GE E ba wena goba motho yo o mo ratago a swerwe ke bolwetši bjo šoro, seo se ka gateletša kudu. Godimo ga bolwetši bjoo, o ka imelwa maikwelong le go swanelwa ke go kgotlelela mathata a mangwe. O ka hlorwa boroko le go gateletšwa ke go dula o eya ngakeng, go se hwetše kalafo ya maleba goba go se kgone go e patela le ditlamorago tše bohloko tšeo di bakwago ke dihlare tša kalafo. Go imelwa monaganong moo go bakwago ke go swarwa ke bolwetši bjo šoro go ka dira gore o ikwe o se sa nyaka go phela.

Re ka thušwa ke eng go kgotlelela ge re babja o šoro? Batho ba bantši ba thušitšwe kudu ke go rapela Modimo le go bala ditemana tša Beibele tšeo  di homotšago. Re ka thušwa gape ke ba lapa le bagwera bao ba re ratago le go re thekga.

Robert, yo a nago le mengwaga e 58, o re: “Ge o swerwe ke bolwetši bjo šoro, ithekge ka Jehofa Modimo. Ke yena a tlago go go thuša go kgotlelela. Rapela gomme o mmotše kamoo o ikwago ka gona. Mo kgopele gore a go nee moya wa gagwe o mokgethwa. Mo kgopele gore a go fe matla a go kgotlelela bolwetši bja gago ka pelo e tšhweu ge o dutše o kgothatša ba lapa la gago.

“Go thuša kudu ge ba lapa ba go thekga. Letšatši le lengwe le lengwe ba a mphounela gomme ba mpotšiša gore ke tsoga bjang. Ke kgothatšwa ke bagwera ba bantši bao ba dulago kgole le kgauswi. Ba dira gore ke ikwe ke le kaone, gomme seo se dira gore ke thabele bophelo.”

Ge o etela mogwera wa gago yo a babjago, gopola seo Linda a se boletšego. O itše: “Ga se gore motho yo a babjago o dula a nyaka go bolela ka bolwetši bja gagwe, le yena o nyaka go thabela bophelo. Ka gona, bolela le yena ka dilo tšeo le tlwaetšego go bolela ka tšona ge a sa babje.”

Ka matla ao Modimo a re fago ona le khomotšo yeo re e hwetšago ka go bala Beibele, gotee le thekgo e lerato ya ba lapa le bagwera, re ka kgona go thabela bophelo le ge re swerwe ke bolwetši bjo šoro.