Morwedi wa gago o re o gateletšegile. O sa kgolwe seo, o ipotšiša gore: ‘Ka nywaga e 13 feela? E sa le ngwana kudu gore a ka gateletšega!’ Lega go le bjalo, pele o ka botša morwedi wa gago seo, ela hloko mabaka a mangwe ao ka ona bophelo bo ka bago bo thatafalela ngwanenyana wa gago yo a lego mahlalagading.

Diphetogo tša mmeleng. Diphetogo tšeo di bago gona mmeleng wa ngwanenyana ge a tsena mahlalagading di ka dira gore a ikwe a tshwenyegile kudu, kudukudu ge e ba dithaka tša gagwe di mo šiile goba a gola go di feta. Anna * yo ga bjale a nago le nywaga e 20 o re: “Ke be ke le yo mongwe wa banenyana ba pele ba go apara poti (bra), gomme ke be ke ikwa ke sa lokologe. Ge ke ipapetša le dithaka tša ka, ke be ke ipona ke tloga ke sa swane le tšona.”

Diphetogo tša maikwelo. Karen yo ga bjale a nago le nywaga e 17, o gopola ka gore: “Go be go ferekanya go se tsebe lebaka leo ka lona ke bego ke ikwa ke thabile kudu mosegare gomme ka morago bošego ke lla kudu. Ke be ke sa tsebe gore bothata ke eng ka nna. Go be go le bjalo ka ge eka maikwelo a ka ga a laolege.”

Go thoma ga modikologo wa go hlapa ga basadi. Kgarebe yeo e bitšwago Kathleen e re: “Le ge mma a ile a boledišana le nna ka seo se bego se tla ntiragalela, ke be ke tloga ke se ka itokišeletša go thoma go bona kgwedi. Ke be ke hlapa gantši ka letšatši ka gobane ke be ke ikwa ke šilafetše ka dinako tšohle. Le gona dikgaetšedi tša ka tše tharo tše dikgolo di be di nkwera di sa nkwele bohloko. Di be di tšea taba ya go se ipshine ga ka ge ke bona kgwedi e le metlae.”

Kgateletšo ya go nyaka go amogelwa. Marie, yo ga bjale a nago le nywaga e 18, o gopola ka gore: “Kgateletšo ya dithaka e be e le matla kudu ge ke be ke le nywageng ya magareng ga e 12 le e 14. Bana ba sekolong seo ke bego ke se tsena ba be ba se botho go motho yo a bego a sa swane le bona.” Anita  wa nywaga e 14 o re: “Nywageng yeo ke lego go yona, go bohlokwa gore o amogelwe ke bagwera gomme go a nyamiša ge ba se na taba le wena.”

Kgothaletša morwedi wa gago go bolela ka seo se mo gateletšago. Mathomong, a ka no se nyake go bolela. Eupša o se ke wa fela pelo gomme o latele keletšo ya Beibele ya gore ‘o akgofele go kwa, o diege go bolela.’—Jakobo 1:19.

Tšeela godimo go gateletšega ga morwedi wa gago. Gopola gore morwedi wa gago ga a na phihlelo go swana le wena, gomme ka baka leo ga go na seo a ka bapetšago kgateletšo ya gagwe le sona—e bile ga se a hlwa a ithuta go lebeletšana le yona.—Molao wa motheo wa Beibele: Baroma 15:1.

O se ke wa imetša morwedi wa gago ka mešomo e mentši ya ka morago ga sekolo. Go ya ka puku ya Teach Your Children Well, bafsa bao ba šomago kudu “gantši ba bontšha maswao a go gateletšega, kudukudu maswao a mmeleng a go swana le go opša ke hlogo le go longwa ke mala.”—Molao wa motheo wa Beibele: Bafilipi 1:9, 10.

Kgonthišetša gore morwedi wa gago o khutša ka mo go lekanego. Bafsa gantši ga ba kwane le go robala. Ka gona, ge e ba morwedi wa gago a sa robale, bokgoni bja gagwe bja go nagana le bja go lwantšha kgateletšego bo tla fokola.—Molao wa motheo wa Beibele: Mmoledi 4:6.

Thuša morwedi wa gago go hwetša tsela e botse ya go lwantšha kgateletšego. Go itšhidulla go fokoletša banenyana ba bangwe go tshwenyega. Beibele e re: “Go tlwaetša mmele go [a] hola.” (1 Timotheo 4:8) Banenyana ba bangwe ba hwetša gore go ngwala seo se diregago bophelong go ba thuša go laola kgateletšego. Brittany wa nywaga e 22 o gopola ka gore: “Ge ke be ke sa le yo monyenyane ke be ke ngwala ka mathata ao ke bego ke sa kgone go a rarolla. Seo se be se nthuša go kwešiša kamoo ge e le gabotse ke bego ke ikwa ka gona ka bothata bjo itšego, gomme go be go eba bonolo go bo rarolla goba go tšwela pele ka bophelo.”

Bea mohlala. O lebeletšana bjang le kgateletšego? Na o ikimetša ka dilo tše dintši gomme wa hlakahlakana ge o swanetše go di dira? Na o ipolaiša mošomo gomme wa se iphe nako ya go dira dilo tša bohlokwa bophelong? Bafilipi 4:5 e re: “Anke go lekalekana ga lena go tsebje.” Gopola gore morwedi wa gago o lebeletše mohlala wa gago gomme o ithuta go wona—e ka ba e le o botse goba o mobe.