Go a kgonega go fenya lehloyo ka thušo ya Modimo. Moya wa gagwe o mokgethwa o ka re thuša go ba le dika tšeo re ka se kgonego go ba le tšona ka borena. Go e na le gore re leke go fenya lehloyo ka borena, go ka ba kaone ge eba re ka tlogelela Modimo gore a re thuše. Ge eba re ka dira bjalo, re tlo ikwa go swana le moapostola Paulo, yo a ngwadilego gore: “Dilong tšohle ke na le matla ka baka la yo a mphago matla.” (Bafilipi 4:13) Ka nnete, le rena re tlo kgona gore : “Thušo ya ka e tšwa go Jehofa.” —Dipsalme 121:2.

Kgopela Jehofa ka thapelo gore a go fe moya o mokgethwa. (Luka 11:13) Mo kgopele gore a go thuše gore o be le dika tše di botse. Ithute ka dika tše bjalo ka lerato, khutšo, go se fele pelo, le boitshwaro ka Beibeleng, e lego dika tšeo di ka go thušago gore o se sa ba le lehloyo. Nyaka ditsela tšeo o ka dirišago dika tše mo bophelong bja gago. O gwerane le batho bao ba nyakago go ba le dika tšeo. Bagwera bao, ba ka go “hlohleletša leratong le medirong e mebotse.”—Baheberu 10:24