Nako le nako ge go tsoga ngangišano, wena le molekane wa gago le thoma go swayana diphošo o šoro. Polelo e gobatšago e tlwaelegile kudu lenyalong la lena moo e lego gore e fetogile mokgwa wa lena wa poledišano.

Ge e ba se se direga lenyalong la lena, le ka kgona go kgaotša mokgwa wo. Lega go le bjalo, le swanetše go thoma ka go hlahloba dibaki tša wona le lebaka leo go lego kaone kudu gore le dire diphetogo.

Lapa leo motho a godišeditšwego go lona. Banna le basadi ba bantši ba godišeditšwe malapeng ao go ona go bego go dirišwa polelo e gobatšago ka mehla. Molekane o tee goba bobedi bja bona ba ka ba ba diriša polelo yeo ba e kwelego go batswadi ba bona.

Tutuetšo ya boithabišo. Difilimi le ditshwantšhetšo tša metlae tša thelebišeneng di dira metlae ka polelo e hlabago, gomme di dira gore babogedi ba nagane gore polelo e bjalo ga e gobatše—goba le gore e a segiša.

Setšo. Ditšhaba tše dingwe di ruta gore bannanna ke bagateledi goba gore basadi ba swanetše go ba bogale wa go šiiša e le gore ba se bonagale eka ba a fokola. Nakong ya ngangišano, balekane ba nago le boemo bjo bjalo bja kgopolo ba ka lebelelana e le manaba go e na le go lebelelana e le badirišani, e bile ba ka diriša mantšu a gobatšago go e na le go diriša mantšu a thobago.

Go sa šetšwe gore e bakwa ke eng, polelo e gobatšago e ka lebiša tlhalong gotee le mathateng a mantši a tša maphelo. Ba bangwe e bile ba re mantšu a gobatša kudu go feta go itiwa ka matswele. Ka mohlala, mosadi yoo monna wa gagwe a bego a mo itia ka mantšu le ka matswele o re: “Ke be ke thatafalelwa ke go kgotlelela go rogwa go feta go kgotlelela go itiwa. Ke be nka bona go le kaone go itiwa go e na le go hlabja ka mantšu.”

O ka dira’ng ge e ba wena le molekane wa gago le dumeletše polelo e gobatšago e senya tswalano ya lena?

Bontšha kwelobohloko. Ipee boemong bja molekane wa gago, gomme o leke go kwešiša kamoo mantšu a gago a tla dirago gore a ikwe ka gona. Ge e ba go kgonega, nagana ka boemo bjo itšego bjoo go bjona molekane wa gago a ilego a kwa gore o mo hlaba ka mantšu. O se ke wa fapošwa ke seo o se boletšego; tabakgolo mo ke kamoo molekane wa gago a ilego a ikwa ka gona ka seo o se boletšego. Na o ka nagana ka ditsela tšeo ka tšona polelo e gobatšago e ka bago e ile ya tšeelwa legato ke mantšu a botho? Beibele e re: “Karabo ge e le boleta e phohliša pefelo, eupša lentšu leo le hlabago le tsoša bogale.”—Diema 15:1.

Šetša banyalani bao ba hlomphanago. Ge e ba mehlala e mebe e ile ya tutuetša mokgwa woo o boledišanago le batho ka wona, tsoma mehlala e mebotse. Theetša banyalani bao mokgwa wa bona wa go bolela o ka ekišwago.—Molao wa motheo wa Beibele: Bafilipi 3:17.

Tsošološang maikwelo ao le kilego la ba le ona. Polelo e gobatšago gantši ke bothata bja pelo e sego bja molomo. Ka gona, katanela go dula o nagana ka dilo tše dibotse le go ikwa gabotse ka molekane wa gago. Naganišiša ka mediro yeo le kilego la thabela go e dira le le mmogo. Lebelelang diswantšho tša kgale. Ke’ng seo se bego se go segiša? Ke dika dife tšeo di dirilego gore le kgahlane?—Molao wa motheo wa Beibele: Luka 6:45.

Diriša mafoko a thomago ka “ke.” Go e na le go hlasela molekane wa gago ka mantšu, hlalosa kamoo o ikwago ka gona ka go bolela kamoo o kgomegilego ka gona. Ka mohlala, go bolela gore “Ke ikwa eka pono ya ka ga e bohlokwa ge o dira dithulaganyo o sa ntheriše pele” go ka dira gore karabelo e be e botse go e na le go bolela gore “Ke go tseba o le bjalo—o dula o dira dithulaganyo o sa ntheriše pele!”—Molao wa motheo wa Beibele: Bakolose 4:6.

Tseba nako ya go kgaotša. Ge e ba le thoma go befelwa gomme le thoma go diriša mantšu a sa kgahlišego, go ka ba kaone ge le ka šuthiša poledišano. Gantši ga se phošo go tlogela go ngangišana ka bogale go fihlela go ka boledišanwa maswafo a ile fase.—Molao wa motheo wa Beibele: Diema 17:14.