Ge Beibele e hlalosa Haramagedone e re ke ntwa yeo e tla bego e lwewa lefaseng ka moka, moo mebušo ya batho e tla bego e elwa le Modimo. Ga e re ke ntwa yeo e tlago go ba gona magareng ga dinaga tše itšego.

•   “Dipolelo tše di buduletšwego ke batemona . . . di ya go dikgoši tša lefase ka moka go di rapela ntweng ya letšatši le legolo la Modimo Ramatlaohle. . . . Tša di kgobokeletša lefelong le le bitšwago Haramagedone ka Seheberu.”—Kutollo 16:14, 16.

 Lentšu “Haramagedone” le tšwa go lentšu la Seheberu Har Meghid·dohnʹ, leo le rago gore “Thaba ya Megido.” Megido e be e le lefelo leo le bego le le Isiraeleng ya Kgale. Ka gona, batho ba bantšhi ba nagana gore ntwa ya Haramagedone e tlo ba Isiraele. Eupša lefelo la Megido goba mafelo a mangwe a Isiraele goba kgauswi le yona, ga se a magolo kudu moo e lego gore “dikgoši tša lefase ka moka” le mašole a tšona di ka kgobokana moo gore di lwe.

 Puku ya Kutollo e ngwadilwe go dirišwa “dipontšho,” goba dilo tšeo di swantšhetšago dilo tše dingwe. (Kutollo 1:1) Haramagedone ga se ntwa yeo e tlago go lwewa lefelong le itšego, eupša ke ntwa yeo e tlago go lwewa lefaseng ka moka, moo mebušo ya batho e tla bego e elwa le Modimo.—Kutollo 19:11-16, 19-21.