KUA India, torotswaneng ya Gujarat, go be go na le monna yo a bitšwago John. Mafelelong a mengwageng ya bo-1950, tatagwe o ile a kolobetšwa gore e be Hlatse ya Jehofa. John, bana ba gabo ba bahlano le mmago bona, e be e le ditho tše di fišegago tša kereke ya Roma Khatolika. Ka go re’alo ba be ba hloile bodumedi bja tatago bona.

Ka letšatši le lengwe tatago John o ile a roma John gore a mo išetše lengwalo go mogwera wa gagwe wa ka phuthegong. Eupša mesong yeo, John o ile a re a bula toromo ya tšhipi, a itshega monwana. Lega go le bjalo, ka ge a be a nyaka go kwa tatagwe, o ile a no ipofa ka lešela monwaneng woo gomme a sepela ka maoto a iša lengwalo leo.

Ge John a fihla lapeng leo, o ile a hwetša mosadi wa mogwera wa tatagwe, yoo le yena e bego e le Hlatse ya Jehofa. Ge mosadi yoo a tšea lengwalo leo, o ile a bona gore John o gobetše monwana gomme a mmotša gore o nyaka go mo thuša. O ile a tla le mokotla wo o swarago dihlare, a hlatswa ntho ya gagwe gomme a bofa monwana woo. Ke moka o ile direla John teye, gomme a bolediša le yena ka Beibele ba dutše ba enwa teye yeo.

Ge John a dutše a ekwa ditaba tše, o ile a thoma go se sa hloya Dihlatse tša Jehofa. O ile a botšiša mosadi yo dilo tše pedi tšeo Dihlatse tša Jehofa di di dumelago, e lego dilo tšeo di bego di fapane le seo a bego a se rutwa kerekeng. John o ile a mmotšiša ge e ba Jesu e le Modimo, le ge e ba Bakriste ba swanetše go rapela Maria. Ka ge mosadi yoo a lemogile gore John ke Mogujarati, o ile a mo araba a diriša Beibele gomme a mo nea pukwana ya sehlogo se se rego: “This Good News of the Kingdom.”

Ka morago ga moo, John o ile a bala pukwana yeo gomme a kwa gore seo a bego a se bala e be e le therešo. O ile a ya go moruti wa kereke yeo a bego a e tsena gomme a mmotšiša dipotšišo tšela tše pedi. Gateetee ke ge moruti yoo a galefa gomme a mo foša ka Beibele, a re: “O fetogile Sathane akere! Mpontšhe gore ke kae mo Beibele e rego Jesu ga se Modimo. Mpontšhe moo e rego ga se ra swanela go rapela Maria. Ke re mpontšhe!” John o ile a tšhošwa ke tsela yeo moruti yoo a ilego a itshwara ka yona gomme a mmotša gore: “Nka se sa le bea kerekeng ya Khatolika.” Ka nnete o ile a se sa le bea!

John o ile a thoma go ithuta le Dihlatse tša Jehofa, a emela borapedi bja therešo gomme a thoma go hlankela Jehofa. Ge nako e dutše e eya, ditho tše dingwe tša lapa la gabo le tšona e ile ya ba Dihlatse tša Jehofa. Le lehono, ka morago ga mengwaga e 60, John o sa na le lebadi monwaneng wola a ilego a itshega wona. Ka lethabo, o gopola tiro e nyenyane ya botho bja Bokriste yeo e ilego ya mo dira gore a be borapeding bja therešo.​—2 Bakor. 6:4, 6.