BAEPI ba marope ba ile ba hwetša ditena tše dintšintši tša Babilona ya bogologolo tšeo di bego di dirišitšwe go aga motse woo. Go ya ka moepi yo mongwe wa marope yo a bitšwago Robert Coldewey, ditena tšeo di be di foromiwa ka ntle ga motse, moo go bego go na le letsopa le lebotse le makhura a mantši.

Baepi ba marope ba hweditše le bohlatse bja gore baetapele ba mmušo wa Babilona ba be ba diriša dibešo tšeo go dira selo se sengwe se kgopo. Paul-Alain Beaulieu e lego moprofesara yo a tsebago ka histori le leleme la Asiria ya kgale kua Yunibesithi ya Toronto, o re: “Mengwalo ya Babilona . . . e bontšha gore kgoši e be e laela gore bao ba sa mo kwego, goba bao ba bontšhago gore ba nyatša dilo tše kgethwa ba swanetšwe ke go lahlelwa ka sebešong gomme ba fišwe.” Ka mohlala, mongwalo o mongwe wa nakong ya Kgoši Nebukadinetsara, o re: “Ba fedišeng, ba tšhumeng, ba gadikeng, . . . ka gare ga sebešo . . . dirang gore muši wa bona o ye godimo, gomme le ba bolayeng ka go ba lahlela mollong.”

Se se gopotša babadi ba Beibele ka seo go ngwadilwego ka sona go Daniele kgaolo 3. Re bala gore Kgoši Nebukadinetsara o ile a hloma seswantšho se segolo sa gauta molaleng wa Dura ka ntle ga motse wa Babilona. Ge masogana a mararo a Baheberu e lego Shaderaka, Meshaka, le Abedinego ba gana go khunamela seswantšho seo, Nebukadinetsara o ile a galefa, gomme a laela gore sebešo se bešeletšwe “ka makga a šupago go feta ka mo go tlwaelegilego,” gomme masogana ao a mararo a lahlelwe “sebešong seo se tukago mollo.” Morongwa yo matla o ile a ba phološa gomme ba se hwe.—Dan. 3:1-6, 19-28.

Ditena tšeo di hweditšwego Babilona, le tšona di bontšha gore Beibele e nepagetše. Ditena tše dintši tšeo di hwetšwago moo di na le mengwalo mo godimo ga tšona yeo e tumišago kgoši. O mongwe wa mengwalo yeo o balega ka gore: “Nebukadinetsara, Kgoši ya Babilona . . . ntlo ya bogoši yeo nna kgoši e kgolo ke e agilego . . . eka ditlogolwana tša ka di ka buša go yona go ya go ile.” Mantšu a a swana le ao re a hwetšago go Daniele 4:30, moo Nebukadinetsara a ikgantšhago ka gore: “Na ye ga se Babilona e Kgolo yeo e agilwego ke nna ka matla a ka a magolo, ke e agela mošate wo le seriti sa ka se segolo?”