Sehlogong se

•  Tate o tšea karolo efe ka lapeng?

•  Karolo yeo tate a e tšeago ke e kgethegilego bjang?

•  Botate le barwedi

•  Keletšo go botate

•   Pele ngwana wa gago a ka belegwa. Gore o molekane wa mohuta mang gona bjale go laetša gore o tlo ba tate wa mohuta mang nakong e tlago. Puku ya Do Fathers Matter? e re:

   “Tate yo a thušago mosadi wa gagwe go reka dinyakwa tša ngwana, a mo išago ngakeng ka matšatši a gagwe, gomme a bona le ngwana mo sekeneng le go kwa go tiatia ga pelo ya gagwe, gantši o hlokomela mosadi le ngwana le ka morago ga ge ngwana a belegwe.”

   James o re: “Boimaneng bja gagwe, ke be ke sa nyake gore mosadi wa ka a ikwe eka o noši, ka gona ke be ke mo thuša mo nka kgonago. Re ile ra ba ra lokiša kamora ya leseana la rena re le ka babedi. Nakong ya ge re be re sa mo letetše e be e le nako e kgahlišago kudu.”

   Molao wa motheo wa Beibele: “Le se ke la kgahlegela ditaba tša lena feela, eupša le kgahlegele le tša ba bangwe.”—Bafilipi 2:4.

•   Ka morago ga ge ngwana wa gago a belegwe. O ka dira segwera sa kgaufsi le ngwana wa gago ka go bapala le yena le go mo kuka. Thuša le ka go mo hlokomela. O le tate, go tšea karolo ga gago go bohlokwa kudu go goleng ga ngwana wa gago. Tswalano yeo o e agago e bontšha gore o tšea ngwana wa gago a le yo bohlokwa.

   Richard o re: “Theogela fase boemong bja ngwana wa gago. Bapalang. Mo hlaletše. Eba yo a bapadišegago. Gopola gore, gore lerato ke eng, ngwana o ithuta go wena o le motswadi.”

   Molao wa motheo wa Beibele: “Bana ke bohwa bjo bo tšwago go Jehofa; dienywa tša mmele ke moputso.”—Psalme 127:3.

•   Ge ngwana wa gago a dutše a gola. Dinyakišišo di bontšha gore bana bao ba nago le segwera sa kgauswi le botatago bona ba dira gabotse ka sekolong, ga ba na le mathata a kaalo a tša monagano e bile ga se gantši ba ka diriša dihlaretagi gampe goba ga e be bana ba go hloka tsebe. Dira nako e lekanego go aga segwera se sebotse le ngwana wa gago.

   “Morwa wa ka o mpoditše gore seo a tlago go se gopola kudu mohla a tšwago ka gae e tlo ba dipoledišano tša rena tšeo re bego re e ba le tšona ge re otlela maetong a matelele goba re e ba le tšona dijong tša mantšiboa. Tše dingwe tša dipoledišano tše bohlokwa kudu tšeo re bilego le tšona di be di no itlela feela. Ke ka baka la gore re be re fetša nako e ntši kudu re le gotee,” go re’alo Dennis.

   Molao wa motheo wa Beibele: “Dulang le phakgametše gore kamoo le sepelago ka gona ga se bjalo ka batho ba ba sa hlalefago eupša ke bjalo ka ba bohlale, le diriše nako ya lena ka bohlale.”—Baefeso 5:15, 16.

 Ka tlwaelo go letetšwe gore botate e be bona ba šomelago lapa le go le šireletša, mola bomma ba letetšwe go ba bao ba fepago lapa ka lerato. (Doiteronomio 1:31; Jesaya 49:15) Ka malapeng a mangwe bomma ba phetha le maikarabelo ao ka tlwaelo e lego a botate, mola ka go a mangwe botate ba phetha le ao ka tlwaelo e lego a bomma. Le ga go le bjalo, banyakišiši ba bolela gore tate le mma, yo mongwe le yo mongwe wa bona o bapala karolo e kgethegilego go godišeng bana. a

 Monyakišiši wa tša malapa, Judith Wallerstein o hlalosa se se ilego sa mo diragalela seo se hlatselago taba ye. O ngwadile gore: “Ge morwedi wa-ka wa mengwaga e lesomepedi a be a thulwa ke koloi, o ile a nyaka gore tatagwe a namele le yena ka ampolenseng ka baka la gore o be a mo tshepa. Ka morago, kua sepetlele o ile a nyaka gore ke dule kgauswi le yena mpeteng wa gagwe letšatši ka moka go mo homotša.” b

 Daniel o re: “Tate o kgona go fa lapa seriti le tšhireletšo tšeo gantši go bago thata gore mma a ka di fihlelela a nnoši. Ka nako e swanago mma o dira gore go be le borutho ka ge a theetša ka kwešišo. Bobedi ba šoma e le ngata e tee.”

 Molao wa motheo wa Beibele: “Morwa wa ka, theetša tayo ya tatago gomme o se ke wa lahla molao wa mmago.”—Diema 1:8.

 Bjalo ka tate, o ruta morwedi wa gago tsela yeo a swanetšego go swarwa ka gona ke monna. O ithuta se ka ditsela tše pedi tše di latelago:

•   Ka go bona tsela yeo o swarago mmagwe ka yona. Ge o rata le go hlompha mosadi wa gago, morwedi wa gago o bona dika tše go lego bohlokwa gore a di lebelele go molekane ka moso.—1 Petro 3:7.

•   Ka go bona tsela yeo o mo swarago ka yona. Ge o swara morwedi wa gago ka tlhompho o mo ruta gore le yena a itlhomphe. Gape o ithuta go letela go swarwa ka tsela e swanago ke banna ba bangwe.

   Go fapana le moo, go dula o mo ntšha diphošo go mo dira gore a ikwe e se selo gomme go ka mo dira gore a ye a nyake lerato go banna ba bangwe—banna ba nago le maikemišetšo a mabe.

   “Morwedi yo a ratwago le go thekgwa ke tatagwe a ka se no itahlela ka diatleng tša monna yo a se nago le dika tša go ba molekane yo botse,” go re’alo Wayne.