SERURUBELE sa greater wax se kgona go kwa medumo gakaone go feta sebopiwa le ge e le sefe mo lefaseng. Eupša ditsebe tša sona di bopegile gabonolo, mola e nngwe le e nngwe e ka lekana le hlogwana ya phini.

Ela hloko: Ka nywaga e mentši, go be go dutše go ithutwa ka tsela yeo serurubele sa greater wax se kwago ka gona. Morago bjale borathutamahlale ba Yunibesithing ya Strathclyde, kua Scotland, ba ile ba lekola go kwa ga serurubele se ba diriša medumo e fapafapanego. Ba ile ba hlahloba kamoo meropana ye ya ditsebe e thothomelago ka gona gotee le kamoo megalatšhika ya sona ya go kwa e šomago ka gona. “Meropana” yeo e ile ya kgona go kwa ge e be e lekwa ka modumo wa di-kilohertz tše 300. Ge go bapetšwa, go begilwe gore bomankgagane ba kgona go kwa go fihla go modumo wa di-kilohertz tše 212, di-dolphin tšona di kgona go kwa go fihla go modumo wa di-kilohertz tše 160, mola batho ba sa kgone go kwa ka godimo ga modumo wa di-kilohertz tše 20.

Banyakišiši ba nyaka go diriša bokgoni bjo bo phagamego bja go kwa ga serurubele sa greater wax bakeng sa thekinolotši e mpsha. Ka tsela efe? Ngaka James Windmill wa Yunibesithing ya kua Strathclyde o re: “Se se tla re thuša go dira dimaekrofouno tše kaone le tše dinyenyane. Di ka tsenywa didirišweng tše di fapafapanego tše bjalo ka diselefouno le didirišweng tša go thuša go kwa.”

O nagana eng? Na go kwa mo go makatšago ga serurubele sa greater wax go bile gona ka tlhagelelo? Goba na go hlamilwe?