Bafsa ba a Botšiša

Nka Letela Eng Lenyalong?—Karolo 1

“Ge ke na le yena, ke ntšha le la mohlagare! Ke fela pelo ya gore o nnyala neng!”

“Nna le yena ga re swane ka selo. Re fo ba re dula ntlong e tee, e sego bjalo ka banyalani. Ke lewa ke bodutu kudu!”

MOHLOMONGWE o bone gore mantšu a a lego ka mo godimo a boletšwe ke kgarebe e sego lenyalong; gomme ao a lego ka go le letshadi a boletšwe ke motho yo a lego lenyalong. Seo o ka bago o sa se lemoge ke gore mantšu ao ka moka a boletšwe ke motho o tee.

Go senyegile kae? Ge e ba ka letšatši le lengwe o nyaka go tsena lenyalong, o ka phema bjang gore toro yela e botse e feleletše ka go ba lenyalo la mathata?

Therešo ya bophelo: Selo se segolo seo se dirago gore o thabe lenyalong se ithekgile ka seo o bego o se letetše go lona.

Sehlogo se—gotee le sehlogo se se latelago sa “Bafsa ba  a Botšiša” ka go Phafoga!—se tla go thuša go ba le tekatekano dilong tšeo o di letetšego.

E le gore o ka letela’ng sa go ba le tekatekano? Ka boripana re ka re:

(1) Letela mehola

(2) Letela ditlhohlo

(3) Letela dimakatšo

A re di hlahlobe ka e tee ka e tee.

LETELA MEHOLA

Beibele e bolela gabotse ka lenyalo. (Diema 18:22) E mengwe ya mehola yeo o ka e letelago ke ye.

Bogwera. Beibele e re nakwana ka morago ga go bopša ga Adama, Modimo o itše: “Ga go botse gore monna a tšwele pele a dula a nnoši,” ka morago O ile a bopela Adama mogwera yo e lego Efa. (Genesi 2:18) Modimo o bopile yo mongwe le yo mongwe wa bona a na le dika tša moswananoši e le gore ba se swane, eupša ba dirišane. Ka go re’alo, monna le mosadi ba bopa bogwera bjo bo kaonekaone.—Diema 5:18.

Tirišano. Beibele e re: “Ba babedi ba phala o tee, gobane ge ba šoma mmogo ba tla atlega.” (Mmoledi 4:9, Good News Translation) Go bjalo le ka lenyalo. Kgarebe e nngwe e sa tšwago go nyalwa yeo e bitšwago Brenda, * e re: “Tšohle di ithekgile ka tirišano le go ikokobetša gotee le go ikemišetša go fetofetoga ge go nyakega.”

Tswalano. Beibele e re: “Monna a a kgotsofatše mosadi wa gagwe ka tša thobalano gomme mosadi le yena a direle monna wa gagwe se se swanago.” (1 Bakorinthe 7:3, Common English Bible) Ge o le lenyalong, o ka thabela thobalano ntle le go tshwenyega le go itshola tšeo gantši di tlišwago ke go ba le thobalano pele ga lenyalo.—Diema 7:22, 23; 1 Bakorinthe 7:8, 9.

Phetho: Lenyalo ke mpho e tšwago go Modimo. (Jakobo 1:17) Ge o ka kgomarela melao ya gagwe ya motheo, gona o ka letela gore lenyalo e be selo se se kaonekaone bophelong.

Nagana ka se: Na seo o se naganago ka lenyalo se kgongwa ke mehlala e mebe yeo o e bonego—mohlomongwe le ka lapeng leno? Ge e ba go le bjalo, ke mehlala efe e mebotse yeo o ka e latelago?

 LETELA DITLHOHLO

Beibele e nea pono e lekalekanego ka lenyalo. (1 Bakorinthe 7:28) Tše dingwe tša ditlhohlo tšeo o ka di letelago ke tše.

Go se kwane. Ga go na batho bao ba swanago tlwaa—ba swana feela ka gore ga se ba phethagala. (Baroma 3:23) Ka gona, monna le mosadi ba tla fela ba sa kwane, go sa šetšwe tsela yeo ba swanelanago ka yona. Ka dinako tše dingwe ba ka ikhwetša ba boletše ba sa nagana. Beibele e re: “Ge e ba motho a sa ka a foša ge a bolela . . . gona o phethagetše.” (Jakobo 3:2, Holy Bible—Easy-to-Read Version) Go e na le go leka go phema dingangišano ka moka, banyalani bao ba atlegago ba ithuta go boledišana le go rarolla mathata ge a le gona.

