Nonyana yeo e bitšwago mallee ya ka borwa bja naga ya Australia e dula e kgonthišetša gore thempheretšha ya sehlaga sa yona e go 34°C. Nonyana ye, e kgona go kgonthišetša bjang gore thempheretšha ya sehlaga sa yona e dula e le go 34° bošego le mosegare ngwaga ka moka?

 Ka marega dinonyana tše di epa molete o mogolo wo o ka bago mithara o tee go ya fase le dimithara tše tharo ka bophara, ke moka nonyana e tona ya tlatša molete woo ka bjang le matlakala a mehlare. Ka morago ga gore matlakala le bjang bjoo di thapiše ke pula yeo e nago mafelelong a sehla sa marega, nonyana ye e epa molete wo mongwe ka gare ga molete wola wa mathomo, ka morago ya khupetša molete woo ka moka ka santa. Ge matlakala le bjang bjoo di thoma go bola le go ruthela di dira gore ka sehlageng go dule go le borutho gore mae a tle a kgone go phaphaša ka bo ona.

 Ka mehla ge nonyana ya tshadi e nyaka go beela lee, nonyana e tona e ntšha santa yela gore ya tshadi e kgone go beela lee leo ka sehlageng. Gateetee ge ya tshadi e fetša go beela lee, e tona e khupetša molete woo. Nonyana ya tshadi e ka beela mae a e ka bago a 35 magareng ga September le February. a

 Dinonyana tšeo di tsenya melomo ya tšona ka gare ga santa gore di kgone go kwa thempheretšha ya sehlaga sa tšona. Di beakanya maemo a sehlaga sa tšona go ya ka gore ke sehla sefe. Ka mohlala:

•   Nakong ya seruthwane ge bjang le matlakala di bola, di oketša thempheretšha ya ka sehlageng ke moka nonyana e tona e fokotša phišo ka go fokotša santa yeo e lego ka godimo ga sehlaga. Ka morago ya bušetša santa yeo mo sehlageng e se sa fiša.

•   Ka selemo nonyana e tona e šireletša mae go letšatši ka go oketša santa godimo ga sehlaga. Eupša mesong e mengwe le e mengwe e tloša santa yeo ke moka ya e bušetša e fodile le sehlaga se se sa fiša.

•   Ka lehlabula ge bjang le matlakala di šetše di bodile, nonyana e tona e tloša mo e ka bago santa ka moka ya e phatlalatša gore letšatši le e ruthetše le ruthetše le mae ao a lego ka sehlageng. Ka morago e khupetša sehlaga seo ka santa yela gore se ruthele bošego.

 Letšatši le letšatši nonyana e tona e fetša mo e ka bago diiri tše hlano, e ntšha le go bušetša dikhilograma tše e ka bago tše 850 tša santa. Mošomo wo nonyana ye e o dirago o na le mehola e oketšegilego. Mehola yeo e akaretša go dira gore santa e se ke ya ba thata go thuša mafotwana gore a kgone go tšwa ka sehlageng ge a fetša go phaphaša.

 O nagana eng? Na go no itiragalela gore nonyana yeo e bitšwago mallee e kgone go laola thempheretšha ya sehlaga sa yona? Goba go hlamilwe?