Baetapele ba lefase le mekgatlo ya ditshabatshaba ga ba kgone go dira gore go be le khutšo. Ga e sa le go tloga ntweng ya bobedi ya lefase, lehono go na le dintwa tše šoro kudu. Batho bao e ka bago ba dibilione tše pedi​—e lego bao ba dirago kotara ya batho lefaseng ka moka—​ba dula mafelong ao a nago le dintwa tše bjalo.

 Ke ka baka la eng batho ba sa kgone go dira gore go be le khutšo? Beibele e reng?

1.  1. Mekgwa yeo batho ba e bontšhago e dira gore ba palelwe ke go dira khutšo. Beibele e boletše e sa le pele gore mehleng ya rena, “batho e tla ba baithati, barati ba tšhelete, ba go ikgantšha, ba ikgogomošago, . . . ba go se botege, . . . ba ba sa ikemišetšago go amogela tumelelano le ge e le efe, . . . ba se nago boitshwaro, ba bogale, . . . ba hlogothata, ba tletšego boikgantšho.”​—2 Timotheo 3:2-4.

2.  2. Batho ba ka se kgone go rarolla mathata a bona ba sa thušwe ke Mmopi wa bona Jehofa a Modimo. Beibele e re “ga go matleng a motho yo a sepelago gore a laole dikgato tša gagwe.”​—Jeremia 10:23.

3.  3. Lefase le laolwa ke mmuši yo matla yo mobe, e lego Sathane Diabolo, yo a “timetšago lefase ka moka.” (Kutollo 12:9) Ge “lefase ka moka [le sa dutše] le laolwa ke Sathane,” go tlo ba le dintwa le go se kwane.​—1 Johane 5:19.

 Beibele e re tshepiša gore ke Modimo feela yo a ka tlišago khutšo, e sego batho.

•   “‘Ka gobane nna ke tseba gabotse menagano yeo ke e naganago ka lena,’ o re’alo Jehofa, ‘e lego menagano ya khutšo, e sego ya bošula, gore ke le nee bokamoso le kholofelo.’”​—Jeremia 29:11.

 Na Modimo o tlo phethagatša bjang tshepišo yeo? “Modimo yo a neago khutšo yena, o tla pšhatlaganya Sathane.” (Baroma 16:20) Modimo o tlo diriša pušo ya legodimong, yeo Beibele e e bitšago “Mmušo wa Modimo,” go dira gore go be le khutšo lefase ka moka. (Luka 4:43) Ge Jesu Kriste yo e lego Kgoši ya Mmušo woo a tla be a buša mo lefaseng, batho ba tlo rutwa go phedišana ka khutšo.​—Jesaya 9:6, 7.

•   E le gore o ithute ka mo go oketšegilego, bala sehlogo seo se rego “Mmušo wa Modimo o tla Phetha Eng?”