Manyami. Ngwanenyana yo a bitšwago Karen o re: “Gantši difilimi le mananeo a thelebišene di re bontšha ngwanenyana yo a hwetšago lesogana leo le mo swanelago tlwaa gomme a ipshina ka bophelo.” Ge lenyalo la mohuta woo le sa hwetšwe, banyalani ba ka nyama. Ke therešo gore ka morago ga lenyalo, banyalani ba tla bonana mafokodi a oketšegilego le mekgwa e sa kgahlišego. Ga se ra swanela go lebala gore leratorato “le kgotlelela tšohle”—gotee le manyami.—1 Bakorinthe 13:4, 7.

Dipelaelo. Beibele e re banyalani ba “tshwenyega ka dilo tša lefase.” (1 Bakorinthe 7:33, 34) Go tshwenyega ka tsela e bjalo go tlwaelegile e bile gantši ga se gwa fošagala. Ka mohlala, le ka hwetša go le thata go lefelela dilo tša bohlokwa. Banyalani ba ka gapeletšega go šoma gore ba kgone go reka dijo, diaparo le go hwetša lefelo la go dula. Eupša le ka atlega ge le ka ipopa ngatana gore le hlokomele lapa la lena.—1 Timotheo 5:8.

Therešo e sa fetogego: Ge e ba go beana mabaka go swana le go otlela koloi, gona lenyalo le swana le go otlela sefofane. Le tla swanela ke go ba le bokgoni bjo bo oketšegilego le go katana ka thata gore le lebeletšane le mathata—eupša le ka atlega.

Nagana ka se: O swaragana bjang le mathata ao o nago le ona gona bjale le batswadi ba gago le bana beno? Na o kgona go ba le tekatekano ge o nyamišwa? O swaragana bjang le dipelaelo?

SEHLOGONG SE SE LATELAGO SA “BAFSA BA A BOTŠIŠA” . . . Melao ya motheo ya Beibele e ka go thuša bjang go letela dimakatšo?

Dihlogo tše di oketšegilego go tšwa lelokelelong la dihlogo tša “Bafsa ba a Botšiša” di ka hwetšwa Wepesaeteng ya www.pr418.com

[Mongwalo wa ka tlase]

[Lepokisi/Seswantšho go matlakala 10]

SEO DITHAKA TŠA GAGO DI SE BOLELAGO

Brittany—Ke nagana gore re a e lahla ge re tsena lenyalong ka ge re lapišitšwe ke go botšišwa gore: “O tlo nyalwa neng?” Ge mathata a tsoga, ke wena o tla lebeletšanago le wona—e sego batho bao ba bego ba dulela go go botšiša.

Ciara—Maikwelo a ka palediša batho go nagana gabotse. Ke ka baka leo ke naganago gore batswadi ba swanetše go kgatha tema e kgolo ge o kgetha molekane. Akere ke bona ba go tsebago gabotse, ka gona ba tla kgona go go thuša go hwetša motho yo a go swanetšego.

[Lepokisi go letlakala 11]

O NAGANA’NG?

Kwena le Pebetse ba na le ngwaga ba beana mabaka. Yona nakong yeo ba nyakile ba arogana gabedi. La pele, Kwena o ile a nyaka a fediša ditaba tša bona ka ge a be a phara Pebetse ka molato wa go ponyetšana mahlo le bašemane ba bangwe. Ka lekga la bobedi, Pebetse o ile a botša Kwena gore yena o tlo ngala ge a ka se kgaotše go mo phara ka maaka. Dinakong tše ka bobedi, Kwena le Pebetse ba ile ba kgona go rarolla mathata a bona.

O nagana’ng? Na go bonagala go ka ba le dikotsi tswalanong ya batho bao ba boletšwego ka mo godimo? Taba ya gore Kwena le Pebetse ba nyakile ba arogana gabedi e bontšha’ng? Ka lehlakoreng le lengwe, taba ya gore ba ile ba kgona go rarolla mathata a bona e go bontšha’ng? O nagana gore Kwena le Pebetse ba ka letela’ng lenyalong la bona?

[Lepokisi go letlakala 11]

KE KA BAKA LA’NG O SA BOTŠIŠE BATSWADI BA GAGO?

Boledišana le batswadi ba gago ka lepokisi la “O Nagana’ng?” Bona ge e ba dipono tša bona ka Kwena le Pebetse di fapana le ya gago.