomme a dira se se lokilego o a amogelega go yena.”—Ditiro 10:34, 35.

Eupša ga se gore thapelo ke yona feela yeo e ka dirago gore Modimo a re amogele. Dihlogong tše di latelago, re tlo kwa gore ke dilo dife tše dingwe tšeo re swanetšego go di dira gore Modimo a re amogele.